ރައީސް މުއިއްޒުގެ ކެމްޕެއިނަށް ހަރަދުކުރި މިފްކޯގެ ބޯޑު މެމްބަރު ސަލާހުއަށް، އުސޫލުން ބޭރުން 19 މިލިއަންގެ މަސައްކަތް ދީފައިވާކަން އޮޑިޓުން ހާމަވެއްޖެ
ބިޑު ކުރުމުގެ އާންމު އުސޫލުތަކާ ހިލާފަށް ސަލާހު ޝަރީފުގެ ހިއްސާ އޮންނަ ކެންގޯ ޕްރައިވެޓް ލިމިޓެޑާއެކު ފެނަކައިން 8 އެއްބަސްވުމެއްގައި ސޮއިކޮށްފަވޭ
ރައީސް މުއިއްޒު އަދި މިފްކޯގެ ބޯޑު މެންބަރު ސަލާހު
ރައީސް މުހައްމަދު މުއިއްޒުގެ ކެމްޕޭނަށް ހަރަދުކުރި މިފްކޯގެ ބޯޑު މެންބަރު ސަލާހު ޝަރީފުގެ ކުންފުންޏަކަށް ފެނަކަ ކޯޕަރޭޝަނުން އާންމު ބީލަމުގެ އުސޫލުތަކާ ހިލާފަށް 19 މިލިއަން ރުފިޔާގެ މަސައްކަތް ދީފައިވާކަން އޮޑިޓަރ ޖެނެރަލްގެ އޮފީހުން އާންމުކުރި ފެނަކައިގެ ހާއްސަ އޮޑިޓް ރިޕޯޓުން ހާމަވެއްޖެއެވެ.
ހުކުރުވިލޭރޭ އާންމުކުރި 97 ސަފްހާގެ މި ރިޕޯޓުގައި 2021 ވަނަ އަހަރުން ފެށިގެން 2023 ވަނަ އަހަރުގެ ނިޔަލަށް ފެނަކައަށް ބޭނުންވާ މުދަލާއި، ޚިދުމަތް ހޯދުމުގައި އަމަލު ކޮށްފައިވާ ގޮތާއި، ކޮށްފައިވާ ޚަރަދުގެ ތަފްސީލާއި، ކުންފުނީގެ މާލީ ހާލަތާއި ކުންފުނިން އެކި ފަރާތްތަކަށް ދައްކަން ޖެހޭ ފައިސާގެ ތަފްސީލާއި، ކުންފުނިން ދަރަނި މެނޭޖުކޮށްފައިވާ ގޮތާއި، ޕްރޮކިއުމެންޓް އުސޫލުތަކަށް ތަފުސީލީ ގޮތެއްގައި ބަލާފައިވާނޭކަމަށް އޮޑިޓް އޮފީހުން ބުނެފައިވެއެވެ.
މި މުއްދަތުގައި ކުންފުނިން މުދަލާއި ހިދުމަތް ހޯދުމަށް 8.8 ބިލިއަން ރުފިޔާ ހަރަދުކޮށްފައިވާއިރު، އޭގެ ތެރޭގައި އެވަގުތަށް މުހިންމު ނޫން ގިނަ ކެޕިޓަލް މަސައްކަތްތަކަށް ޒިންމާދާރުކަމެއްނެތި ހަރަދުކޮށްފައިވާކަން ރިޕޯޓުގައި ފާހަގަކޮށްފައިވެއެވެ.
އޮޑިޓް ރިޕޯޓުގައި ވާގޮތުން، ބިޑު ކުރުމުގެ އާންމު އުސޫލުތަކާ ހިލާފަށް ސަލާހު ޝަރީފުގެ ހިއްސާ އޮންނަ ކެންގޯ ޕްރައިވެޓް ލިމިޓެޑާއެކު ފެނަކައިން 8 އެއްބަސްވުމެއްގައި ސޮއިކޮށްފައިވެއެވެ. މި އެއްބަސްވުންތަކުގެ ޖުމްލަ އަގަކީ 19,456,100 ރުފިޔާއެވެ.
ބިޒްނަސް ޕޯޓަލްއިން ދައްކާ ގޮތުގައި ސަލާހުގެ އިތުރުން ކެންގޯ ކުންފުނީގެ ހިއްސާދާރުންގެ ތެރޭގައި މިފްކޯގެ ހިންގުން ހަރަދަނާކުރަން ކަމަށް ބުނެ ފެބްރުއަރީ މަހު އެ ކުންފުނިން ވަކިކުރުމަށްފަހު ޖެހިގެން އައި މަހު އަލުން މަގާމު ދިން ތިން ޖެނެރަލް މެނޭޖަރުންގެ ތެރޭގައި ހިމެނޭ އައިމިނަތު ސަނިއްޔާ ޝަރީފު ހިމެނެއެވެ.
ފާހަގަކޮށްލެވޭ ކަމަކީ، ސަލާހަކީ ރައީސް މުއިއްޒުގެ ރިޔާސީ ކެމްޕޭނަށް މިލިއަނުން ހަރަދުކުރި ފަރާތެއް ކަމެވެ. އިލެކްޝަން ކޮމިޝަނުން އާންމުކޮށްފައިވާ ކެމްޕޭނުގެ މާލީ ބަޔާނުން އެނގޭގޮތުގައި، 2023 ވަނަ އަހަރުގެ ސެޕްޓެމްބަރު 1 ގައި ސަލާހު ވަނީ ޕީއެންސީގެ ރިޔާސީ ކެމްޕޭނަށް 2.8 މިލިއަން ރުފިޔާ ހަރަދުކޮށްފައެވެ. މި ފައިސާ ހަރަދުކޮށްފައިވަނީ ރައީސް މުއިއްޒުގެ ކެމްޕޭނު ދަތުރުތަކާއި، ހުރުމާއި، ކެއުމުގެ ހަރަދުގެ އިތުރުން ކެމްޕޭން މެޓީރިއަލްސް ހެދުމަށްކަމަށް މާލީ ބަޔާނުގައި ވެއެވެ. އޭގެ ތިން މަސް ފަހުން، 12 ޑިސެމްބަރު 2023 ގައި ރައީސް މުއިއްޒުވަނީ ސަލާހު މިފްކޯގެ ބޯޑަށް އައްޔަންކުރައްވާފައެވެ.
