ގާނޫނު އަސާސީގައި ލިޔެވިފައި އޮތް ނަމަވެސް މިއަދު ދިވެހިރާއްޖޭގައި އޮތީކީ ތިން ބާރު ވަކިވެފައިވާ ނިޒާމެއް ނޫނެވެ. ދިވެހިރާއްޖޭގެ މިއަދުގެ ހަގީގަތަކީ ވެރިކަން ހިންގުމުގެ ބާރާއި އަދުލް އިންސާފު ގާއިމް ކުރުމުގެ ބާރާއި ގާނޫނު ހެދުމުގެ ބާރު އޮތީ ވެސް އެކެއްގެ އަތް މަތީގައި ކަމެވެ.

ރާއްޖޭގެ ހުރިހާ ބާރެއްގެ މިލްކުވެރި ފަރާތަކީ މިއަދު ރައީސުލްޖުމްހޫރިއްޔާ މުހައްމަދު މުއިއްޒެވެ. ވެރިކަން ހިންގަވަނީ ރައީސް މުއިއްޒެވެ. ގާނޫނު ހަދަނީ ވެސް އެމަނިކުފާނެވެ. އިންސާފު ގާއިމް ކުރުމުގެ އެންމެ މަތީ ބާރަކީ ވެސް ރައީސުލްޖުމްހޫރިއްޔާ އެވެ.

ރައްޔިތުންގެ މަޖިލީހުގެ މެންބަރުން ގޮނޑި ގެއްލުވައިލުމުގެ ބާރު ސިޔާސީ ޕާޓީތަކަށް ދިނުމަށް ގާނޫނުއަސާސީއަށް ގެނައި އިސްލާހު ބާތިލް ކުރަން ހުށަހަޅާފައި އޮއްވައި، ސުޕްރީމް ކޯޓު ހުއްޓުވާލައި، ފަނޑިޔާރުންތަކެއް ވަކިކޮށްލި މި ދުވަސް ތާރީހުގައި ލިޔެވޭނީ ކަޅު، އަނދިރި ދުވަހެއްގެ ގޮތުގަ އެވެ.

މެއި 14، 2025، އަކީ ދިވެހިރާއްޖޭގެ ޑިމޮކްރަސީ މަރުވި ދުވަހެވެ. އޭގެ ބަދަލުގައި އުފަންވީ ޑިކްޓޭޓާޝިޕެކެވެ. ބާރުގަދަ ވެރިއެކެވެ. ވެރި މީހާ ދެއްވީމާ މެނުވީ ހައްގުތައް ނުލިބޭ ދުވަސްތައް އަލުން އިއާދަވީ އެވެ. ޑިމޮކްރަސީ ހޯދަން އަނެއްކާ ވެސް ދިވެހިން މަސައްކަތް ކުރަން ޖެހުނީ އެވެ. އެތައް ބައެއްގެ ބުރަ މަސައްކަތުން ހޯދި މިނިވަންކަން ގެއްލިއްޖެ އެވެ.

ވެރިކަމަށް ދެ އަހަރުވާއިރު ނުހައްގުން އެމީހަކަށް ކެވުނު ވަރަކަށް ކެވުނު ގޮތަކަށް ކާން ފަށައިފި އެވެ. ވޭތުވެދިޔަ ދުވަސްތަކަށް ބަލައިލިޔަސް އެކަން އޮތީ އެގޮތަށެވެ. ހިލޭ ދިން ރޯހައުސްތަކާއި ފެނަކައިން ކުރާ ވައްކަންތަކާއި އެޗްޑީސީގެ ވެރިން ކުރި ވައްކަންތަކާއި ސަރުކާރުގެ އެތެރެއިން ވެރި މީހާ ބުނެގެން ކުރިކަންކަން ވެސް މަދެއް ނޫނެވެ. ވައްކަމުގެ ވާހަކަ ދައްކަންޔާ ވާނީ ހަމަ ދައްކާހާ އެވެ.

ސަރުކާރު ބަންދު ދުވަހެއްގައި ދަންވަރުގެ ވަގުތު ނެރުނު ފެނަކައިގެ އޮޑިޓް ރިޕޯޓުން ފާހަގަވި ވައްކަންތަކުގެ ވާހަކަ ދައްކަން ދައުލަތުގެ މީޑިއާގެ ޕްރޮގްރާމަކަށް ގެންދިޔައީ އެއްކަލަ ބާރަށު ދާއިރާގެ ސުޖާއު އެވެ. ބެސްފަރުވާގެ ކަންކަމުގެ ވާހަކަ ދައްކަން މޮޅުވާނީ ޑޮކްޓަރެއްތާއެވެ.

ދައުލަތުގެ މާލީ ހާލަތު މިވަގުތު އޮތީ ނުރައްކާތެރި ހިސާބެއްގައެވެ. ސަރުކާރު އޮތީ ދަރަނިން ބަރާވެފަ އެވެ. އަނެއްކޮޅުން ޑީފޯލްޓްވުމުގެ ބިރު ވަރަށް ބޮޑަށް އެބައޮތެވެ. މި ހާލަތުގައި ވެސް ދައުލަތުގެ ހަރަދުތައް އެއްވެސް ހިފެހެއްޓުމެއް ނެތި އިތުރުވަމުންދާއިރު، ސަރުކާރުން އަމިއްލައަށް އެކުލަވާލި "ހޯމް ގްރޯން ރިފޯމް" އެޖެންޑާ ވެސް މިހާރު ވަނީ އެއްފަރާތްކޮށްލާފައެވެ.

