މެޗުން ބަލިވީ މާބޮޑަށް ފަސޭހަ ކޮށްލެވިގެން ކަމަށާއި، ޕްރެމިއާ ލީގަށް ކޮލިފައިވާން ލިބުނު ފުރުސަތު ނަގާލުން މިއީ އަމިއްލައިން ބުއި ބޮނޑިއެއް ކަމަށް ކްލަބް އީގަލްސްގެ ކޯޗް އިހުސާން އަބްދުލް ޣަނީ (ސާންތި) ބުނެފިއެވެ.

އެސްޓީއޯ މާލެ ލީގުގެ ފަހު މެޗުގައި ގްރީން ސްޓްރީޓާއި ދެކޮޅަށް ކުޅުނު މެޗް ކާމިޔާބުކޮށްގެން އީގަލްސްއަށް ޕްރެމިއާ ލީގަށް ކޮލިފައިވުމުގެ ފުރުސަތު އެޓިމަށް އޮތީ ލިބިފައެވެ. ނަމަވެސް އެޓިމަށް ފުރުސަތު ގެއްލުނީ ގްރީން ސްޓްރީޓް އަތުން 1-0 އިން ބަލިވުމުނެވެ.

މެޗަށްފަހު ވާހަކަ ދައްކަމުން ސާންތި ބުނީ، މެޗުގައި ކުޅުންތެރިން ވަރަށް ހިތްވަރު ކުރި ކަމަށާއި ނަމަވެސް ލިބުނު ފުރުސަތުތަކުގެ ބޭނުން އެންމެ ރަނގަޅު ގޮތުގައި ނުހިފުނީ ކަމަށެވެ. އެގޮތުން ޕްރެމިއާ ލީގުގެ ފަހު ޖާގަ ޓީސީއަށް ހައްގު ކަމަށާއި، ފުރުސަތު ހަނިކޮށް އޮތް ނަމަވެސް އެޓީމުން ވަރަށް ރަނގަޅަށް މަސައްކަތް ކުރި ކަމަށް ސާންތި ވަނީ ބުނެފައެވެ.

އިތުރަށް ވާހަކަ ދައްކަމުން ސާންތި ބިނީ، ކުރިމަގާމެދު ވަރަށް އަވަހަށް ގޮތެއް ނިންމާނަން ކަމަށާއި، ނަމަވެސް އީގަލްސް ގައި އިތުރަށް މަޑު ކުރުމަކީ އެންމެ ރަނގަޅު ގޮތް ކަމުގައި ނުދެކެން ކަމަށެވެ. އެގޮތުން ސާންތި ބުނީ، އީގަލްސް ފަދަ ކުލަބަކަށް ބަލާނަމަ މިފަހަރުގެ ސީޒަނުގައި ކުލަބުން ވަރަށް ބޮޑު ހަރަދެއް ކޮށްފި ކަމަށާއި، އޭނާ ބޭނުންވާ ހުރިހާކަމެއް ޓީމުން ފުރިހަމަ ކޮށްދީފައި ވާކަމަށެވެ. ނަމަވެސް އޭގެ ބަދަލުގައި އޭނާ ޒިންމާ އަދާކުރަންޖެހޭ ވަރަށް އަދާކުރެވިފައި ނުވާކަން އޭނާ ގަބޫލުކުރާ ކަމަށްވެސް ސާންތި ބުންޏެވެ.

އީގަލްސް އަށް ޕްރެމިއާ ލީގުން ފުރުސަތު ގެއްލުމުން ދެން އެޓީމަށް ޖެހޭނީ މާލެ ލީގު ޕްލޭއޮފްގައި ކުޅޭށެވެ. އެގޮތުން ޕްލޭއޮފްގައި އީގަލްސްގެ އިތުރުން ދެން ކުޅޭނީ، ވިކްޓްރީ ސްޕޯޓްސް ކުލަބާއި، ވެލެންސިއާ އާއި، ޔުނައިޓެޑް ވިކްޓްރީއެވެ. މީގެ އިތުރުން ސެކަންޑް ޑިވިޝަންގެ އެންމެ ގަދަ ދެޓީމް ކަމަށްވާ ކްލަބް ޒެފްރޯލް އާއި ކުޑަހެންވޭރެވެ.