ގަތަރުގައި ހައްޔަރުކޮށްފައި ތިބި އީރާނުގެ ޕައިލެޓުންގެ ސިއްހީ ހާލަތު ވަރަށް ބޮޑަށް ގޯސްވަމުންދާ ކަމަށާއި މިހާރުން މިހާރަށް އެމީހުން ހަވާލުކުރުމަށް އީރާނުން އިންޒާރުދީފި

ގަތަރުގައި ހައްޔަރުކޮށްފައި ތިބި އީރާނުގެ ޕައިލެޓުންގެ ސިއްހީ ހާލަތު ވަރަށް ބޮޑަށް ގޯސްވަމުންދާ ކަމަށް ބުނެ، އެ ގައުމުގެ އަސްކަރިއްޔާއިން އިންޒާރު ދީފި އެވެ. އީރާނުގެ އާމްޑް ފޯސަސް ޖެނެރަލް ސްޓާފްގެ މިސިން-އިން-އެކްޝަން ސާޗް ކޮމިޓީގެ އިސްވެރިޔާ ވަނީ، އެ ޕައިލެޓުން ވަގުތުން އެނބުރި ގައުމަށް ގެނައުމަށް ގޮވާލައްވައި، އެ މީހުން އީރާނަށް ބަދަލުކުރުމަށްޓަކައި އެއަރ އެމްބިއުލާންސެއް ފޮނުވައިދިނުމަށް އިންޓަނޭޝަނަލް ކޮމިޓީ އޮފް ދަ ރެޑް ކްރޮސް (އައި.ސީ.އާރް.ސީ) ގައި އެދިފަ އެވެ.

ހޮނިހިރު ދުވަހު ބްރިގޭޑިއާ ޖެނެރަލް މުހައްމަދު ބާގިރްޒާދާ ދެއްވި އިންޒާރުގައި ވިދާޅުވީ، ކަނޑުމަތީގައި ހުރި ތަނެއްގައި އެ ޕައިލެޓުން ބަންދުކޮށްފައި ތިބުމުގެ ސަބަބުން، އެ މީހުންގެ ސިއްހީ ހާލަތު ދެމެހެއްޓުމަށް އެކަށީގެންވާ މާހައުލެއް އެތަނުގައި ނެތް ކަމަށެވެ.

ހައްޔަރުގައި ތިބި އީރާނުގެ މީހުން ވީ އެންމެ އަވަހަކަށް އެއްގަމަށް ބަދަލުކޮށް، ފުރިހަމަ ވަސީލަތްތައް ހުރި ހޮސްޕިޓަލަކުން ފަރުވާ ލިބޭނެ އިންތިޒާމު ގަތަރުން ހަމަޖައްސަންޖެހޭނެ ކަމަށްވެސް އޭނާ ވިދާޅުވި އެވެ.

އީރާނުގެ މާހިރުންގެ ޓީމަކަށް މަރުހަބާ ކިޔުމަށް ގަތަރުން ނިންމި ނިންމުމަށް ބާގިރްޒާދާ މަރުހަބާ ވިދާޅުވި އެވެ. އަދި ހައްޔަރުގައި ތިބި މީހުންގެ ހާލަތު ރަނގަޅު ކުރުމަށް ކުރެވޭ މަސައްކަތްތައް އަވަސްކުރުމަށް ދޯހާއިން އެއްބާރުލުން ދިނުމަށް އޭނާ ބާރުއެޅުއްވި އެވެ.

މާރިޗު މަހުގެ 16 ވަނަ ދުވަހު އައި.ސީ.އާރް.ސީގެ ރައީސާ މިރްޔާނާ ސްޕޮލްޔަރިކަށް ފޮނުއްވި ސިޓީއެއްގައި، ބާގިރްޒާދާ ވަނީ އެ ޕައިލެޓުންނަށް ވީގޮތް ތަހުގީގުކޮށް، އެ މީހުންނާ ސީދާ ގުޅުން ގާއިމުކުރުމަށް އެ ޖަމިއްޔާއަށް މީގެ ކުރިންވެސް ގޮވާލައްވާފަ އެވެ.

އޭނާ ވަނީ ހައްޔަރުގައި ތިބި ތިން ޕައިލެޓުންނަކީ ޖަވާދު ސާލިހީ އާއި، އަބްދުލްމަޖީދު ދަޝްތިއާން އަދި އިމްރާން ބެހްރޫޒިއާން ކަން ހާމަކުރައްވާފަ އެވެ. އަދި މި ހާދިސާގައި ހިމެނޭ ހަތަރުވަނަ ޕައިލެޓް މަޖީދު ކާޒިމީ މަރުވެފައިވާ ކަމަށާއި، އޭނާގެ ހަށިގަނޑު މިހާރު އީރާނަށް ގެންގޮސްފައިވާ ކަމަށްވެސް ކަށަވަރުކޮށްދެއްވި އެވެ.

"ގަތަރުގައި ހައްޔަރުކޮށްފައި ތިބި އީރާނުގެ ޕައިލެޓުންގެ ހާލަތާ މެދު އާމްޑް ފޯސަސް ޖެނެރަލް ސްޓާފްގެ މިސިން-އިން-އެކްޝަން ސާޗް ކޮމިޓީން އިންތިހާއަށް ކަންބޮޑުވޭ،" ބާގިރްޒާދާ ލިޔުއްވާފައިވެ އެވެ. އަދި އައި.ސީ.އާރް.ސީން ވަގުތުން އެ މީހުންނާ އިންޓަވިއުކޮށް، އެ މީހުންގެ ސިއްހީ ހާލަތާއި ތިބި ތަނުގެ މައުލޫމާތު ތެހެރާނަށް އެންގުމަށް އޭނާ އެދިވަޑައިގެންނެވި އެވެ.

