މި ސަރުކާރުން ގާނޫނާއި ގަވާއިދު ބަދަލުކޮށް ކޮރަޕްޝަނަށް މަގުފަހިވާ ގޮތަށް ހުރި ދޮރުތައް ދަނީ ހުޅުވަމުން: ޑރ.ޑީޑީ
މިހާތަނަށް ރައްޔިތުންނަށް ވެފައިވާ އެއްވެސް ވައުދެއް ރައީސް މުއިއްޒު ނުފުއްދަވާ
ރާއްޖެޓީވީގެ ފަލަސުރުހީ ޕްރޮގްރާމްގައި އެމްޑީޕީގެ ކުރީގެ ރައީސް ޑރ.އިބްރާހިމް ދީދީ (ޑރ.ޑީޑީ) ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން ކޮރަޕްޝަން ހުއްޓުވުމަށް މަސައްކަތް ނުކުރި ނަމަވެސް ގާނޫނާއި ގަވާއިދު ބަދަލުކޮށް ކޮރަޕްޝަނަށް މަގުފަހިވާ ގޮތަށް ހުރި ދޮރުތައް ހުޅުވަަމުންދާ ކަމަށް އެމްޑީޕީގެ ކުރީގެ ރައީސް ޑރ.އިބްރާހިމް ދީދީ (ޑރ.ޑީޑީ) ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ޑރ.ޑީޑީ ވިދާޅުވީ، ރިޔާސީ އިންތިޚާބުގައި ރައީސް މުއިއްޒަށް ރައްޔިތުން ވޯޓު ދީ ވެރިކަން ހަވާލުކުރީ ގިނަ މައްސަލަތައް ހައްލުކޮށް، ރައްޔިތުންނާ ގުޅުންހުރި ގިނަ ކަންކަން ހައްލު ކޮށްދޭނެ ކަމުގެ އުންމީދުގައި ކަމަށެވެ. އަދި ގައުމު ރަނގަޅު ރަނގަޅު މިސްރާބަށް ގެންދިއުމުގައި އަމާޒުގައި ކަމަށެވެ.
ޑރ.ޑީޑީ ވިދާޅުވީ އެދުވަސްވަރު ރައީސް މުއިއްޒު ވެސް ވަރަށް ގިނަ ވައުދުތައް ވެވަޑައިގެންނެވި ކަމަށާއި، އެ ވައުދުތައް ފުއްދަވާނެ ކަމަށް ރައްޔިތުން ގަބޫލުކުރި ކަމަށެވެ. ނަމަވެސް މިހާރު ރައީސް މުއިއްޒު ވެވަޑައިގެންނެވި ވައުދުތަކަށް އެއްވެސް އިހުތިރާމެއް ނެތްކަން ހާމަވެފައިވާ ކަމަށް އޭނާ ވިދާޅުވިއެވެ.
މި ސަރުކާރަށް ދެއަހަރުވާން ކައިރިވެފައިވާއިރު، ހއ.ތުރާކުނުން އައްޑޫ ސިޓީއާ ހިސާބަށް މީހުން ދިރިއުޅޭ އެއްވެސް ރަށެއްގައި އެއްވެސް ތަރައްގީގެ މަޝްރޫއެއް ނުހިނގާ ކަމަށް ޑރ. ޑީޑީ ވިދާޅުވިއެވެ. އަދި މިހާތަނަށް ރައްޔިތުންނަށް ވެފައިވާ އެއްވެސް ވައުދެއް އެމަނިކުފާނު ނުފުއްދަވާ ކަމަށާއި، ރަށްރަށަށް ވަޑައިގަންނަވައި ވައުދުތައް ތަކުރާރު ކުރައްވާ ކަމަށް ޑރ.ޑީޑީ ވިދާޅުވިއެވެ.
