ރައީސް ޑރ. މުޙައްމަދު މުޢިއްޒުގެ ސަރުކާރު ވެރިކަމަށް ގެންނަން ސޮއިކުރެއްވި ސަތޭކަ ޢިލްމުވެރިން ޣާފިލްކަމުގެ ނިދިން ހޭލަން ޖެހިއްޖެކަމަށް ދީނީ އިލްމްވެރިޔާ އަދި އަދާލަތު ޕާޓީގެ އިލްމްވެރިންގެ މަޖިލީހުގެ ނާއިބް ރައީސް ޑރ. މުޙައްމަދު އިޔާޒު ވިދާޅުވެއްޖެ އެވެ.

އެކްސް މެދުވެރިކޮށް ޕޯސްޓެއް ރިޓްވީޓް ކުރައްވަމުން ޑރ. އިޔާޒު ފާހަގަކުރެއްވި ގޮތުގައި ކަންކަން ހުއްދަވެފައި ޙަރާމްވަނީ ވަކިބަޔަކު ވެރިކަމުގައި ތިބުމަކުން ނޫނެވެ. ޑރ. އިޔާޒް ރިޓްވީޓް ކުރެއްވި ޕޯސްޓްގައި ވާގޮތުން ރައީސް މުއިއްޒުގެ ވެރިކަމުގައި އިންޑިޔާގެ ފަރާތްތަކާއެކު ސަރުކާރުގެ އިސްވެރިން ބައިވެރިވެގެން ބައިނަލްއަގްވާމީ ޔޯގާ ދުވަސް ފާހަގަކޮށްފައިވެ އެވެ. އަދި ފަހުން ފެނިގެންދިޔައީ ރައީސް މުއިއްޒުގެ ކެބިނެޓް މިނިސްޓަރުން ބައިވެރިވެވަޑައިގެން ދިވެހިންގެ މެދުގައި ޔޯގާ އާންމުކުރުމަށް ޔޯގާ ސްޓޫޑިއޯއެއް ހުޅުވި މަންޒަރުކަމުގަ އެވެ.

ޑރ. އިޔާޒު އިތުރަށް ފާހަގަކުރެއްވި ގޮތުގައި ރައީސް މުއިއްޒުގެ ސަރުކާރު ގެންނަން ސޮއިކުރެއްވި ސަތޭކަ ޢިލްމުވެރިން ﷲ އަށް ބިރުވެތިވެ، އިޚްލާޞްތެރިކަމާއެކު ހެޔޮކަންތަކަށް އަމުރުކޮށް މުންކަރާތް މަނާކުރަން މިހާރު މިއޮތީ ޖެހިފަ އެވެ.

ރާއްޖެއަށް މިހާރު ކުރިމަތިވެފައިވާ ވަބާވެރިކަމުގެ އެންމެ ބޮޑު އެއް ސަބަބަކީ މި އިލްމުވެރިންކަމަށް ޑރ. އިޔާޒު ފާހަގަކުރެއްވިއެވެ. އަދި މި އިލްމުވެރިން އެބޭފުޅުންގެ ޒިންމާ އަދާނުކުރައްވާނަމަ، ޤިޔާމަތް ދުވަހުން އެބޭފުޅުންގެ ޙައްޤު މާފެއް ނުކުރެވޭނެކަމަށްވެސް ޑރ. އިޔާޒު ވަނީ ވިދާޅުވެފަ އެވެ.

ޔޯގާ ދުވަސް ފާހަގަކުރުމަށް 2021 ވަނަ އަހަރު ގަލޮޅު ދަނޑުގައި ބޭއްވި ހަރަކާތަށް އޭރު ބަޔަކު ހުރަސް އަޅައި ހުއްޓުވި އެވެ. އޭގެތެރޭގައި މިހާރުގެ ސަރުކާރުގެ އިސް ބައެއް މަގާމުތަކުގައި ތިއްބެވި ބޭފުޅުންނާއި ޕީއެންސީގެ މަޖިލިސް މެންބަރުން ވެސް ހިމެނިވަޑައިގެންނެވި އެވެ. އަދި ޔޯގާ ހެދުން ކުށްވެރިކޮށް އޭރު ވަަރަށް ގިނަ އިލްމުވެރިން އަޑުއުފުލާފައިވެއެވެ. ނަމަވެސް މިހާރު އޭގެ ތެރެއިން ބައެއް އިލްމުވެރިން އެކަން ކުށްވެރިނުކުރާތީ ގިނަ ރައްޔިތުންގެ ފާޑުކިޔުންތައް އެ އިލްމުވެރިންނަށް ވަނީ އަމާޒުވެފަ އެވެ.