މޮނާކޯ ދޫކޮށް ޕީއެސްޖީއަށް ބަދަލުވީ އަމިއްލަ ގައުމުގައި ހުރެގެން ކުރިއަރަން ބޭނުންވާތީ ކަމަށް ފްރާންސްގެ ޒުވާން ތަރި ކިލިއަން އެމްބާޕޭ ބުނެފިއެވެ.
މިދިޔަ ސީޒަނުގައި ދެއްކި މޮޅު ކުޅުމާއެކު މުޅީ ދުނިޔޭގެ ނަޒަރު އެމްބާޕޭއަށް ހުއްޓިގެން ދިޔައިރު އޭނާ ހޯދުމަށް ޔޫރަޕުގެ އެންމެ ބޮޑެތި ޓީމުތަކުން މަސައްކަތް ކުރިއެވެ. އެގޮތުން އޭނާ ހޯދުމަށް ރެއާލް މެޑްރިޑާ، މެންޗެސްޓާ ސިޓީއާ އާސެނަލްއިން ވެސް މަސައްކަތް ކުރިއެވެ.
އެހެން ނަމަވެސް މޮނާކޯ ދޫކޮށް އޭނާ ބަދަލުވެފައިވަނީ ޕީއެސްޖީއަށެވެ. އޭނާ ޕީއެސްޖީއަށް ސޮއިކޮށްފައި ވަނީ ލޯނު އެއްބަސްވުމެއްގެ ދަށުންނެވެ. މި ލޯނު އެއްބަސްވުމުގެ މުއްދަތު ހަމަވުމުން ޕީއެސްޖީއިން 180 މިލިއަން ޔޫރޯ މޮނާކޯއަށް ދައްކަން ޖެހެއެވެ.
ޓެލެފުޓްއަށް ދިން އިންޓަވިއުއެއްގައި އެމްބާޕޭ ބުނެފައިވަނީ ދުނިޔޭގައި ތިބި އެންމެ މޮޅު ކުޅުންތެރިން ކުރިޔަށް ދަނީ އަމިއްލަ ގައުމުގައި ތިބެގެން ކަމަށާ ޅައުމުރުގައި އަމިއްލަ ގައުމު ދޫކޮށްލުމަކީ ހެދިދާނެ ގޯހަކަށް ވެދާނެތީ އޭނާ ނިންމީ އަމިއްލަ ގައުމުގައި މަޑުކުރަން ކަމަށެވެ.
ހަމައެހެންމެ އޭނާ ބުނެފައިވަނީ ޕީއެސްޖީއަކީ ދުނިޔޭގެ އެންމެ މޮޅު ޓީމަށް ވުމަށް މަސައްކަތް ކުރަމުން އަންނަ ޓީމެއް ކަމަށާ ޕީއެސްޖީގައި ހުރެގެން ހުރިހާ ތައްޓެއް ކާމިޔާބު ކުރުމަކީ އޭނާގެ އުއްމީދެއް ކަމަށެވެ. އަދި އޭނާ ވަނީ ނޭމާއާއެކު ކުޅެން ފުރުސަތު ލިބުމަކީ ވެސް ޕީއެސްޖީއަށް ބަދަލުވުމަށް ބޭނުންވި ސަބަބެއް ކަމަށް ބުނެފައެވެ. އަދި އޭނާ ވަނީ މޮނާކޯގައި ވޭތުކުރި ދުވަސްތަކަކީ ދުވަހަކުވެސް ހަދާނުން ފިލައިގެން ނުދާނޭ ދުވަސްތަކެއް ކަމަށް ހާމަކޮށްފައެވެ.
އުމުރުން 18 އަހަރުގެ އެމްބަޕޭ ވަނީ މޮނާކޯގައި ހޭދަކުރި ދެ ސީޒަނުގައި ކުޅުނު 60 މެޗުގައި 27 ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ އެޓީމާއެކު މިދިޔަ ސީޒަނުގައި ފްރެންޗް ލީގު ވެސް ކާމިޔާބުކޮށްފައެވެ. އޭނާ ވަނީ މިދިޔަ ސީޒަނުގެ ފްރާންސްގެ އެންމެ މޮޅު ޒުވާން ކުޅުންތެރިޔާގެ މަގާމު ވެސް ހޯދާފައެވެ.
ފްރާންސްގެ ސީނިއާ ޓީމަށް ހަތަރު މެޗު ކުޅެފައިވާ އެމްބަޕޭ ވަނީ ފްރާންސްގެ 19 އަހަރުން ދަށުގެ ޓީމާއެކު މިދިޔަ އަހަރު 19 އަހަރުން ދަށުގެ ޔޫރޯ ފުޓުބޯޅަ މުބާރާތް ވެސް ކާމިޔާބުކޮށްފައެވެ.
