އދ ގައި ނަތަންޔާހޫ ވާހަކަ ދައްކަން ފެށުމުން ވަފުދުތައް ނުކުމެގެން ހިނގައްޖެ

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އދ. ގެ އާންމު މަޖިލީހާ މުޚާޠަބު ކުރުމަށް ތެދުވުމާ އެކު ޖަލްސާގައި ހާޒިރުވެ ތިބި ވަފުދުތަކުގެ ތެރެއިން ގިނަ ބަޔަކު ނުކުމެގެން ހިނގައްޖެއެވެ.

ހުކުރު ދުވަހު އދ. ގެ އާންމު މަޖިލީހުން ކުއްލިއަކަށް ގިނަ އަދަދެއްގެ މަންދޫބުން މާލަން ދޫކޮށް ނުކުންނަން ފެށުމުން ނަތަންޔާހޫގެ މޫނުމަތިން ނުތަނަވަސްކަން ފެނުކަން ފާހަގަ ކުރެވުނެއެވެ.

ބައެއް ފަރާތްތަކުން މާލަމުން ނުކުމެގެން ދަމުން ނުރުހުމުގެ ޝުއޫރުތައް ފާޅު ކުރަމުން ގެންދިއުމުގެ ސަބަބުން މާލަމުގެ އިންތިޒާމު ގެއްލި ރިޔާސަތުން އިންތިޒާމު ވުމަށް ގޮވާލިކަން ވެސް ފާހަގަ ކުރެވުނެވެ.

ނަތަންޔާހޫ އަކީ ޣައްޒާ އާއި ފަލަސްޠީނުގެ ރައްޔިތުންގެ މައްޗަށް އޭނާ އަމުރުކޮށްގެން ހިންގާ ހަނގުރާމައިގެ ސަބަބުން ދުނިޔޭގެ ކުރިމަތީގައި އެކަހެރިވަމުންދާ ވެރިއެކެވެ. އޭނާ ވަނީ ފަލަސްޠީނުގެ ބަލައިގަންނަ ގައުމުތަކަށާއި ފަލަސްތީނު ރައްޔިތުންނަށް އެހީތެރިވާތީ ބައިނަލްއަޤްވާމީ މުޖުތަމަޢުގެ މައްޗަށް ހަރުކަށި ޢިބާރާތުން ފާޑުކިޔާފައެވެ.

މި ހަފްތާގެ ކުރީކޮޅު، ފްރާންސް އާއި އެތައް ޔޫރަޕުގެ ޤައުމުތަކަކުން ފަލަސްތީނު ދައުލަތެއްގެ ގޮތުގައި ބަލައިގަތެވެ. މިކަމާ ވެސް ނަތަންޔާހޫ ވަނީ ނުރުހުން ފާޅު ކޮށްފައެވެ.

އޭނާގެ ވާހަކައިގައި، ނަތަންޔާހޫ ބުނީ ފަލަސްތީނުގެ ރައްޔިތުން އިސްރާއީލުގެ ދައުލަތެއް އޮތުމަށް ބޭނުމެއް ނުވާ ކަމަށެވެ. ނަމަވެސް މި ހަފްތާގައި ޕެލަސްޓައިން އޮތޯރިޓީން ވަނީ ކުރިން އިސްރާއީލު ދައުލަތް ބަލައިގަތްކަން ދުނިޔެއަށް އަލުން ހަނދާންކޮށްދީފައެވެ.