މިހާރު އިންޑިއާގެ އެރައިވަލް ކާޑު 72 ގަޑިއިރު ކުރިން އޮންލައިން ކޮށް ހުށަހެޅޭނެ
އިންޑިއާއަށް ދަތުރުކުރާ ފަރާތްތަކަށް 1 އޮކްޓޯބަރު 2025 އިން ފެށިގެން އެރައިވަލް ކާޑު އޮންލައިންކޮށް ފުރިހަމަކުރެވޭނެ
އިންޑިއާގެ ކޮޗިން އިންޓަރނޭޝަނަލް އެއާރޕޯޓް: ބޭސްފަރުވާގެ ކަންކަމުގައި އެތައް ހާސް ދިވެހިންނެއް ކޮންމެ މަހަކު ކޮޗިން އަށް ދަތުރުކުރޭ
އިންޑިއާގެ އިމިގްރޭޝަނުން ގެނައި އައު ބަދަލަކާއެކު، 1 އޮކްޓޯބަރު 2025 އިން ފެށިގެން އެ ގައުމަށް ދަތުރުކުރާ ފަރާތްތަކަށް ފަސޭހަ ނިޒާމެއް ތަޢާރަފުކޮށްފިއެވެ.
މި ބަދަލާއެކު "އިންޑިއަން ޑިޖިޓަލް އެރައިވަލް ކާޑު" އެ ގައުމަށް ދަތުރުކުރުމުގެ 72 ގަޑިއިރު ކުރިން އޮންލައިންކޮށް ފުރައި ހުށަހެޅޭނެއެވެ.
އިންޑިއާގެ އިމިގްރޭޝަންގެ ރަސްމީ ވެބްސައިޓް މެދުވެރިކޮށް ފުރަންޖެހޭ މި އީ-އެރައިވަލް ކާޑަކީ، އެ ގައުމަށް ވަދެ ނިކުމެވާ ފަރާތްތަކަށް ލިބިގެންދާނެ ބޮޑު ލުޔެކެވެ. މީގެ ކުރިން އޮންނަނީ އިންޑިއާއަށް އެތެރެވުމަށްފަހު، އެރައިވަލް ކާޑު އިމިގްރޭޝަން ކައުންޓަރާ ހަވާލުކުރަންޖެހޭ ގޮތަށެވެ.
އިންޑިއާގެ އިމިގްރޭޝަނުން މަޢުލޫމާތު ދެއްވާފައިވާ ގޮތުގައި، މި އައު ނިޒާމުގެ ސަބަބުން އިމިގްރޭޝަން ކައުންޓަރުތަކުގައި ހޭދަވާ ވަގުތު މަދުވެ، ފަސިންޖަރުންނަށް ލިބޭ ޚިދުމަތް އިތުރަށް ހަލުވިވެގެންދާނެއެވެ. ޚާއްޞަކޮށް ބޭސްފަރުވާއަށް އިންޑިއާއަށް ދަތުރުކުރާ ގިނަ އަދަދެއްގެ ދިވެހިންނަށް މީގެ ފައިދާ ކުރާނެއެވެ.
އިންޑިއާގެ އިމިގްރޭޝަނުން އިތުރަށް ހާމަކުރެއްވި ގޮތުގައި، އެ ގައުމަށް މަސައްކަތްކުރަން ދާ މީހުންނާއި، ޓޫރިސްޓުންނާއި، ކިޔަވަން ދާ ދަރިވަރުންނާއި، ވިޔަފާރީގެ ބޭނުމަށް ދަތުރުކުރާ އެންމެހާ ފަރާތްތަކުން މި ޑިޖިޓަލް ކާޑު ފުރިހަމަކުރަންވާނެއެވެ. މި ބަދަލަކީ އިންޑިއާގެ އިމިގްރޭޝަން ނިޒާމު ޒަމާނީކޮށް، ޑިޖިޓަލް ޓެކްނޮލޮޖީގެ ބޭނުން އިތުރަށް ހިފުމަށް އަޅާފައިވާ މުހިންމު ފިޔަވަޅެކެވެ.
