ޤުރްއާން މަތިވެރިކުރާނަމަ، ޤުރްއާނުގަ ވާގޮތަށް ވެރިކަން ކުރައްވަން ޝެއިޚް އިލްޔާސް ޖަމާލު ރައީސް މުހައްމަދު މުއިއްޒު އަށް ގޮވާލައްވައިފިއެވެ.

ގުރުއާން ކިޔެވުމުގެ ގައުމީ މުބާރާތަކީ ރާއްޖޭގައި ބާއްވާ އެންމެ އަގު ބޮޑު އަދި އެންމެ ގިނަ އިނާމު ދެވޭ މުބާރާތް ކަމުގައި ހައްދަވާނެ ކަމަށް މިދިޔަ އަހަރު ވިދާޅުވެފައިވާނެ ކަމަށް ވިދާޅުވެ ސެޕްޓެމްބަރު 30 ވަނަ ދުވަހު އެވާހަކަ އަނެއްކާ ވެސް ތަކުރާރު ކުރައްވާ ރައީސް މުއިއްޒު ކުއްލި ގޮތަކަށް ކުރެއްވި ޕޯސްޓަކަށް ރައްދު ދެއްވަމުން އިލްޔާސް ވިދާޅުވީ، "އަނެއްކާވެސް މޮޅުގޮތަކަށް ދީން ވިއްކާލައިފި،" ކަމަށެވެ.

މުއިއްޒު ވިދާޅުވީ، "މިއަހަރުން ފެށިގެން، ޤުރުއާން ކިޔެވުމުގެ ޤައުމީ މުބާރާތުގައި ނުބަލާ ކިޔެވުމުގެ ބައިން މުޅި މުބާރާތުން 1 ވަނަ، ބަލައިގެން ކިޔެވުމުގެ ބައިން މުޅި މުބާރާތުން 1 ވަނަ، އަދި ޙާފިޡުންގެ ބައިން މުޅި މުބާރާތުން 1 ވަނަ ހޯދާ ފަރާތްތަކަށް އެ ފަރާތަކުން ތަޢުލީމް ޙާސިލްކުރަން ބޭނުން ދާއިރާ އަކުން ޕީއެޗްޑީ އާ ހަމަޔަށް އެފަރާތަކުން ބޭނުން ޤައުމަކުން ތަޢުލީމް ޙާސިލް ކުރުމަށް ރައީސުލްޖުމްހޫރިއްޔާގެ ޚާއްޞަ ސްކޮލަރޝިޕް ދިނުމަށް ވާނީ ނިންމާފައި،" ވާ ކަމުގައެވެ.

އިސްލާމިކް މިނިސްޓްރީގެ ކުރީގެ ސްޓޭޓް މިނިސްޓަރ އިލްޔާސް ވިދާޅުވީ، ޤުރްއާނާ ޚިލާފަށް ވެރިކަން ކުރަމުން ތިގޮތަށް ދީން ވިއްކީމާ،" އެންމެން އާޝޯޚު ނުވާނެ ކަމުގައެވެ.

އިލްޔާސް ފާހަގަ ކުރެއްވި ގޮތުގައި ޤުރްއާނުގައި ވާ ގޮތައް، ދޮގުނުހަދާ ނަމަ، އިސްރާފު ނުކުރާނަމަ، ދައުލަތުގެ މުދަލަށް ރައްކާތެރިވާ ނަމަ، ހުރިހާ ދިވެހިންނަށް ސްކޮލަރޝިޕް ލިބޭނެ ކަމަށާއި، ދިވެހިންނަށް ވުރެ މުއްސަނދި ބަޔަކު މި ދުނިޔޭގަ ނޫޅޭނެ ކަމަށެވެ.