ރައީސް ޑރ.މުހައްމަދު މުއިއްޒުގެ ސަރުކާރުން ބިރުން އުޅެނީ ވެރިކަން ވެއްޓިދާނެތީ ނޫން ކަމަށާއި، ރައްޔިތުންގެ ތާއީދު ނެތް ކަމަށް އެނގޭތީ ކަމަށް އެމްޑީޕީގެ ޗެއަރޕާސަން ފައްޔާޒު އިސްމާއީލް ވިދާޅުވެއްޖެއެވެ.

ހުކުރު ދުވަހުގެ ފަށާއިރު ޕްރޮގްރާމްގައި ފައްޔާޒު ވިދާޅުވީ ލޫޓުވައިފި އެއްވުމަށް އާއްމު ގިނަ ރައްޔިތުން ބައިވެރިވާނެ ކަމަށް ސަރުކާރުން ގަބޫލުކުރާ ކަމަށާއި، އެ މަންޒަރު ފެންނާނެތީ އެއްވުން ހުއްޓުމަށް ވަރަށް މަސައްކަތް ކުރާ ކަމަށެވެ. ސަރުކާރު ބިރުން އުޅެނީ ވެރިކަން ވެއްޓިދާނެތީ ނޫން ކަމަށާއި، ރައްޔިތުންގެ ތާއީދު ނެތްކަން އެނގޭތީ ކަމަށެވެ.

އެއްވުމާއި ގުޅިގެން ފުލުހުން ނެރުނު ބަޔާނަށް އިޝާރާތް ކުރައްވައި ފައްޔާޒު ވިދާޅުވީ އެބަޔާނަކީ ވެސް ރައްޔިތުންގެ ހިތުގައި ބިރުވެރިކަން އުފެއްދުމަށް ފުލުހުން ލައްވާ ސަރުކާރުން ކޮށްފައިވާ ކަމެއް ކަމަށެވެ. މީގެ 30 އަހަރު ކުރިން ވެސް ކުރީގެ ރައީސް މައުމޫނު އަބްދުއްގައްޔޫމްގެ ވެރިކަމުގައި އެމްޑީޕީން ބޭއްވި ބޮޑު މުޒާހަރާއަކާ ގުޅިގެން އެފަދަ ބަޔާނެއް ފުލުހުން ނެރުނު ކަމަށް އޭނާ ވިދާޅުވިއެވެ.

ފައްޔާޒު ވިދާޅުވީ ލޫޓުވައިފި ނަމުގައި ނުކުންނަކީ ސަރުކާރު ވައްޓާލައި، މާލެތެރެ ހަލަބޮލި ކުރަން ނޫން ކަމަށެވެ. އަދި ވިދާޅުވީ ޕާޓީގެ ލީޑަރުން ޖަލަށްލައި، ބިރު ދެއްކި ނަމަވެސް ރައްޔިތުންގެ ޝުއޫރު ނުހިފެހެއްޓޭނެ ކަމަށާއި، އެކަން މީގެކުރިން ވެސް ތަޖުރިބާ ކޮށްފައިވާ ކަމަށެވެ.

ފައްޔާޒު ވިދާޅުވީ އެމްޑީޕީން ނުކުންނަނީ ރައްޔިތުންނާއެކު، މުޒާހަރާއަށް ކަމަށާއި، އެ މުޒާހަރާގައި ކަންބޮޑުވުންތަކުގެ ވާހަކަތައް ދައްކައި، ޑިމާންޑް ކުރާނެ ކަމަށެވެ.