މި ސަރުކާރުން ބިރުން އުޅެނީ ވެރިކަން ވެއްޓިދާނެތީއެއް ނޫން، ރައްޔިތުންގެ ތާއީދު ނެތް ކަން އެނގޭތީ: ފައްޔާޒު
ލޫޓުވައިފި އެއްވުމަށް ގިނަ ރައްޔިތުން ބައިވެރިވާނެތީ ސަރުކާރުން އެއްވުން ހުއްޓުވަން މަސައްކަތް ކުރޭ
ފަށާއިރު ޕްރޮގްރާމްގައި އެމްޑީޕީގެ ޗެއަރޕާސަން ފައްޔާޒު އިސްމާއީލް ވާހަކަދައްކަވަނީ
ރައީސް ޑރ.މުހައްމަދު މުއިއްޒުގެ ސަރުކާރުން ބިރުން އުޅެނީ ވެރިކަން ވެއްޓިދާނެތީ ނޫން ކަމަށާއި، ރައްޔިތުންގެ ތާއީދު ނެތް ކަމަށް އެނގޭތީ ކަމަށް އެމްޑީޕީގެ ޗެއަރޕާސަން ފައްޔާޒު އިސްމާއީލް ވިދާޅުވެއްޖެއެވެ.
ހުކުރު ދުވަހުގެ ފަށާއިރު ޕްރޮގްރާމްގައި ފައްޔާޒު ވިދާޅުވީ ލޫޓުވައިފި އެއްވުމަށް އާއްމު ގިނަ ރައްޔިތުން ބައިވެރިވާނެ ކަމަށް ސަރުކާރުން ގަބޫލުކުރާ ކަމަށާއި، އެ މަންޒަރު ފެންނާނެތީ އެއްވުން ހުއްޓުމަށް ވަރަށް މަސައްކަތް ކުރާ ކަމަށެވެ. ސަރުކާރު ބިރުން އުޅެނީ ވެރިކަން ވެއްޓިދާނެތީ ނޫން ކަމަށާއި، ރައްޔިތުންގެ ތާއީދު ނެތްކަން އެނގޭތީ ކަމަށެވެ.
އެއްވުމާއި ގުޅިގެން ފުލުހުން ނެރުނު ބަޔާނަށް އިޝާރާތް ކުރައްވައި ފައްޔާޒު ވިދާޅުވީ އެބަޔާނަކީ ވެސް ރައްޔިތުންގެ ހިތުގައި ބިރުވެރިކަން އުފެއްދުމަށް ފުލުހުން ލައްވާ ސަރުކާރުން ކޮށްފައިވާ ކަމެއް ކަމަށެވެ. މީގެ 30 އަހަރު ކުރިން ވެސް ކުރީގެ ރައީސް މައުމޫނު އަބްދުއްގައްޔޫމްގެ ވެރިކަމުގައި އެމްޑީޕީން ބޭއްވި ބޮޑު މުޒާހަރާއަކާ ގުޅިގެން އެފަދަ ބަޔާނެއް ފުލުހުން ނެރުނު ކަމަށް އޭނާ ވިދާޅުވިއެވެ.
ސަރުކާރު ވައްޓާލަފާނެތީ ބިރަކުން ނޫން ސަރުކާރުން އުޅެނީއެއް އަޅުގަނޑު ދެކޭ ގޮތުގައި. އަޅުގަނޑު ދެކޭ ގޮތުގައި ސަރުކާރުން ބިރުން އުޅެނީ ސަރުކާރަށް ވަރަށް ސާފުކޮށް އެނގޭ ސަރުކާރުގެ ބާރުވެރިކަން އޮތީމަ މީހުން މަޑުން ތިއްބަކަސް ސަރުކާރަށް ރައްޔިތުންގެ ތާއީދެއް ނެތްކަން. އެކަން އާމިރުމެން ތިކުރައްވާ ދަތުރުތަކުން ވެސް އެނގިވަޑައިގަންނަވާނެ. އަޅުގަނޑަށް އަދި ދިމައެއް ނުވޭ ސީދާ ސަރުކާރުގެ ޕީއެންސީގެ އިސް މަގާމުތަކުގައި ތިބި މީހެއް ނޫނިއްޔާ މިސަރުކާރަށް ތާއިދެއް އޮތްތަން. އެހެންވީމަ ސަރުކާރުގެ ކަންބޮޑުން އޮތީ ސަރުކާރުން މިދައްކާ މަންޒަރަކީ ރައްޔިތުން ތިބީ ވަރަށް ހިތްހަމަޖެހިގެންނޭ. އަޅުގަނޑުމެން ނުކުމެ މި ވާހަކަ ދައްކަނީ ނޫނީ މީޑިއާއިން ދޮގު ވާހަކަ ދައްކަނީއޭ. އެހެންވީމަ ގިނަ މީހުންތަކެއް ފެނިއްޖެއްޔާ ސަރުކާރާ ދޭތެރޭގައި ހިތްހަމަ ނުޖެހުން އޮތްކަން މުޅި ރައްޔިތުންނަށް ފެންނާނެތީ އެކަން ހުއްޓުވަންވެގެން މީގައި ބިރުވެރި ކަންތައްތަކެއްގެ ވާހަކަ ދައްކަނީއެމްޑީޕީގެ ޗެއަރޕާސަން ފައްޔާޒު އިސްމާއީލް
ފައްޔާޒު ވިދާޅުވީ ލޫޓުވައިފި ނަމުގައި ނުކުންނަކީ ސަރުކާރު ވައްޓާލައި، މާލެތެރެ ހަލަބޮލި ކުރަން ނޫން ކަމަށެވެ. އަދި ވިދާޅުވީ ޕާޓީގެ ލީޑަރުން ޖަލަށްލައި، ބިރު ދެއްކި ނަމަވެސް ރައްޔިތުންގެ ޝުއޫރު ނުހިފެހެއްޓޭނެ ކަމަށާއި، އެކަން މީގެކުރިން ވެސް ތަޖުރިބާ ކޮށްފައިވާ ކަމަށެވެ.
ފައްޔާޒު ވިދާޅުވީ އެމްޑީޕީން ނުކުންނަނީ ރައްޔިތުންނާއެކު، މުޒާހަރާއަށް ކަމަށާއި، އެ މުޒާހަރާގައި ކަންބޮޑުވުންތަކުގެ ވާހަކަތައް ދައްކައި، ޑިމާންޑް ކުރާނެ ކަމަށެވެ.
