ގެއްލުނު ނާފިއުގެ އާއިލާ އިން އާދޭހާއެކު ސަރުކާރުގައި އަދިވެސް އެދެނީ އޭނާގެ ހަށިގަނޑު ހޯދައި ދިނުމަށް!
23 އޯގަސްޓު 2026 | އާދީއްތަ 14:56ނާފިއުގެ އާއިލާ އިން ބުނެފައި ވަނީ ދާދި ފަހުން ރާއްޖޭގައި ގެއްލުނު އިޓަލީގެ ފަތުރުވެރިން ހޯދުމަށް ވެސް، ރައީސް ޑރ. މުހައްމަދު މުއިއްޒު ބޭރު ޤައުމުތަކުގެ އެހީތެރިކަން ހޯއްދެވިއިރު، ނާފިއުގެ ހަށިގަނޑު ހޯދުމަށް ބޭރުގެ އެހީތެރިކަން ނުހޯދަންވީ ސަބަބެއް ނޭނގޭ ކަމަށް. ނާފިއު ގެއްލުނީ ޤައުމީ ޚިދުމަތުގައި ރަސްމީ މަސައްކަތުގައި އުޅެނިކޮށް ކަމަށްވާއިރު، އޭނާ ހޯދުމަށް ސަރުކާރުންނާއި ކަމާ ބެހޭ ފަރާތްތަކުން އިސްކަމެއް ދޭން ޖެހޭނެ ކަމަށް އާއިލާ އިން ޤަބޫލު ކުރޭ
ކަނޑުމަތީގެ އޮޕަރޭޝަނެއްގައި ހަރަކާތްތެރިވަނިކޮށް ގެއްލުނު ޕޮލިސް ސާޖަންޓް އަލީ ނާފިއު | ރާއްޖެ އެމްވީ
ޕޮލިސް ސާޖަންޓް އަލީ ނާފިއު ގެއްލިގެން ހޯދަމުންދާތާ އެތައް ދުވަހެއް ވެފައިވާއިރު، އޭނާގެ އާއިލާ އިން އާދޭހާ އެކު ސަރުކާރުގައި އަދިވެސް އެދެނީ ހަށިގަނޑު ހޯދައި ދިނުމަށް ކަމަށް އެ އާއިލާ އިން ބުނެފި އެވެ.
ރާއްޖެ އެމްވީއާ ވާހަކަ ދައްކަމުން ނާފިއުގެ އާއިލާ އިން ބުނީ، އެ ސަރަހައްދަކީ އިންސާނުންނަށް ނުދެވޭ ފުން ސަރަހަދެއް ކަމަށް ކަމާ ބެހޭ އިދާރާތަކުން ބުނެފައިވާ ކަމަށެވެ. އާއިލާ އިން ވެސް އެކަން ޤަބޫލު ކުރާ ކަމަށާއި، އެހެން ނަމަވެސް ދުނިޔޭގެ އެހެން ޤައުމުތަކުގެ އެހީތެރިކަން ހޯދައިގެން ވިޔަސް ނާފިއުގެ ހަށިގަނޑު އާއިލާއާ ހަމައަށް ގެނެސްދިނުމަކީ އާއިލާގެ އާދޭސް ކަމަށް ބުނެފައިވެ އެވެ.
ނާފިއުގެ އާއިލާ އިން ބުނެފައި ވަނީ ދާދި ފަހުން ރާއްޖޭގައި ގެއްލުނު އިޓަލީގެ ފަތުރުވެރިން ހޯދުމަށް ވެސް، ރައީސް ޑރ. މުއިއްޒު ބޭރު ޤައުމުތަކުގެ އެހީތެރިކަން ހޯއްދެވިއިރު، ނާފިއުގެ ހަށިގަނޑު ހޯދުމަށް ބޭރުގެ އެހީތެރިކަން ނުހޯދަންވީ ސަބަބެއް ނޭނގޭ ކަމަށެވެ. ނާފިއު ގެއްލުނީ ޤައުމީ ޚިދުމަތުގައި، ރަސްމީ މަސައްކަތުގައި އުޅެނިކޮށް ކަމަށްވާއިރު، އޭނާ ހޯދުމަށް ސަރުކާރުންނާއި ކަމާ ބެހޭ ފަރާތްތަކުން އިސްކަމެއް ދޭން ޖެހޭނެ ކަމަށް އާއިލާ އިން ޤަބޫލު ކުރެ އެވެ.
މީގެ އިތުރުން ނާފިއުގެ އާއިލާ އިން ބުނެފައި ވަނީ ހޯމް މިނިސްޓަރު އަލީ އިހުސާން އާއި ކޮމިޝަނަރ އޮފް ޕޮލިސް އަހުމަދު މުހައްމަދު ވަޑައިގެން، އެ އާއިލާއާ ބައްދަލު ކުރައްވާފައިވާ ކަމަށެވެ. އެ ބައްދަލު ކުރެއްވުމުގައި ވެސް އެ އާއިލާގެ ފަރާތުން އެދިފައި ވަނީ، ނާފިއުގެ ހަށިގަނޑު އާއިލާއާ ހަމައަށް ގެނެސްދިނުމަށެވެ. އެ އާއިލާ އިން ބުނީ ނާފިއު ހޯދުމުގެ މަސައްކަތް މިހާރު ދާއިމީކޮށް ކުރިއަށް ނުގެންދާ ކަމަށާއި، ބައެއް ދުވަސް ދުވަހު ކުރިއަށް ގެންދިޔުމަށް ފަހު، އަނެއް ބައި ދުވަސް ދުވަހު ނުގެންދާ ކަމަށެވެ.
