ކޮންގްރެސް އަށް ބަޖެޓު ފާސް ނުކުރެވި، އެމެރިކާ ސަރުކާރު ހުއްޓުމަކަށް

އެމެރިކާގެ ކޮންގްރެސް އަށް ބަޖެޓު ފާސް ނުކުރެވި، އެ ޤައުމުގެ ސަރުކާރުގެ މަސައްކަތްތައް ހުއްްޓުމަކަށް އަތުވެއްޖެ އެވެ.

އެމެރިކާގެ ސަރުކާރުގެ ބައެއް ޚިދުމަތްތައް ހުއްޓުމަކަށް އައިސްފައި ވަނީ، ބުދަ ދުވަހު ބަޖެޓު ފާސް ކުރުމަށް އޮތް ސުން ގަޑި ހަމަވީއިރު ވެސް ބަޖެޓު ފާސް ނުކުރެވުމުގެ ސަބަބުންނެވެ. މި ގޮތަށް ދިމާވެފައި ވަނީ ކޮންގްރެސްގައި ހިނގި ބަޖެޓާ ގުޅޭ މަޝްވަރާ ތަކުގައި ޑިމޮކްރަޓިކް ޕާޓީ އިން ޞިއްޙީ ޚިދުމަތްތަކަށް އިތުރު ފައިސާ ހޯދުމަށް ކުރި މަަސައްކަތާ ގުޅިގެންނެވެ.

މިއީ ގާތް ގަނޑަކަށް މީގެ ހަތް އަހަރު ކުރިން، އެމެރިކާގެ ތާރީޚުގައި އެންމެ ދިގު މުއްދަތަކަށް ސަރުކާރު ހުއްޓުނު ހާދިސާ އަށް ފަހު، މި ފަދަ ކަމެއް ދިމާވި ފުރަތަމަ ފަހަރެވެ. އެފަަހަރު އެމެރިކާ ސަރުކާރުގެ ޚިދުމަތްތައް ހުއްޓިފައި އޮތީ 35 ދުވަހުގެ މުއްދަތަކަށެވެ. އެމެރިކާގެ ސަރުކާރު ހުއްޓުމަށް ކުރިމަތިވި ކަންތައްތަކުގެ ސަބަބުން، ގިނަ އިދާރާތަކެއްގެ މަސައްކަތް ހުއްޓި، ސަތޭހަ ހާހަށް ވުރެ ގިނަ މުވައްޒަފުންނަށް އޭގެ އަސަރު ކުރާނެ އެވެ.

އެމެރިކާގެ ރައީސް ޑޮނަލްޑް ޓްރަމްޕް ވަނީ، ސަރުކާރު ހުއްޓުމަށް ކުރިމަތިވި ޙާލަތުގެ ޒިންމާ ޑިމޮކްރަޓިކް ޕާޓީ އިން ނަގަން ޖެހޭނެ ކަމަށް ވިދާޅުވެ، އެކަން އެ ޕާޓީގެ ބޮލުގައި އަޅުވައިފަ އެވެ. މި ހުއްޓުމުގެ ތެރޭގައި ޑިމޮކްރަޓިކް ޕާޓީ އިން އިސްކަން ދޭ ކަންތައްތަކަށް އަމާޒުކޮށް، ސަރުކާރުގެ ވަޒީފާ ތަކުން މުވައްޒަފުނ ދުރު ކުރުމަށް މަސައްކަތް ކުރާނެ ކަމަށް ވެސް ވަނީ ހާމަކޮށްފަ އެވެ.

އެމެރިކާގެ ސެނެޓުގައި ބަޖެޓު ފާސް ކުރުމަށް ބޭނުން ވަނީ 60 މެމްބަރުންގެ ވޯޓެވެ. ނަމަވެސް، ރިބަޕްލިކަން ޕާޓީ އަށް ލިބިފައި ވަނީ 53 މެމްބަރުންގެ ވޯޓެވެ. ޓްރަމްޕް ނިސްބަތްވެ ވަޑައިގަންނަވާ ރިޕަބްލިކަން ޕާޓީ އިން ހުށަހަޅާފައި އޮތީ ނޮވެމްބަރު މަހާ ހަމަ އަށް ބަޖެޓު އިތުރުކޮށް، އޭގެ ފަހުން ދިގު މުއްދަތުގެ ބަޖެޓަކަށް އެއްބަސްވުމަށެވެ.

އެހެން ނަމަވެސް، ޑިމޮކްރަޓުން ބޭނުން ވަނީ އޮބަމާކެއާގެ ދަށުން ދެވޭ ޞިއްޙީ އިންޝުއަރެންސް ޕްރޮގްރާމް އަށް ސަތޭކަ ބިލިއަން ޑޮލަރުގެ އިތުރު ފަންޑިން ހޯދުމަށެވެ. އެކި އެކި މަސްދަރުތަކުން ބުނެފައިވާ ގޮތުގައި، ޓްރަމްޕްގެ ސަރުކާރުން ރާވާފައި އޮތީ އެ ޕްރޮގްރާމް އުވާލުމަށެވެ.

ބަޖެޓު ފާސް ނުކުރެވި އެމެރިކާގެ ސަރުކާރު ހުއްޓުމަކަށް އައި ނަމަވެސް، މި ހުއްޓުވުމުގެ ސަބަބުން ޕޯސްޓަލް ސާވިސް، މިލިޓަރީ އަދި ސޯޝަލް ސެކިއުރިޓީ ފަދަ މުހިންމު ޚިދުމަތްތަކަށް އަސަރެއް ނުކުރާނެ އެވެ. ނަމަވެސް ކޮންގްރެޝަނަލް ބަޖެޓު އޮފީހުގެ އަންދާޒާގައި، ގާތްގަނޑަކަށް 750،000 މުވައްޒަފުން ކޮންމެ ދުވަހަކު ގެއަށް ފޮނުވާލަން ޖެހިދާނެ ކަަމާއި، ހުއްޓުން ނިމެންދެން މުވައްޒަފުންގެ މުސާރަ ނުލިބޭނެ ކަމަށް ބުނެފައިވެ އެވެ.

އެމެރިކާގެ ސަރުކާރަށް އައި މި ހުއްޓުން ކިހާ ދުވަހަކަށް ދެމިގެން ދާނެކަން މިވަގުތު ސާފެއް ނުވެ އެވެ. ބައިޕާޓިސަން ޕޮލިސީ ސެންޓަރުގެ މައުލޫމާތު ތަކަށް ބަލާއިރު، 1980 ވަނަ އަހަރުން ފެށިގެން 14 ފަހަރެއްގެ މަތިން ސަރުކާރުގެ ހިންގުން ހުއްޓިފައިވެ އެވެ. އޭގެ ތެރެއިން ގިނަ ފަހަރު ސަރުކާރު ހުއްޓުމަކަށް އައިސްފައި ވަނީ ވަރަށް މަދު ދުވަސް ކޮޅަކަށެވެ.

އެމެރިކާގެ ތާރީޚުގައި އެންމެ ދިގު މުއްދަތަކަށް ސަރުކާރު ހުއްޓުމަކަަށް އައިސްފައި ވަނީ، 2018 ވަނަ އަހަރުގެ ފަހު ކޮޅާއި، 2019 ވަނަ އަހަރުގެ ކުރީ ކޮޅު އެވެ. އެއީ ގާތް ގަނޑަކަށް 34 ދުވަހުގެ މުއްދަތަކަށެވެ.