އެންސްޕާއިން މިލިއަނުން ފައިސާ ނަގައިގެން ހެދި ޓީވީއެއްގައި ކޮރަޕްޝަންގެ ވާހަކަ ދެއްކުން އެހައި ރަނގަޅެއް ނޫން: ރައީސް އިބޫ
ރައީސް މުއިއްޒާއި، ވަޒީރުންނަށް މާލީ ބަޔާން ހާމަކުރައްވަން ކެރިވަޑައިނުގަންނަވާނެ
ރައީސް ޑރ.މުހައްމަދު މުއިއްޒު ހުވާ ކުރުމުގެ ދަރުބާރުގައި ކުރީގެ ރައީސް އިބްރާހިމް މުހައްމަދު ސާލިހާއި ސަލާމްކުރައްވަނީ
ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)އިން މިލިއަނުން ފައިސާ ނަގައިގެން ހެދި ޓީވީއެއްގައި ކޮރަޕްޝަންގެ ވާހަކަ ދެއްކުން އެހައި ރަނގަޅު ނޫން ކަމަށް ކުރީގެ ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.
ބުރާސްފަތި ދުވަހު ފަށާއިރު ޕްރޮގްރާމްގައި ވާހަކަފުޅު ދައްކަވަމުން ރައީސް އިބޫ ވިދާޅުވީ ކޮރަޕްޝަނާއި، ހިޔާނާތުގެ ވާހަކަތައް ދައްކަމުންދާއިރު، އެންމެ ފުރަތަމަ ފްރަންޓަށް ނުކުމެ، މާލީ ބަޔާންތައް ހާމަކުރަންވީ ސަރުކާރުގެ މަތިފަޑީގެ ބޭފުޅުންގެ ކަމަށެވެ.
ނަމަވެސް ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި، ކެބިނެޓުގެ ވަޒީރުންނަށް އެމައުލޫމާތުތައް ހާމަކުރައްވަން ކެރިވަޑައިނުގަންނަވާނެ ކަމަށް ރައީސް އިބޫ ވިދާޅުވިއެވެ.
މީގެ އިތުރުން ރައީސް އިބޫ ވަނީ މިސަރުކާރުގެ ކޮރަޕްޝަންގެ މައްސަލަތަކަށް އިޝާރާތް ކުރައްވައި ވާހަކަފުޅު ދައްކަވާފައެވެ. އެގޮތުން އެންސްޕާ ހިޔާނާތް، 55 ކައުންސިލެއް އިމާރާތް ކުރުމަށް ހިންގި ހިޔާނަތް ރައީސް އިބޫ ފާހަގަކުރެއްވިއެވެ.
ރައީސް އިބޫ ވިދާޅުވީ އެންސްޕާއިން ވެސް މިލިއަނުން ހަރަދުކޮށް، ޓީވީއެއް ހަދާފައިވާ ކަމަށާއި، އެޓީވީގައި ކޮރަޕްޝަންގެ ވާހަކަ ދެއްކުން ރަނގަޅު ނޫން ކަމަށެވެ. އަދި މިސަރުކާރުން 55 ކައުންސިލް އިމާރާތް ކުރުމަށް 600 މިލިއަން ރުފިޔާއަށް ބިޑް ކުރުމަކާ ނުލައި ބަޔަކާ ހަވާލުކޮށްފައިވާ ކަމަށެވެ.
މިދިޔަ ދައުރުގައި ވެސް ކައުންސިލްތަކުގެ އިމާރާތްތައް އަޅާފައިވާކަން ފާހަގަކުރައްވައި ރައީސް އިބޫ ވިދާޅުވީ އެންމެ ގިނަވެގެން ވެސް ހަރަދުވެފައިވަނީ 5 ނުވަތަ 6 މިލިއަން ރުފިޔާ ކަމަށެވެ.
މިސާލަކަށް ވައްކަމުގެ ވާހަކަ ދައްކަން އެންސްޕާއިން 36 މިލިއަން ރުފިޔާ ނަގައިގެން ޓީވީއެއް ހަދައިގެން އޭގައި ތިބެގެން އެވާހަކަ ދެއްކީމަ ރަނގަޅެއް ނޫނެއްނުންތޯ. ރަނގަޅުތޯ އެވާހަކަ. މިއީ ކަންތައްތައް ހުރި ވަރަކީ އެނގޭތޯ. އަޅުގަނޑު މިއީ 1990ގެ ތެރޭގައި ފަސްޓް ޑިވިޝަންގެ ކުލަބެއް ހިންގަން އުޅުނު މީހެއް. ވަރަށް ކުރި. އޭރު ވެސް އަހަރެއްގެ މައްޗަށް 4 މިލިއަން 5 މިލިއަން ރުފިޔާ ކްލަބެއް ހިންގަން ހަރަދުވޭ. އަޅުގަނޑަށް އިހަށްދުވަހު މީގެ ދެދުވަސްކުރިން ނޫހަކުން މިފެނުނީ ރައީސް މުއިއްޒުގެ މަސްލަހަތު އޮންނަ އާއިލީ ކުންފުންޏަކުން ރާއްޖޭގެ ފަސްޓް ޑިވިޝަންގެ 4 ކްލަބު ސްޕޮންސަރ ކުރެއްވި ވާހަކަ. މިދަންނަވާހެން 6 މިލިއަންނާއި 10 މިލިއަންނާ ދޭތެރޭގައި އެއިން ކޮންމެ ކްލަބަކަށް ހަރަދުވާނެ. 28 އަކަށް 30 އަކަށް މިލިއަން ރުފިޔާ ހަރަދު ކުރައްވާ ވާހަކަ. ކިހިނެތްތޯ ބުއްދި ގަބޫލުކުރާނީ. މިއީ އަނެއްކާ ސައި ހޮޓަލަކުން ކަމަށްވަނީ. ފުރަތަމަ ފަށައިގެންއިރުގައި ޑްރޯންތަކެއް ގަތް ވާހަކަ. އޭރު ވިދާޅުވި ދައުލަތުގައި ލާރިއެއް ނެތޭ. ސަރުކާރުގައި ލާރިއެއް ނެތޭ. އެކަމާ ވެސް ވަރަށް ގިނަ ތުހުމަތުތައް ކުރި. ބަލަންޖެހިފައި ހުރިކަންތައް އެއީ.ކުރީގެ ރައީސް އިބްރާހިމް މުހައްމަދު ސާލިހު
ރައީސް އިބޫ ވިދާޅުވީ މި ސަރުކާރުގެ ކޮރަޕްޝަނާއި، ހިޔާނާތް ލިސްޓު ކުރަން ވެއްޖެނަމަ ބައިވަރު ކަންކަން ފާހަގަކުރެވޭނެ ކަމަށެވެ.
ކޮރަޕްޝަން ހުއްޓުވުމަށް މިނިވަން މުއައްސަސާތައް ކޮޅަށް ތެދުވަން ޖެހޭ ކަމަށާއި، އޭސީސީން މިނިވަންކަމާއެކު މިމައްސަލަތައް ތަހުގީގު ކުރަންޖެހޭ ކަމަށެވެ. އަދި އޮޑިޓަރ ޖެނަރަލް ހަށިފޮޅާލާފައި ނުކުމެ މިކަންތައްތައް ބެލުމަށް ރައީސް އިބޫ ގޮވާލެއްވިއެވެ.
