ރާއްޖޭގެ އިންސާނީ ހައްގުތަކުގެ ރެކޯޑުތައް އދ އިން ބަލަނީ، ޖަވާބުދާރީ ވުމަށް އޭޖީ އުޝާމް ޖެނީވާ އަށް
ދިވެހިރާއްޖޭގެ އިންސާނީ ހައްގުތަކުގެ ރެކޯޑް ހަތަރުވަނަ ފަހަރަށް އދ.ގެ ޔޫޕީއާރު ވޯކިންގ ގްރޫޕުން 5 ނޮވެމްބަރު 2025 ގައި ޖެނީވާގައި ރިވިއު ކުރާނެއެވެ. އެޓާނީ ޖެނެރަލް އަހުމަދު އުޝާމްގެ ލީޑަރޝިޕުގެ ދަށުން ކުރިން ބޭއްވި ރިވިއުތަކުގެ ލަފާތައް ތަންފީޒު ކުރުމުގެ ތަފްސީލާއި ފަހުގެ ކުރިއެރުންތައް ދިވެހިރާއްޖެއިން ހުށަހަޅާނެއެވެ.
ހަތަރުވަނަ ޔޫޕީއާރު ސައިކަލްގައި ކުރިން ބޭއްވި ރިވިއުތަކުގައި ހުށަހެޅި ލަފާތައް ތަންފީޒު ކުރުމަށް އެޅި ފިޔަވަޅުތައް ތަފްސީލްކޮށް ބަޔާން ކުރުމަށް ހަމަޖެހިފައިވޭ
ޖެނީވާ ގައި ހުންނަ އދ ގެ މައި މަރުކަޒު ގައި ބޭއްވި ހިއުމަން ރައިޓްސް ކައުންސިލްގެ ދެވަނަ ޖަލްސާ ގެ ތެރެއިން - 18 ސެޕްޓެމްބަރ 2006
ދިވެހިރާއްޖޭ ގެ އިންސާނީ ހައްގުތަކުގެ ރެކޯޑް ހަތަރު ވަނަ ފަހަރަށް އދ.ގެ އިންސާނީ ހައްގުތަކުގެ ކައުންސިލްގެ ޔުނިވާސަލް ޕީރިއޮޑިކް ރިވިއު (ޔޫޕީއާރު) އިން ބެލުމަށް ޝެޑިއުލް ކޮށްފިއެވެ.
ޔޫޕީއާރު އިން ބުދަ ދުވަހު ޖެނީވާގައި ބާއްވާ ބައްދަލުވުން ލައިވްކޮށް ވެބްކާސްޓް ކުރުމަށް ވަނީ ހަމަ ޖެހިފައެވެ.
ދިވެހިރާއްޖެ އަކީ ނޮވެމްބަރު 3 ން 14 ށް ކުރިއަށް ގެންދާ ސެޝަންގައި ޔޫޕީއާރު ވޯކިންގ ގްރޫޕުން ރިވިއު ކުރުމަށް ހަމަޖެހިފައިވާ 14 ގައުމުގެ ތެރެއިން އެއް ގައުމެވެ. ދިވެހިރާއްޖޭގެ ފުރަތަމަ، ދެވަނަ އަދި ތިންވަނަ ޔޫޕީއާރު ރިވިއުތައް ބާއްވާފައި ވަނީ 2010 ނޮވެމްބަރު، 2015 މެއި، އަދި 2020 ނޮވެމްބަރުގައެވެ.
ޔޫޕީއާރު ވޯކިންގ ގްރޫޕު އެކުލެވިގެން ވަނީ އިންސާނީ ހައްގުތަކުގެ ކައުންސިލްގެ 47 މެމްބަރު ގައުމުގެ މައްޗަށެވެ. ނަމަވެސް، މި ރިވިއު ގައި އދ.ގެ ކޮންމެ މެމްބަރަކަށް ނުވަތަ އޮބްޒާވަރު ގައުމަކަށް ބައިވެރިވެވިދާނެއެވެ.
