ސަރުކާރު ހުއްޓިދާނެ ކަމުގެ ބިރާއެކު، ކޮންގްރެސްގެ ލީޑަރުންނާ ޓްރަމްޕް ބައްދަލު ކުރައްވަނީ

އެމެރިކާގެ ސަރުކާރު ހުއްޓުމަކަށް އަތުވެދާނެ ކަމުގެ ބިރު ބޮޑުވެފައިވާ ދަނޑިވަޅެއްގައި، ރިޕަބްލިކަން ޕާޓީ އާއި ޑިކޮމްރަޓިކް ޕާޓީގެ ލީޑަރުންނާ ބައްދަލު ކުރައްވަން، އެމެރިކާގެ ރައީސް ޑޮނަލްޑްް ޓްރަމްޕް ނިންމަވައިފި އެވެ.

މީޑިއާ ތަކުގައި ބުނެފައިވާ ގޮތުން، ހޯމަ ދުވަހުގެ ވަގުތެއްގައި ކޮންގްރެސްގެ ލީޑަރުންނާ ޓްރަމްޕް ބައްދަލު ކުރައްވާނެ އެވެ. ރިޕަބްލިކަން ޕާޓީ އާއި، ޑިމޮކްރަޓިކް ޕާޓީގެ ލީޑަރުންނާ ޓްރަމްޕް ބައްދަލު ކުރައް ވަނީ، ބުދަ ދުވަހުން ފެށިގެން ސަރުކާރުގެ ބައެއް އިދާރާތައް ބަންދުވުމުގެ ބިރު އޮތްް ދަނޑިވަޅެއްގަ އެވެ.

މި ބައްދަލުވުން ބާއްވަން ޓްރަމްޕް ނިންމަވާފައި ވަނީ، ސަރުކާރު ހިންގުމަށް ބޭނުންވާ ފައިސާގެ ބިލާ މެދު، ޑިމޮކްޓަރަޓުންނާއި، ރިޕަބްލިކަނުން ދެބަސްވެފައިވާ ދަނޑިވަޅެއްގަ އެވެ. ނޮވެމްބަރު މަހުގެ 21 ވަނަ ދުވަހާ ހަމައަށް ސަރުކާރު ހިންގުމަށް ރިޕަބްލިކަން އިން ހުށަހެޅު ވަގުތީ ބިލު، މި މަހުގެ ކުރީ ކޮޅު ޑިމޮކްރަޓުން ވަނީ ބޭރު ކޮށްލައިފަ އެވެ.

ޑިމޮކްރަޓުން ބުނާ ގޮތުގައި ސަރުކާރު ހިންގުމަށް ފާސް ކުރާ ބިލުގައި ޞިއްޙީ ޚިދުމަތްތައް ފުޅާ ކުރުމަށް ކަނޑައަޅާ މާއްދާ ތަކެއް ހިމަނަން ޖެހޭނެ އެވެ. އޭގެ ތެރޭގައި ޓްރަމްޕްގެ "ވަން ބިގް ބިއުޓިފުލް ބޮލި" އެކްޓުގެ ދަށުން މެޑިކެއިޑް އުނި ކުރުންތައް އަނބުރާ ރުޖޫއަ ކުރަން ޖެހޭ ކަމަށް ބުނެފައިވެ އެވެ.

އެހެން ނަމަވެސް، އެކަމާ ގުޅިގެން ޓްރަމްޕް ނިސްބަތްވެ ވަޑައިގަންނަވާ ރިޕަބްލިކަނުން ބުނެފައި ވަނީ، ޞިއްޙީ ޚިދުމަތްތަކާ ގުޅޭ ކަންކަން ވަކިން މަޝްވަރާކޮށް، އެކަންކަމަށް ވަކި ބިލެއް ފާސް ކުރަން ޖެހޭ ކަމަށެވެ.

ސެނެޓުގެ ރިޕަބްލިކަން މެޖޯރިޓީ ލީޑަރު ޖޯން ތޫން އެންބީސީ ނިއުސް އަށް ވިދާޅުވެފައި ވަނީ، މިހާރު ސެނެޓުގައި އޮތް ބިލު މިއަދު މިއަދަށް ވެސް ފާސް ކުރެވިދާނެ ކަމަށެވެ. އެހެން ނަމަވެސް، ޑިމޮކްރަޓިކް ޕާޓީގެ މައިނޯރިޓީ ލީޑަރު ޗަކް ޝުމާ ވިދާޅުވެފައި ވަނީ އެ ބައްދަލުވުމަކީ މައްސަލަ ހައްލު ކުރުމުގެ ފުރަތަމަ ފިޔަވަޅު ކަމަށެވެ.

ޝުމާ ވިދާޅުވީ އެ މީހުން ބޭން ވަނީ ސީރިއަސް މަޝްވަރާއެއް ކަމަށެވެ. އެ ބައްދަލުވުމުގައި ރައީސް ޓްރަމްޕް، ޑިމޮކްރަޓުންނާ ދިމާލަށް ހަޅޭ ލަަަވައި، އެ މީހުންނަށް ތުހުމަތު ކުރައްވަން ފައްޓަވައިފި ނަަމަ، އެ މީހުންނަށް އެކަމުގައި އެއްވެސް ކަމެއް ނުކުރެވޭނެ ކަމަށެވެ.

އެމެރިކާގެ ސަރުކާރުގެ ހިންގުން ހުއްޓުމަކަށް އައިސްފި ނަމަ، މިވަގުތު މުވައްޒަފުންނަށް މުސާރަ ނުދެވޭނެ އެވެ. އެހެން ނަމަވެސް، އެކަން ހައްލުވުމާ އެކު ފަހުން އެ މުސާރަ ލިބޭނެ އެވެ. އަދި ކޮންމެެހެން މުހިންމު މުވައްޒަފުން ނޫން އެހެން މުވައްޒަފުން، ވަގުތީ ގޮތުން ވަޒީފާ އިން ދުރު ކުރެވޭނެ އެވެ.

ބައިޕާޓިސަން ޕޮލިސީ ސެންޓަރުގެ މައުލޫމާތު ތަކަށް ބަލާއިރު، 1980 ވަނަ އަހަރުން ފެށިގެން 14 ފަހަރެއްގެ މަތިން ސަރުކާރުގެ ހިންގުން ހުއްޓިފައިވެ އެވެ. އޭގެ ތެރެއިން ގިނަ ފަހަރު ސަރުކާރު ހުއްޓުމަކަށް އައިސްފައި ވަނީ ވަރަށް މަދު ދުވަސް ކޮޅަކަށެވެ.

އެމެރިކާގެ ތާރީޚުގައި އެންމެ ދިގު މުއްދަތަކަށް ސަރުކާރު ހުއްޓުމަކަަށް އައިސްފައި ވަނީ، 2018 ވަނަ އަހަރުގެ ފަހު ކޮޅާއި، 2019 ވަނަ އަހަރުގެ ކުރީ ކޮޅު އެވެ. އެއީ ގާތް ގަނޑަކަށް 34 ދުވަހުގެ މުއްދަތަކަށެވެ.