ވެރިކަމާ ހަވާލުވުމުގެ ކުރިން ސަރުކާރުން ދެއްކި ވާހަކަތަކުގައި ބޮޑަށް އަލިއަޅުވާލީ ހަރަދު ކުޑަކުރުމުގެ މުހިންމުކަމަށެވެ. ސިޔާސީ މަގާމުތަކާއި ސަބްސިޑީތަކަށް ކުރާ ހަރަދު ކުޑަކުރުމުގެ އިތުރުން ދައުލަތުގެ ކުންފުނިތަކަށް ކުރާ ބޭކާރު ހަރަދުތައް ހުއްޓާލަން ޖެހޭ ކަމަށް ވެސް މި ސަރުކާރުން ދެއްކީ މަދެއްކޮށް ނޫނެވެ. ނަމަވެސް މިއަދާ ހަމައަށް އައިއިރު މި ވަޢުދުތަކުގެ ތެރެއިން އެއްވެސް ކަމެއް ހާސިލުވެފައެއް ނުވެއެވެ.

ސަރުކާރުން ވެރިކަމާ ހަވާލުވީ، ކުރީ ސަރުކާރުން ފާސްކޮށްފައިވާ ބަޖެޓަކާ އެކުގައެވެ. ވެރިކަމާ ހަވާލުވުމުގެ ކުރިން އެ ބަޖެޓާ މެދު ރުހުނެވެ. އޭރުގެ ފިނޭންސް މިނިސްޓަރު ޑރ. މުހައްމަދު ޝަފީގު ވިދާޅުވެފައިވަނީ މާލީ ރިފޯމް އެޖެންޑާ ތަންފީޒުކުރާނީ "އެންމެ ރަނގަޅު ވަގުތު" ގައި ކަމަށެވެ. އޭގެ ތެރޭގައި ދައުލަތުގެ ކުންފުނިތައް ރިފޯމްކުރުމާއި، އާސަންދައިގެ ލީކްތައް ބަންދުކުރުމާއި، ސަބްސިޑީ ނިޒާމު ޓާގެޓެޑް ނިޒާމަކަށް ބަދަލުކުރުން ހިމެނެއެވެ.

އަހަރު ނިމެން ކައިރިވަމުން ދިޔައިރު، ސަރުކާރުގެ ރާގު ބަދަލުވާން ފެށިއެވެ. ހަރަދު ކުޑަކުރުމުގެ ފިޔަވަޅުތައް ނޭޅޭނެ ކަމަށް ބުނަން ފެށިއެވެ. ބަހަނާއަކަށް ދެއްކީ ކުރީ ސަރުކާރުން ބަޖެޓުގައި ސިޔާސަތުތައް ހިމަނާފައި އޮތަސް، އެކަން ތަންފީޒުކުރުމަށް ކުރަންޖެހޭ މަސައްކަތްތައް ކޮށްފައި ނެތް ކަމަށެވެ.

ސަަރުކާރުން ހަރަދުތައް ކުޑަކުރުމުގައި ފަސްޖެހިގެން ތިއްބައި، މޫޑީސް އާއި ފިޗުން ރާއްޖޭގެ ކްރެޑިޓު ރޭޓިން ދަށްކުރި އެވެ. އެ ތަންތަނުން ބުނީ ރާއްޖެ ޑީފޯލްޓް ވެދާނެ ކަމުގެ ބިރު އިންތިހާއަށް ބޮޑު ކަމަށެވެ. މިއީވެސް މިސަރުކާރު އައިފަހުން ދެވެހިންނަށް ދިން ލަނޑެކެވެ.

ހުރިހާކަމެއް މިދަނީ ގޯހުން ގޯހަށެވެ. އޮބި އަޅައިގެންވެސް ހައްލުވާނީ ބައެއް ކަންކަމެވެ. ދައުލަތެއްގެ ސިފަ ގެއްލި ގާނޫނުތައް ރަށްމެދުކޮށް ސެލެކްޓިވް ޖަސްޓިސް ހިންގަން ފެށި އެވެ. ރައްޔިތުންނަކީ އެއްވެސް ބައެއް ނޫން ކަމަށް ދޭހަވާ ގޮތައް އެކި ސިޔާސީ މެހެފިލްތަކުގައި ގޮވާން ފެށި އެވެ. ރައްޔިތުން ކިތަންމެ ފެލުނަސް ދެން ވެރިމީހާ ބަދަލު ނުވާނެ ކަމަށް ބުނަން ފެށި އެވެ. އަދި ގާނޫނޫ އިސްލާހުކޮށް ވެރިކަން ދަންމާލަން އުޅޭ ކަމުގެ އަޑު ރަށު ތެރޭގައި ގަދަ ވި އެވެ.