މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އެކައުންޓުތަކުގައި ހުރި ފައިސާ ހިފަހައްޓަން ކޯޓުގައި އެދިއްޖެއެވެ.

އެމްޑީޕީ އާ ދެކޮޅަށް ކުއްލި ގޮތަކަށް އައިލެންޑް އޭވިއޭޝަނުން ހުށަހެޅި މައްސަލައިގައި އެދިފައިވަނީ މަދަނީ އިޖުރާއާތުގެ ގާނޫނުގެ 372 ވަނަ މާއްދާގެ ދަށުން އެޅެން ހުރި އެންމެހާ ފިޔަވަޅުތައް އަޅައި ދިނުމަށާއި، އެމްޑީޕީގެ ނަމުގައި ހުރި އެކައުންޓް ތަކުގައިވާ ފައިސާ ހިފަހައްޓާ އެ ފައިސާ ގެނެސް ދިނުމަށެވެ.

މައުލޫމާތު ލިބިފައިވާ ގޮތުގައި މި މައްސަލަ އަކީ އައިލެންޑް އޭވިއޭޝަން އަށް އެމްޑީޕީ އިން ދައްކަން ޖެހޭ ފައިސާ އާ ގުޅިގެން ދެ ފަރާތުގެ ދެމެދުގައި ސެޓްލްމަންޓް އެގްރީމެންޓެއް ހެދިފައި ވަނިކޮށް އެ އެއްބަސްވުން ބާތިލު ކުރުމަށް ފަހު އައިލެންޑް އޭވިއޭޝަނުން ސިވިލް ކޯޓަށް ހުށަހެޅި މައްސަލަ އެކެވެ.

އައިލެންޑް އޭވިއޭޝަނުން އިތުރަށް ކޯޓުގައި އެދިފައިވަނީ އިލެކްޝަންސް ކޮމިޝަނުން ސިޔާސީ ޕާޓީތަކަށް ދޫކުރުމަށް ކަނޑައަޅާފައިވާ ފައިސާގެ ތެރެއިން އެމްޑީޕީ އަށް ދޫކުރުމަށް ނިންމާފައިވާ ފައިސާގެ ތެރެއިން އައިލެންޑް އޭވިއޭޝަން އަށް ދައްކާފައި ނުވާ މިންވަރު ހިފަހައްޓާ ކޯޓަށް ގެނެސްދިނުމަށެވެ.

މައްސަލަ ހުށަހެޅުމާ ގުޅިގެން ކޯޓުން ވަނީ އެމްޑީޕީ އަށް ބުރާސްފަތި ދުވަހު ހަވީރު ނޯޓިސް ފޮނުވާފައެވެ.

މީގެ ކުރިން އައިލެންޑް އޭވިއޭޝަނުން އެމްޑީޕީ އާ ދެކޮޅަށް ހުށަހެޅި މައްސަލައިގައި ސިވިލް ކޯޓުން ކުރި ހުކުމާ އެއްގޮތައް ފައިސާ ދެއްކިފައި ނުވަނީ ސިޔާސީ ޕާޓީތަކަށް ދޫކުރާ ފައިސާ ލިބުމުގައި ލަސްވުމާ ގުޅިގެން ކަމަށާއި، އަދި އެ ފައިސާ ލިބުމުން ސެޓްލްމަންޓް އެއްބަސްވުމެއްގެ ދަށުން ފައިސާ ދައްކާ ގޮތައް ދެފަރާތުން އެއްބަސްވެ ސެޓްލްމަންޓް އެއްބަސްވުމަކާ ހަމަ އަށް ގޮސްފައިވާ ކަމަށް އެމްޑީޕީ އިން މައުލޫމާތު ލިބިފައިވެއެވެ.

އެހެން ނަމަވެސް މިހާރު އައިލެންޑް އޭވިއޭޝަނުން ބޭނުންވަނީ އެ ހުކުމާ އެއް ގޮތައް ފައިސާ ނުދައްކާ ކަމަށް ބުނެ، އެމްޑީޕީ ގެ މައްޗަށް ކޯޓު މެދުވެރިކޮށް ހުކުމް ތަންފީޒު ކުރުވުމަށެވެ.

އެމްޑީޕީ އިން އައިލެންޑް އޭވިއޭޝަން އަށް ދައްކަން ޖެހޭ ކަމަށް އެ ކުންފުނިން ބުނަނީ ގާތްގަނޑަކަށް 3.6 މިލިއަން ރުފިޔާއެވެ.

މައްސަލަ ކޯޓަށް ހުށަހެޅި އިރު އެމްޑީޕީ އިން އަންނަނީ ހުކުރު ދުވަހުގެ ރޭ މާލޭގައި ސަރުކަރާ ދެކޮޅަށް ބޮޑު މުޒާހަރާ އެއް އިންތިޒާމު ކުރަމުންނެވެ.