އެމީހުން އާއިލާއާ ބައްދަލު ކޮށްފައި ބުނީ، ތިމަންނަމެން ހޯދުމުގެ މަސައްކަތް އަދިވެސް ކުރިއަށް ގެންދަމޭ އެބަ. އިއްޔަ ނޫން ކުރީ ދުވަހު ވެސް ގެންދިޔަ. އާއިލާ އަތުގައި އެބަ އިން އެ އެޕް، އޭގެއިން ކޮންމެ ދުވަހަކު ވެސް ބަލަމުން އެބަ ގެންދަން. މިއަދަކު ނެތް ގޮސްފައި. އިއްޔެ ނޫން ކުރީ ދުވަހު ދިޔަ، ގޮސްފައި އެ މީހުން ވަރަށް ބޮޑު ބައި ބެލިނާފިއުގެ އާއިލާ
ނާފިއުގެ އާއިލާ އިން ބުނީ، މިދިޔަ ދުވަސްތަކުގައި ރައީސް މުއިއްޒު ނުވަތަ ސަރުކާރު އިސްވެރިޔަކު އެ އާއިލާ އަށް ގުޅުއްވާފައި ނުވާ ކަމަށެވެ.
އެ އާއިލާ އިން އިތުރަށް ބުނެފައި ވަނީ އެއީ ވަރަށް ފުން ސަރަހަދެއްކަން ޤަބޫލު ކުރާ ކަމަށާއި، އެކަމުގައި ބައިވެރިވެ އިތުރު ފުރާނައެއް ގެއްލެން އާއިލާ އިން ވެސް ބޭނުން ނުވާ ކަމަށެވެ. އެހެން ނަމަވެސް، އެފަދަ ވަސީލަތްތަކެއް ހުރެދާނެ ކަމަށާއި ރައީސް މުއިއްޒު އެދިވަޑައިގެންފި ނަމަ ކައިރި ޤައުމުތަކުން ވެސް އެހީތެރިކަން ދޭނެ ކަމަށް ޤަބޫލު ކުރާ ކަމަށެވެ.
ނާފިއުގެ އަނބިމީހާ ވެސް ވަނީ، އެ ތަހުގީގު ކުރިއަށްދާ ގޮތް ވަރަށް ރަނގަޅަށް އެނގެން ބޭނުންވާ ކަމަށް ކަމާ ބެހޭ ފަރާތްތަކުގެ ކިބައިގައި އެދިފައި އެވެ. އާއިލާ އިން ބުނީ ނާފިއުގެ އަނބިމީހާ އަދިވެސް ހުރީ ހިތްދަތިކަމާއި ހިތާމައިގެ ތެރޭގައި ކަމަށެވެ. އާއިލާއާ ބައްދަލުކުރުމަށް ފަހު ވެސް، ބޭރުގެ އެހީތެރިކަން ހޯދުމަށް މަސައްކަތް ކުރަމުން އަންނަ ކަމަށް ހޯމް މިނިސްޓަރާއި ކޮމިޝަނަރ އޮފް ޕޮލިސް ވަނީ އާއިލާ އަށް އަންގައިފަ އެވެ.
2026 އޮގަސްޓު ފަސް ވަނަ ދުވަހުގެ ރޭ ދަންވަރު، ގއ. ކުޑަލަފަރީގެ އިރު އުތުރުން 4.1 ނޯޓިކަލް މޭލު ބޭރުން "ފްރެންޑް 4" ސަޕްލައި ދޯނި ބަންޑުން ޖަހާލައި، ހުވަދޫ ކަނޑަށް އަޑި އަށް ދިޔަ ހާދިސާއާ ގުޅިގެން، ގެއްލުނު ތިން މީހުން ހޯދުމުގެ މަސައްކަތުގައި ކަނޑު މަގުންނާއި އަދި ވައިގެ މަގުން ހުވަދޫ ކަނޑުގެ ސަރަހައްދު އެއްކޮށް ބަލާފައިވާ ކަމަށް އެމްއެންޑީއެފް އިން މީގެ ކުރިން ވަނީ ބުނެފަ އެވެ.
އަދި އޮޔާ ހިނގައި ދާނެ ކަމަށް ބަލައި، ވަޔާއި ކަނޑުގެ އޮއިވަރަށް ބަލައިގެން އެ މިސްރާބުން ވެސް ހުވަދޫ ކަނޑާއި ހުވަދު އަތޮޅުގެ އެ ބިތުގެ ފަރުތަކާއި ހުވަދު އަތޮޅު އުތުރުބުރީގެ އެ ބިތުގެ ފަރުތައް ވެސް ބަލާފައިވާ ކަމަށް އެމްއެންޑީއެފް އިން ބުނެފައިވެ އެވެ.
މިހާދިސާގައި ގެއްލިފައިވަނީ ދިވެހި އަސްކަރިއްޔާގެ ސްޓާފް ސާޖަންޓް އިބްރާހީމް އަހުމަދާއި، މޯލްޑިވްސް ޕޮލިސް ސަރވިސްގެ ސާޖަންޓް އަލީ ނާފިއު އަދި ދޯނީގެ ކެޕްޓަން މުހައްމަދު ހަމްދޫން އެވެ. މި ހާދިސާ ހިނގި ވަގުތު ދޯނީގައި ތިބި އަށް މީހުންގެ ތެރެއިން ހަތް މީހަކު އެމްއެންޑީއެފް އިން ސަލާމަތް ކޮށްފައިވެ އެވެ.
