މިސަރުކާރުގެ ދޮގާއި މަކަރުގެ ސްކޭމް ގައި ތިން ވަނަ ފަހަރަށް ރައްޔިތުން ޖެއްސުމަށް ދަނީ މަސައްކަތް ކުރަމުން: މެންބަރު އަހުމަދު ދީދީ
ޑރ.މުއިއްޒަކީ ދޮގާއި މަކަރުން ވޯޓު ހޯއްދެވި ބޭފުޅެއް، އެކަން ރައްޔިތުންނަށް މިހާރު އެނގޭނެ
އެމްޑީޕީގެ ހަރުގެ ޖަލްސާގައި ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވާހަކަ ދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަރުކާރުގެ ދޮގާއި މަކަރުގެ ސްކޭމް ގައި ދެ ފަހަރު ރައްޔިތުން ޖެހިފައިވާ ކަމަށާއި، ތިން ވަނަ ފަހަރަށް ވެސް އެ ސްކޭމް ގައި ޖެއްސުމަށް ވަރަށް ބުރަކޮށް މަސައްކަތް ކުރާ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެ އެވެ.
ބުދަ ދުވަހުގެ ރޭ އެމްޑީޕީން ކުރިއަށް ގެންދިޔަ ހަރުގެ ޖަލްސާ ގައި މެންބަރު އަހުމަދު ދީދީ ވިދާޅުވީ، ޑރ.މުއިއްޒަކީ ދޮގާއި މަކަރުން ވޯޓު ހޯއްދެވި ބޭފުޅެއް ކަމަށާއި، އެކަން ރައްޔިތުންނަށް މިހާރު އެނގޭނެ ކަމަށެވެ.
ދެ ފަހަރެއްގެ މަތިން ދޮގާއި މަކަރުގެ ސްކޭމް ގައި ރައްޔިތުން ޖައްސާފައިވާކަން ފާހަގަކުރައްވައި މެންބަރު އަހުމަދު ދީދީ ވިދާޅުވީ ތިން ވަނަ ފަހަރަށް ވެސް މި ސްކޭމް ގައި ޖައްސައި، ކުރިއަށް އޮތް ލޯކަލް ކައުންސިލް އިންތިޚާބު މި ސަރުކާރުން ކާމިޔާބު ކުރުމަށް ވަރަށް ބޮޑަށް މަސައްކަތް ކުރާ ކަމަށެވެ.
ނަމަވެސް ސަރުކާރުގެ މިސްކޭމް ގައި ނުޖެހުމަށް މެންބަރު އަހުމަދު ދީދީ ގޮވާލެއްވި އެވެ.
ކުރިއަށް މިއޮތީ ކައުންސިލް އިންތިޚާބު ކައުންސިލްއާ ދޭތެރޭގައި ކަންތައް ކުރިގޮތް ރައްޔިތުންނަށް އެނގޭނެ. ރައްޔިތުންގެ ބާރުވެރިކަން ކަނޑާލުމަށްޓަކައި ރައްޔިތުންގެ ރެޕްރެޒެންޓޭޓިވް އެތައް ގުނައަކުން މަދުކޮށްލައިފި. އަނެއްކާ އަނެއްކޮޅުން ގޮސް ރައްޔިތުން ބާރުވެރިކުރަންށޭ ކިޔާފައި ތިމަންނަމެންނަށް ވޯޓު ދޭށޭ. އޭރުންނޭ ރައްޔިތުން ބޭނުންވާ ގޮތަށް ރަށް ތަރައްގީ ކުރެވޭނީ ކިޔާފައި އެތައް ވާހަކައެއް އެބަ ދައްކާ. އެހެންވީމަ މި ސްކޭމްތަކަށް ރައްޔިތުން ނުހެއްލޭށޭ. މިސްކޭމް ސަރުކާރުން މިހެން ގޮސް ދައްކާ ވާހަކަތަކަށް ދެ ފަހަރު ހެއްލިއްޖެ. ތިން ވަނަ ފަހަރަށް ހެއްލިގެން ނުވާނެ.ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ
މީގެ އިތުރުން މެންބަރު އަހުމަދު ދީދީ ވިދާޅުވީ މި ސަރުކާރު ޖަވާބުދާރީ ކުރުވުމަށް ރައްޔިތުން އެކުއެކީ ގައި މަސައްކަތް ކުރަން ޖެހޭ ކަމަށާއި، އެކަތިގަނޑަކަށް ވާން ޖެހޭ ކަމަށެވެ. އަދި ކުރިއަށް އޮތް ކައުންސިލް އިންތިޚާބު ގައި ރައީސް މުއިއްޒުގެ ކެންޑިޑޭޓުންނަށް ނޫނެކޭ ބުނެ، ސަރުކާރަށް ވަރަށް ވަރުގަދަ މެސެޖެއް ދޭން ޖެހޭ ކަމަށް އޭނާ ވިދާޅުވި އެވެ.
މެންބަރު އަހުމަދު ދީދީ ވިދާޅުވީ ކުރިއަށް އޮތް ކައުންސިލް އިންތިޚާބު ގައި އެމްޑީޕީގެ ކެންޑިޑޭޓުން އިންތިޚާބު ކުރަން ޖެހޭ ކަމަށެވެ. އެހެންނޫން ކަމަށްވާނަމަ ސަރުކާރުން ހަދާ ދޮގުތަކަށް ނިމުމެއް ނާންނާނެ ކަމަށާއި، 2028 ވަނަ އަހަރު ވެސް ބޮޑެތި ދޮގުތައް ހަދައި، ސަރުކާރުން ބޭނުން ގޮތެއް ގައުމާ ރައްޔިތުންނަށް ހަދާނެ ކަަމަށް މެންބަރު އަހުމަދު ދީދީ ވިދާޅުވި އެވެ.