ހޯމަ ދުވަހު އީރާނުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ ވިދާޅުވީ، ޕައިލެޓުންނަށް ވީގޮތް ބެލުމަށްޓަކައި ޑިޕްލޮމެޓިކް އަދި އިންސާނީ ހުރިހާ ވަސީލަތްތަކެއް ތެހެރާނުން ބޭނުންކުރަމުންދާ ކަމަށެވެ. އަދި މި މައްސަލައިގެ ކުރީކޮޅުން ފެށިގެން އީރާނު އެމްބަސީން މިކަން ބަލަމުންދާކަން އޭނާ ފާހަގަކުރެއްވި އެވެ.

"އެ މީހުންގެ ހާލަތު ސާފުނުވާހާ ހިނދަކު ބެލެވޭނީ އެ މީހުން ތިބީ ހައްޔަރުގައި ކަމަށް. ޕައިލެޓުންގެ ހާލަތު ދެނެގަތުމަށް ލިބެން ހުރި ހުރިހާ ގާބިލުކަމެއްގެ ބޭނުން އަޅުގަނޑުމެން މިދަނީ ކުރަމުން،" ބަޣާއީ ވިދާޅުވި އެވެ.

މި މައްސަލައަކީ މާރިޗު މަހުގެ 2 ވަނަ ދުވަހު، އެމެރިކާ އާއި އިސްރާއީލުން އީރާނާ ދެކޮޅަށް ހިންގި އުދުވާނުގެ ތެރޭގައި، އީރާނުގެ އެއަރ ފޯސްގެ ދެ އެސް.ޔޫ-24 މަތިންދާބޯޓުން ގަތަރުގައި ހުންނަ އަލް-އުދައިދު އެއަރ ބޭސްއަށް ދިން ހަމަލާއަކާ ގުޅިގެން ހިނގާފައިވާ ކަމެކެވެ.

'ހަނގުރާމައިގެ އަސީރުންގެ ހައްގުތަކަށް ކުވެއިތުން އިހުތިރާމް ކުރަންޖެހޭ'

ކުވެއިތުގައި ހައްޔަރުކޮށްފައި ތިބި އީރާނުގެ ހަތަރު މީހުންނާ ބައްދަލުކުރުމުގެ ހުއްދަ، އެ ގައުމުގައި ހުންނަވާ އީރާނުގެ ސަފީރަށް ދިނުމަށް ކުވެއިތު ސަރުކާރުން ފުރަތަމަ އެއްބަސްވި އެއްބަސްވުމަށްވެސް ބާގިރްޒާދާ އަލިއަޅުއްވާލެއްވި އެވެ.

"މިއީ މި ފަރާތްތައް އަވަހަށް މިނިވަންވާނެ ކަމުގެ އުންމީދެއް ލިބިގެންދިޔަ ކަމެއް،" ބާގިރްޒާދާ ވިދާޅުވި އެވެ.

ޖެނީވާގެ ހަތަރު މުއާހަދާގެ ދަށުން ހަނގުރާމައިގެ އަސީރުންނަށް ލިބިދޭ ހައްގުތަކަށް ކުވެއިތުން އިހުތިރާމް ކުރަންޖެހޭނެ ކަމަށާއި، ހައްޔަރުގައި ތިބި މީހުންނާއި އެ މީހުންގެ އާއިލާތަކާ ދެމެދު މުއާމަލާތް ކުރެވޭނެ މަގު ފަހިކޮށްދޭންޖެހޭނެ ކަމަށް އޭނާ ވިދާޅުވި އެވެ.

ގުއަންޓަނާމޯ ބޭގައި ހައްޔަރުކޮށްފައި ތިބި މީހުންނާއި އެ މީހުންގެ އާއިލާތަކާ ދެމެދު ވީޑިއޯ ކޯލް މެދުވެރިކޮށް ވާހަކަދެއްކޭނެ އިންތިޒާމު ހަމަޖެއްސުމަށް އައި.ސީ.އާރް.ސީން ކުރާ މަސައްކަތްތަކަށް އިޝާރާތް ކުރައްވައި، އީރާނުގެ އަސީރުން މިނިވަންކުރުމަށް މަސައްކަތް ކުރުމަށާއި، އެ މީހުންގެ އާއިލާތަކާ ވީޑިއޯ މެދުވެރިކޮށް ވާހަކަދެއްކޭނެ މަގު ފަހިކޮށްދިނުމަށް އޭނާ އެދިވަޑައިގަ ތެވެ.

މީގެ އިތުރުން، އަރަބި ގައުމުތަކަށް ކަނޑައަޅާފައިވާ އައި.ސީ.އާރް.ސީގެ އޮފީހުން މިކަމުގައި އިސްނަގައި، އީރާނުގެ އަސީރުންގެ ހާލަތު ބަލައި، އެ މީހުންނާއި އާއިލާތަކާ ދެމެދު ގުޅުން ގާއިމުކުރުމަށް ބޭނުންވާ ފިޔަވަޅުތައް އެޅުމަށްވެސް ކޮމާންޑަރު ބާގިރްޒާދާ ގޮވާލެއްވި އެވެ.