މެދު އިރުމަތީގައި ހިނގަމުން އަންނަ ހަމަ ނުޖެހުންތަކާއި، ޚާއްސަކޮށް އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގައި ސުލްޙަވެރިކަން ހޯދުމަށް، އެމެރިކާގެ ރައީސް ޑޮނަލްޑް ޓްރަމްޕް 21 ނުކުތާގެ ޕްލޭނެއް ހުށަހަޅުއްވައިފި އެވެ.

އެމެރިކާގެ ނިއު ޔޯކުގައި ކުރިއަށް ދިޔަ އދ ގެ ޖެނަރަލް އެސެމްބްލީގެ ބައްދަލުވުމަށް ފަހު ޓްރަމްޕް ވަނީ އިސްލާމީ ޤައުމު ތަކުގެ ލީޑަރުންނާ ބައްދަލު ކުރައްވައިފަ އެވެ. އެމެރިކާގެ ރިޔާސީ ގަނޑުވަރު، ވައިޓް ހައުސްގައި ކުރިއަށް ދިޔަ އެ ބައްދަލުވުމުގައި ޓްރަމްޕް ވަނީ، ސުލްޙަވެރިކަން ޤާއިމު ކުރުމަށް 21 ނުކުތާގެ ޕްލޭނެއް ލީޑަރުންނާ ހިއްސާ ކުރައްވައިފަ އެވެ.

އެ ބައްދަލުވުމުގެ މައުލޫމާތު އިނގޭ މަސްދަރަކުން އަލް އަރަބިއްޔާ އަށް ބުނެފައި ވަނީ، އިސްރާއީލް އިން ވެސްޓް ބޭންކު އެނެކްސް ކުރުމުގެ ފުރުސަތު ނުދޭނެ ކަމުގެ ފުރިހަމަ ޔަގީންކަން، އެ ބައްދަލުވުމުގައި ބައިވެރިވެ ވަޑަައިގެންނެވި ލީޑަރުންނަށް ޓްރަމްޕް ދެއްވާފައިވާ ކަމަށެވެ.

ޓްރަމްޕްގެ ފަރާތުން ހުށަހަޅުއްވާފައިވާ އެ ޕްލޭނަކީ އިސްރާއީލް އާއި ސަރަހައްދުގެ އެހެން ޤައުމުތަކުގެ ވެސް ކަންބޮޑުވުންތަކަށް ރިއާޔަތް ކުރުމަށް ފަހު ހުށަހަޅާފައިވާ ޕްލޭނެއް ކަަމަށް، ޓްރަމްޕްގެ ފަރާތުން މެދު އިރުމައްޗަށް ކަނޑައަޅުއްވާފައިވާ ޚާއްސަ މަންދޫބު ސްޓީވް ވިކްޓޮފް ވަނީ ވިދާޅުވެފަ އެވެ.

އެ ބައްދަލުވުމާ ގުޅޭ ގޮތުން މީޑިއާ ތަަކަށް ވިކްޓޮފް ވިދާޅުވެފައި ވަނީ، ކުރިއަށް އޮތް ދުވަސް ތަކުގައި ކުރިއެރުމެއްގެ ވާހަކަ އިއުލާން ކުރެވޭނެ ކަމުގެ ފުރިހަމަ ޔަގީންކަން އޮތް ކަމަށެވެ. އަދި އުންމީދު ކުރެވެނީ ރަނގަޅު މަގުގައި ކަންކަން ކުރިއަށް ދާނެ ކަމަށް ވެސް އޭނާ ވިދާޅުވި އެވެ.

ލީޑަރުންގެ ބައްދަލުވުމަށް ފަހު، އެ ބޭފުޅުން ނެރުއްވި ބަޔާނެއްގައި ވަނީ ޓްރަމްޕް އަށް ޝުކުރު އަދާ ކުރެެއްވުމާ އެކު، ޣައްޒާގައި މިހާރު އޮތް ޙާލަތު ފާހަގަ ކުރައްވައިފަ އެވެ. އަދި ޣައްޒާ ހަނގުރާމަ ނިންމައި، ހުރިހާ ރަހީނުން ދޫކޮށްލައި، އިންސާނީ އެހީ ފޯރުކޮށްދިނުމަށް އިސްކަން ދޭން ޖެހޭ ކަމުގައި ވެސް ވަނީ ފާހަގަ ކުރައްވައިފަ އެވެ.

އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫގެ ސަރުކާރުން ވަނީ ފަލަސްޠީނުގެ މިނިވަން ދައުލަތް ޤާއިމު ކުރުމަށް ކުރަމުން އަންނަ މަސައްކަތް ހުއްޓާނެ ކަމަށް ތަކުރާރުކޮށް ހާމަކޮށްފަ އެވެ. އަދި އެ ފަދަ ނިންމުންތައް ނިންމާ ޤައުމުތަކާ ދެކޮޅަށް ވެސް އިސްރާއީލް އިން އަންނަނީ ވާހަކަ ދައްކަމުންނެވެ.

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ނިމުމަކަށް ގެނެސް، ފަލަސްޠީނުގެ މިނިވަން ދައުލަތާ އެކު، ދެ ދައުލަތުގެ ޙައްލު ހޯދުމަށް ގިނަ ޤައުމު ތަކަކުން އަންނަނީ މަސައްކަތް ކުރަމުންނެވެ. އެކަމުގެ ތެރެއިން ގިނަ ޤައުމު ތަކަކުން ފަލަސްޠީނުގެ މިނިވަން ދައުލަތް ބަލައިގެންފައިވާއިރު، ޤައުމު ތަކުން އަންނަނީ ހަނގުރާމަ ނިންމުމަށް އެދި ޓްރަމްޕް އަށް އިންތިހާ އަށް ބާރު އަޅުއްވަމުންނެވެ.