ހަތަރު މަސާޖު ޕާލާ އެއް ބަންދުކޮށް، ބިދޭސީންތަކެއް އިމިގްރޭޝަންގެ ބެލުމުގެ ދަށަށް ގެންގޮސްފި
10 ޑިސެމްބަރު 2025 | ބުދަ 06:29މަސާޖު ޕާލަރުން 4 މީހަކު އިމިގްރޭޝަންގެ ބެލުމުގެ ދަށަށް ގެނެސްފައިވޭ
ގަވާއިދާ ހިލާފަށް ހިންގަމުން ދިޔަ މަސާޖު ޕާލަރެއް ބަލާ ފާސް ކުރުމުގެ މަސައްކަތް އިމިގްރޭޝަން އޮފިސަރުން ކުރަނީ
ގަވައިދާ ހިލާފަށް ހިންގަމުން ދިޔަ ހަތަރު މަސާޖު ޕާލާއެއް ބަންދުކޮށް 4 ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފި އެވެ.
ބުދަ ދުވަހު އިމިގްރޭޝަނުން ބުނީ، ގަވައިދާ ޚިލާފަށް ބިދޭސީން ވިޔަފާރިކުރާ ތަންތަން ދެނެގަނެ، އެ ތަންތަން ބަލައިފާސްކުރުމަށް، ޓާސްކްފޯސް އިން ހިންގަމުންދާ އޮޕަރޭޝަންގައި އަންގާރަ ދުވަހުގެ ރޭ މާލޭގައި ހިންގަމުން ދިޔަ ހަތަރު މަސާޖު ޕާލަރެއް ބަލައި ފާސް ކޮށްފައިވާ ކަމަށެވެ. އަދި ގަވާއިދާ ހިލާފަށް އުޅެމުންދިޔަ ހަތަރު ބިދޭސީއަކު އިމިގްރޭޝަންގެ ބެލުމުގެ ދަށަށް ގެނެސްފައިވާ ކަމަށެވެ.
އިމިގްރޭޝަނުން ބުނީ، މި ހަތަރު ތަނުގައި ހިންގަމުން ދިޔަ ވިޔަފާރި ނޯޓިސްއާއެކު ހުއްޓުވުމުގެ ފިޔަވަޅުތައް މިނިސްޓްރީ އޮފް އެކޮނޮމިކް ޑިވެލޮޕްމަންޓް އެންޑް ޓްރޭޑް އިން އަޅާފައިވާ ކަމަށެވެ.
މީގެ އިތުރުން އިމިގްރޭޝަނުން ބުނީ، އަންގާރަ ދުވަހުގެ ރޭ މާލޭގެ ވެސް 11 ތަނެއް ބަލައި ފާސް ކޮށްފައިވާ ކަމަށެވެ. އަދި މި އޮޕަރޭޝަންގައި ގަވާއިދާ ޚިލާފަށް އުޅެމުންދިޔަ ބިދޭސީއަކު އިމިގްރޭޝަންގެ ބެލުމުގެ ދަށަށް ގެނެސްފައިވާ ކަމަށެވެ.
ގަވައިދާ ޚިލާފަށް ބިދޭސީން ވިޔަފާރިކުރާ ތަންތަން ދެނެގަނެ، އެ ތަންތަން ބަލައިފާސް ކުރުމުގެ ޚާއްސަ އޮޕަރޭޝަނެއް ކަމާގުޅޭ އިދާރާތަކާ ގުޅިގެން އިމިގްރޭޝަނުން ކުރިއަށް ގެންދެ އެވެ. އަދި ގަވާއިދާ ހިލާފަށް ދިރިއުޅޭ ބިދޭސީން ޑީޕޯޓު ކުރުމުގެ މަސައްކަތް ވެސް ދަނީ ކުރަމުންނެވެ.
