ދުނިޔޭގެ ބޮކްސިން ޗެމްޕިއަންކަން ދެ ފަހަރު ހޯދާފައިވާ ޓެޓޭ ގަޔަށް ބަޑިޖަހާ މަރާލައިފި

ދުނިޔޭގެ ބޮކްސިން ޗެމްޕިއަންކަން ދެ ފަހަރު ހޯދާފައިވާ ޒޮލާނީ ޓެޓޭ، ދެކުނު އެފްރިކާގައި ހުންނަ އޭނާގެ ގޭގެ ބޭރުގައި ބަޑިޖަހައި މަރާލައިފި އެވެ.

އުމުރުން 38 އަހަރުގެ ޓެޓޭ މަރާލާފައިވަނީ މިދިޔަ ހުކުރު ދުވަހު އީސްޓަން ކޭޕްގެ އެމްޑަންޓްސޭންގައި ދިން ކުއްލި ހަމަލާއެއްގަ އެވެ.

އޮފިޝަލުން މައުލޫމާތު ދޭ ގޮތުގައި، ޓެޓޭ އޭނާގެ ކާރުގައި ގޭގެ ދޮރު ހުޅުވެންދެން މަޑުކޮށްގެން އިންދާ، މޫނު ނިވާކޮށްގެން ތިބި ހަތިޔާރު އެޅި ދެ މީހަކު އެހެން އުޅަނދަކުން ފޭބުމަށްފަހު އޭނާއަށް އަމާޒުކޮށް ގިނަ ހަމަލާތަކެއް ވަނީ ފޮނުވާލާފަ އެވެ. މި ހަމަލާގައި ޓެޓޭއާއެކު ކާރުގައި އިން 27 އަހަރުގެ އަންހެނަކަށްވެސް އަނިޔާވެފައިވާއިރު، އޭނާއަށް މިހާރު ދަނީ ހޮސްޕިޓަލުގައި ފަރުވާ ދެމުންނެވެ.

ދެކުނު އެފްރިކާގެ މިނިސްޓަރ އޮފް ސްޕޯޓްސް، އާޓްސް އެންޑް ކަލްޗަރ، ގޭޓަން މެކެންޒީ ވިދާޅުވީ، ދެކުނު އެފްރިކާއިން މި ވަކިވީ އެ ގައުމުން މިހާތަނަށް އުފެއްދި އެންމެ މޮޅު އެއް ފައިޓަރު ކަމަށެވެ.

މި ހަމަލާ ދިނުމަށްފަހު ތުހުމަތު ކުރެވޭ ދެ މީހުން އެ ސަރަހައްދުން ފިލާފައިވާ ކަމަށާއި، މި މައްސަލައިގެ ބޮޑު ތަހުގީގެއް މިހާރު ފަށާފައިވާ ކަމަށްވެސް މެކެންޒީ އިތުރަށް ވިދާޅުވި އެވެ.

ޓެޓޭ ވަނީ 2017 އިން 2019 އަށް ޑަބްލިޔު.ބީ.އޯ ބެންޓަމްވެއިޓް ޓައިޓަލް ދަމަހައްޓާފަ އެވެ. މީގެ އިތުރުން 2014 ވަނަ އަހަރު އޭނާ ވަނީ އައި.ބީ.އެފް ސުޕަރ-ފްލައިވެއިޓް ތަށިވެސް ކާމިޔާބުކޮށްފަ އެވެ.

ދުނިޔޭގެ ރެކޯޑް ފޮތުންވެސް ޓެޓޭ ވަނީ ޖާގަ ހޯދާފަ އެވެ. އެއީ 2017 ވަނަ އަހަރު ސިބޮނީސޯ ގޮންޔާއާ ދެކޮޅަށް ކުޅުނު މެޗު އެންމެ 11 ސިކުންތުގެ ތެރޭގައި ނޮކްއައުޓްކޮށްގެން، ތަށި ހޯދުމަށް ކުޅުނު މެޗެއްގައި އެންމެ އަވަހަށް މެޗު ނިންމާލި ކުޅުންތެރިޔާގެ ގޮތުގަ އެވެ.

ޓެޓޭ އެންމެ ފަހުން ރިންގަށް އެރީ 2022 ވަނަ އަހަރުގެ ޖުލައި މަހު ލަންޑަނުގަ އެވެ. އެ މެޗުގައި އިނގިރޭސިވިލާތުގެ ޖޭސަން ކަނިންހަމް އަތުން އޭނާ މޮޅުވި ނަމަވެސް، ޑްރަގް ޓެސްޓުން ފޭލްވުމާ ގުޅިގެން ފަހުން އެ ނަތީޖާ ވަނީ ބާތިލުކޮށްފަ އެވެ.

އޭނާގެ ހަށިގަނޑުން އެނަބޮލިކް ސްޓެރޮއިޑް "ސްޓެނޯޒޮލޯލް" ފެނުމާ ގުޅިގެން، އިނގިރޭސިވިލާތުގެ އެންޓި-ޑޯޕިންގ އެޖެންސީން ވަނީ އޭނާ ހަތަރު އަހަރަށް ސަސްޕެންޑްކޮށްފަ އެވެ.

އޭނާގެ ސަސްޕެންޝަންގެ މުއްދަތު ހަމަވާން އޮތީ 2026 ވަނަ އަހަރުގެ ޖުލައި 29 އަށެވެ. ޓެޓޭގެ މަރާ ގުޅިގެން އޭނާގެ މެނޭޖަރު އެމްލާ ޓެންގިމްފީން ބުނީ، އަލުން ރިންގަށް އެނބުރި އައުމަށްޓަކައި ޓެޓޭ ފަރިތަކުރުންތައް ކުރިއަށް ގެންދަމުން ދިޔަ ކަމަށެވެ.

ޓެޓޭގެ ކެރިއަރުގައި ކުޅުނު 34 މެޗުގެ ތެރެއިން 29 މެޗުން އޭނާ ވަނީ މޮޅުވެފަ އެވެ. އޭނާ ބަލިވެފައިވަނީ އެންމެ ހަތަރު މެޗުންނެވެ.