ސަރުކާރުން ގެންގުޅެނީ އަންނަ ރިޔާސީ އިންތިޚާބަށް ފްލެޓްގެ މައްސަލަ ދަންމާލުމުގެ ވިސްނުން: ޔައުގޫބް

ރައީސް ޑރ.މުހައްމަދު މުއިއްޒުގެ ސަރުކާރުން ގެންގުޅެނީ އަންނަ ރިޔާސީ އިންތިޚާބަށް ފްލެޓްގެ މައްސަލަ ދަންމާލުމުގެ ވިސްނުން ކަމުގައި ދާންދޫ ދާއިރާގެ ކުރީގެ މެންބަރު ޔައުގޫބު އަބްދުﷲ ވިދާޅުވެއްޖެއެވެ.

އޭނާ އެފަދައިން ވިދާޅުވީ ރާއްޖެ ޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.

ޔައުގޫބް ވިދާޅުވީ ނިމިދިޔަ ސަރުކާރުގެ ގެދޮރުވެރިޔާ ސިޔާސަތުގެ ދަށުން އަޅާ ފްލެޓްތައް މި ސަރުކާރަށް ނުދެވި އެ މަރުހަލާ ވަރަށް ބޮޑަށް ދިގުލައިގެން ގޮސްފައިވާ ކަމަށެވެ. އެއީ ސަރުކާރު ފެއިލްވުން ކަމަށް ޔައުގޫބް ވަނީ ސިފަކުރައްވާފައެވެ. ރައީސް މުއިއްޒު އަކީ މަކަރާއި ހީލަތުން އުޅުއްވާ ބޭފުޅެއް ކަމަށާއި މުޅި ވެރިކަމުގައި ވެސް ފެންނަނީ އެ މަންޒަރު ކަމަށް ޔައުގޫބް ވަނީ ވިދާޅުވެފައެވެ.

ނިމިދިޔަ ސަރުކާރުން ފްލެޓް ލިބޭ މީހުން ކަނޑައަޅާ އެ މަރުހަލާ ނިންމާފައި ވަނިކޮށް މި ސަރުކާރުން އެ ފްލެޓްތައް ނުދިނުމަކީ ސިޔާސީ ބޭނުމެއްގައި ކުރާކަމެއް ކަމަށް އޭނާ ވަނީ ސިފަކުރައްވާފައެވެ. އަދި އެ މަރުހަލާ ދިގުދެންމުމުގެ ބޭނުމަކީ އާއްމުންނަށް އޮޅުވާލުން ކަމަށް ވެސް އޭނާ ވިދާޅުވިއެވެ.

" މިއީ މަރުހަލާތަކަކަށް ބަހައިގެން ކުރަން ޖެހޭ ކަމެއް ނޫން. ފްލެޓް ލިބުނުކަމުގެ ލިޔުން ހަވާލުކުރުން ޕޯޓަލް އިން އެކަން ކޮށްލުން އެއީ މިނިޓް ކޮޅެއްގެ ކަމެއް. އެ ވަރު ކަމެއް މި ސަރުކާރުން މި ދިގު ދަންމަމުން ދަނީ. އެއީ ސަރުކާރުން ކަންތައް ކުރާ ގޮތަކީ. އެގްރީމެންޓަށް އެހާ ދުވަހެއް. އޭގެ ފަހުގައި ފައިސާ ދައްކަން އެހާ ދުވަހެއް. އޭގެ ފަހުން ތަޅުދަނޑި ހަވާލުކޮށްފައި ވެސް އަދި ވަކި ކިއު އެއް. އެ ހުރިހާ ސަކަރާތެއް ޖަހަމުން ގޮސް މި ވެރިކަން ނިމޭ ދުވަހަށް އެ ތަނަށް ވަދެވޭނީ." ޔައުގޫބް ވިދާޅުވިއެވެ.

ސަރުކާރުން މީގެ ކުރިން ބުނެފައި ވަނީ މި އަހަރުގެ ސެޕްޓެމްބަރު މަސް ނިމުމުގެ ކުރިން 4000 ފްލެޓު ދޫކުރާނެ ކަމަށެވެ. އެގޮތުން ސެޕްޓެމްބަރު މަސް ނިމުމުގެ ކުރިން އެތަންތަނުގައި މީހުންނަށް ދިރިއުޅެވޭނެ ކަމަށް ހައުސިންގ މިނިސްޓަރު ޑރ. އަބްދުﷲ މުއްތަލިބު ވިދާޅުވި ނަމަވެސް އެކަން ކުރެވިފަ އެއް ނުވެއެވެ.

4000 ސޯޝަލް ހައުސިން ޔުނިޓްތައް ހަވާލުކުރުމުގެ މަސައްކަތް ފަހިދިރިއުޅުން ކޯޕަރޭޝަން، އެފްޑީސީން ފަށާފައިވަނީ 28 ސެޕްޓެންބަރު 2025 ގައެވެ. އަމާން އުދަރެސް މަޝްރޫއުގައި ހިމެނޭ 16 ޓަވަރުގެ ތެރެއިން އެންމެ ފުރަތަމަ ތަޅުދަނޑި ހަވާލުކުރަނީ 14 ވަނަ ޓަވަރުގެ ފްލެޓްތަކެވެ.