އެމެރިކާގެ ރައީސް ހުށަހެޅުއްވި ޣައްޒާ ހަނގުރާމަ ހުއްޓާލުމުގެ ޕްލޭނަށް ހަމާސް އިން ވަރަށް އަވަހަށް ގޮތެއް ނިންމަނީ

އިސްރާއީލުން ޣައްޒާ ގައި ހިންގަމުން ގެންދާ ގާތްގަނޑަކަށް ދެ އަހަރު ދުވަހުގެ ހަނގުރާމަ ނިންމުމަށް އެމެރިކާގެ ރައީސް ޑޮނަލްޑް ޓްރަމްޕް ހުށަހަޅުއްވާފައިވާ ހުށަހެޅުމަށް ފަލަސްތީނުގެ ހަމާސް އިން "އަވަހަށް" ޖަވާބުދޭނެ ކަމަށް އެ ޖަމާއަތުގެ އިސް އޮފިޝަލަކު ބުނެފިއެވެ.

ހަމާސްގެ ސިޔާސީ ބިއުރޯގެ މެންބަރު މުޙައްމަދު ނައްޒާލް ބުރާސްފަތި ދުވަހު އަލްޖަޒީރާ އަރަބިކް އަށް ބުނެފައިވަނީ، އެ ޖަމާޢަތުން ޓްރަމްޕްގެ ޕްލޭން އާ ބެހޭ ގޮތުން މަޝްވަރާ ކުރަމުން ދަނީ އިސްރާއީލުން ކުރަމުންދާ ހަނގުރާމަ ހުއްޓުވުމުގެ މަޤްޞަދުގައި ކަމަށާއި، އަދި އެ ހުށަހެޅުމާ ގުޅޭގޮތުން އެ ޖަމާޢަތުގެ މަޤާމު އަވަހަށް އިޢުލާންކުރާނެ ކަމަށެވެ.

ނައްޒާލް ބުނެފައި ވަނީ، ފަލަސްތީނުގެ ރައްޔިތުން ތަމްސީލުކުރާ ފަރާތެއްގެ ހައިސިއްޔަތުން، ހަމާސް އަށް "ފަލަސްތީނު ރައްޔިތުންގެ މަޞްލަޙަތަށް އިސްކުރެވޭނެ ގޮތަކަށް" އެ ޖަމާޢަތުގެ ޚިޔާލު ފާޅުކުރުމުގެ ޙައްޤު ލިބިގެންވާ ކަމަށެވެ.

އަނެއްކޮޅުން އެމެރިކާގެ ރައީސް ޑޮނަލްޑް ޓްރަމްޕް، ހަމާސް އަށް އިސްރާއީލުގެ އެއްބާރުލުމާއެކު ހުށަހަޅާފައިވާ ހުށަހެޅުން ޤަބޫލުކުރުމަށް ދެވޭނެ މުއްދަތު ކަނޑައަޅުއްވާނެ ކަމަށް ބުރާސްފަތި ދުވަހު ވައިޓް ހައުސް އިން ބުނެފައިވެއެވެ. ނަމަވެސް، ކުރިން ކަނޑައަޅާފައިވާ ސުންގަޑި ތަންފީޒު ކުރާނެ ކަމެއް ސީދާ ބުނެފައެއް ނުވެއެވެ.

ޓްރަމްޕް އަންގާރަ ދުވަހު ވިދާޅުދާޅުވެފައި ވަނީ، ހަމާސް އަށް 20 ނުކުތާގެ މައްޗަށް އެކުލެވޭ ލިޔުން ޤަބޫލުކުރުމަށް 3 ނުވަތަ 4 ދުވަހުގެ މުއްދަތެއް ދެއްވާނެ ކަމަށެވެ. މި ހުށަހެޅުމުގައި ހަމާސް އިން ހަތިޔާރު ދޫކޮށްލުމަށް ގޮވާލާފައިވެއެވެ. މިއީ ހަމާސް އިން ކުރިން ދެކޮޅުހަދާފައިވާ ކަމެކެވެ. ހަމާސްއާ ގާތް މަޞްދަރެއް ބުދަ ދުވަހު ބުނެފައި ވަނީ، ހަމާސް އިން މި ހުށަހެޅުން ދިރާސާ ކުރަމުންދާ ކަމަށެވެ.

ފޮކްސް ނިއުސްގެ "އެމެރިކާސް ނިއުސްރޫމް" ޕްރޮގްރާމުގައި، ހަމާސް އިން މި ހުށަހެޅުން ދޫކޮށްލީ ކަމަށް ބެލެވޭނެ ހިސާބެއް ކަނޑައެޅުމާ ބެހޭގޮތުން ކުރެވުނު ސުވާލަކަށް ޖަވާބު ދެމުން، ވައިޓް ހައުސް ގެ ކެރޮލިން ލެވިޓް ވިދާޅުވީ އެއީ އެމެރިކާގެ ރައީސް ކަނޑައަޅުއްވަންޖެހޭނެ ރަތް ރޮނގެއް ކަމަށާއި އަދި އެކަން ރައީސް ކުރައްވާނެކަން ޔަގީން ކުރައްވާ ކަމަށެވެ. އޭނާ އިތުރަށް ވިދާޅުވީ 20 ނުކުތާގެ މައްޗަށް އެކުލެވޭ މި ޕްލޭނަކީ ތަފްޞީލީ، ފުރިހަމަ ޕްލޭނެއް ކަމަށާއި މި ޕްލޭނަށް ދުނިޔޭގެ އެކި ކަންކޮޅުތަކުން ތަޢުރީފުކޮށްފައިވާ ކަމަށެވެ.

މި ޕްލޭނުގައި ވަގުތުން ހަނގުރާމަ ހުއްޓާލުމާއި، ހަމާސްގެ ބެލުމުގެ ދަށުގައިވާ ހުރިހާ ރަހީނުން ދޫކޮށްލުމުގެ ބަދަލުގައި އިސްރާއީލުގެ ބެލުމުގެ ދަށުގައިވާ ފަލަސްޠީނު ގެ ގައިދީން ދޫކޮށްލުމާއި، ޣައްޒާ އިން އިސްރާއީލުގެ ސިފައިން މަރުހަލާތަކަކަށް ބަހާލައިގެން ފަހަތަށް ޖެއްސުމާއި، ހަމާސް އިން ހަތިޔާރު ބެހެއްޓުމާއި، އަދި ބައިނަލްއަޤްވާމީ ފަރާތްތައް އެކުލެވޭ ގޮތައް އިންތިގާލީ ސަރުކާރެއް އުފެއްދުން ހިމެނެއެވެ.

މި 20 ނުކުތާގެ ތެރެއިން ގިނަ ކަންތައްތަކަކީ ވޭތުވެދިޔަ ދެ އަހަރު ތެރޭގައި ހަނގުރާމަ ހުއްޓުވުމުގެ އެއްބަސްވުންތަކެއްގައި ހިމެނިފައިވާ ކަންތައްތަކެކެވެ. މީގެ ތެރޭގައި އިސްރާއީލާއި ހަމާސް އިން އެކި މަރުހަލާތަކުގައި ޤަބޫލުކޮށް، އަދި ފަހުން ދެކޮޅުހަދާފައިވާ ކަންތައްތައްވެސް ހިމެނެއެވެ.