ރާއްޖޭގެ އިންސާނީ ހައްގުތަކުގެ ކަންކަން ހުރި ގޮތް ޔޫޕީއާރު އިން ބަލާއިރު، ރިވިއު ބިނާކުރެވިފައިވާ ލިޔުންތަކަކީ: 1) ގައުމީ ރިޕޯޓް - ސަރުކާރުން ފޯރުކޮށްދޭ މައުލޫމާތު؛ 2) މިނިވަން އިންސާނީ ހައްގުތަކުގެ ތަޖުރިބާކާރުންނާއި ގްރޫޕުތަކުގެ ރިޕޯޓުތަކުގައި ހިމެނޭ މައުލޫމާތު، މިއީ ސްޕެޝަލް ޕްރޮސީޖާސް، އިންސާނީ ހައްގުތަކުގެ ޓްރީޓީ ބޮޑީތަކާއި އދ.ގެ އެހެނިހެން އިދާރާތަކުގެ ގޮތުގައި ބެލޭ ފަރާތްތައް؛ އަދި 3) ގައުމީ އިންސާނީ ހައްގުތަކުގެ މުއައްސަސާތަކާއި، ސަރަހައްދީ ޖަމިއްޔާތަކާއި، ސިވިލް ސޮސައިޓީ ގްރޫޕުތައް ހިމެނޭ އެހެނިހެން ބައިވެރިންގެ ފަރާތުން ފޯރުކޮށްދޭ މައުލޫމާތުގެ މައްޗަށެވެ.
ޔޫޕީއާރު އިން ކުރާ މައިގަނޑު މަސައްކަތަކީ އދ.ގެ 193 މެމްބަރު ގައުމުތަކުގެ އިންސާނީ ހައްގުތަކުގެ ރެކޯޑުތައް ޕިއަރ ރިވިއު ކުރުމެކެވެ. 2008 އޭޕްރީލްގައި ފުރަތަމަ ބައްދަލުވުން ބާއްވާފައިވާތާ ފެށިގެން، އދ.ގެ 193 މެމްބަރު ގައުމުތައް ތިން ފަހަރު ރިވިއު ކޮށްފައިވެއެވެ. ހަތަރު ވަނަ ޔޫޕީއާރު ސައިކަލްގައި، ކުރިން ބޭއްވި ރިވިއުތަކުގައި ހުށަހެޅި ލަފާތައް ގައުމުތަކުން ތަންފީޒު ކުރުމަށް އެޅި ފިޔަވަޅުތައް ތަފްސީލްކޮށް ބަޔާން ކުރުމާއި، ގައުމުގައި އިންސާނީ ހައްގުތަކާ ގުޅޭ ގޮތުން ކަންކަން ކުރަމުން ގެންދާ ގޮތް ބެލުމަށް ވަނީ ހަމަޖެހިފައެވެ.
ދިވެހިރާއްޖޭގެ ވަފްދުގައި އިސްކޮށް ހުންނެވީ އެޓާނީ ޖެނެރަލް އަހުމަދު އުޝާމެވެ.
ދިވެހިރާއްޖޭގެ ރިވިއު ގައި ރެޕަޓުއަރުންގެ ގޮތުގައި ތިބޭނީ ޑޮމިނިކަން ރިޕަބްލިކް، މާޝަލް އައިލެންޑްސް އަދި ރުމޭނިއާ އެވެ.
ރިވިއު އަށް ފަހު ޔޫޕީއާރު ވޯކިންގ ގްރޫޕުން ދިވެހިރާއްޖެ އަށް ހުށަހަޅާ ލަފާތައް ފާސްކުރުމަށް ހަމަޖެހިފައިވަނީ 14 ނޮވެމްބަރު 2025 ވާ ހުކުރު ދުވަހު އެވެ.