މީގެ އިތުރުން ޑރ.ޑީޑީ ވިދާޅުވީ ތަރައްގީގެ މަޝްރޫއުތަކުގެ އިތުރުން ރައްޔިތުންނަށް ލިބެންޖެހޭ ޚިދުމަތްތަކަށް ވެސް ނުލިބޭ ކަމަށެވެ. އަދި ގައުމުގައި ކޮރަޕްޝަން އިންތިހާއަށް އިތުރުވެފައިވާ ކަމަށާއި، ކޮރަޕްޝަން ހުއްޓުވުމަށް މިސަރުކާރުން މަސައްކަތް ނުކުރާ ކަމަށެވެ. ނަމަވެސް ގާނޫނާ ގަވާއިދު ބަދަލުކޮށް އެކި ދިމަދިމާލުން ކޮރަޕްޝަނަށް މަގުފަހިވާ ގޮތަށް ދޮރުތައް ހުޅުވަމުންދާ ކަމަށާއި، އެމަންޒަރު ފެންނަ ކަމަށް ޑރ. ޑީޑީ ވިދާޅުވިއެވެ.
ކުރިއަށް އޮތް ލޯކަލް ކައުންސިލް އިންތިޚާބާ ދިމާކޮށް އަނެއްކާ ވެސް ހަމަ އާދައިގެ ބަހުން ދަންނަވާ ކަމަށް ވަންޏާ ކޮންމެ ރަށަކަށް ވަޑައިގެން ހަމަ ކަޑަ ޖައްސަވަމުން އެ ގެންދަވަނީ. ބައެއް ރަށްރަށަށް މިދިޔަ އަހަރު ވަޑައިގެންނެވި ރަށްރަށަށް ވަޑައިގެންފައި ވިދާޅުވެފައި އޮތީ މިއަހަރު މަސައްކަތް ފެށިގެން ކުރިއަށްދާނެ ކަމަށް. މިއަހަރު ވަޑައިގެންފައި އެ ވިދާޅުވަނީ މިއަންނަ އަހަރު ފެށިގެން ކުރިއަށްދާނެ ކަމަށް. އެހެންވީމަ ވަރަށް ތާކުންތާކު ނުޖެހޭ ވާހަކަފުޅުތަކެއް ދައްކަވަމުން އެގެންދަވަނީ. ރައްޔިތުންގެ އިތުބާރު މިއަދު ސަރުކާރަށް ގެއްލިއްޖެ. ރައްޔިތުންނަށް ވެފައި ހުރި އެއްވެސް ވައުދެއް ފުއްދޭ މަންޒަރެއް ނުފެނޭ. އަދި އޭގެ އިތުރުން ސަރުކާރުގެ ތެރޭގައި ހުރި ކޮރަޕްޝަންގެ ކަންތައްތައް ހުއްޓުވުމުގެ އެއްވެސް މަސައްކަތެއް ކުރައްވާ މަންޒަރެއް ވެސް ނުފެނޭ. އޭގެ އިތުރުން ދިމާ އިދިކޮޅަށް ކޮރަޕްޝަނަށް މަގުފަހިވާ ގޮތަށް ހުރި ދޮރުތައް އެ ހުޅުވާ އެ ކަންތައްތަކަށް މަގުފަހި ކުރުވާ މަންޒަރު މިފެނިގެންދަނީ އެނގޭތޯ.އެމްޑީޕީގެ ކުރީގެ ރައީސް ޑރ.އިބްރާހިމް ދީދީ (ޑރ.ޑީޑީ)
މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ ބިލަށް އިޝާރާތް ކުރައްވައި ޑރ.ޑީޑީ ވިދާޅުވީ މިސަރުކާރުން އެބިލު ފާސްކޮށް، މީޑީއާ ކޮންޓްރޯލް ކުރުމަށް މަސައްކަތް ކުރަނީ ވެސް ސަރުކާރުގެ ވައްކަމާއި ކޮރަޕްޝަންގެ މައްސަލަތައް ސިއްރު ކުރުމުގެ މަގުސަދުގައި ކަމަށެވެ. އެއީ މިހާތަނަށް މިސަރުކާރުގެ ބޮޑެތި ކޮރަޕްޝަންތައް ކަމަށްވާ އެޗްޑީސީގެ ގޯތީގެ ވައްކަންފަދަ ބޮޑެތި މައްސަލަތައް ރިޕޯޓުކޮށްފައިވަނީ މީޑިއާތަކުން ކަމަށްވާތީ ކަމަށް އޭނާ ވިދާޅުވިއެވެ.
