އދ އިން ލިބިވައިޑައިގެންނެވީ ހަލާކުވެފައިވާ ކަރަންޓު ސިޑި އަކާއި، ހަލާކުވެފައިވާ ޓެލެޕްރޮމްޓަރެއް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް މިހެން ވިދާޅުވީ އދ ގެ ޖެނަރަލް އެސެމްބްލީގައި ވާހަކަ ދައްކަވަމުންނެވެ.

އދ ގެ ޖެނަރަލް އެސެމްބްލީގައި ވާހަކަ ދައްކަވަމުން ޓްރަމްޕް ވިދާޅުވީ އޭނާގެ މަސައްކަތާއި، އިސްނެގުމުގެ މަތިން ހަތް ހަނގުރާމަ ހުއްޓުމަކަށް ގެެނެސްފައިވާ ކަމަށެވެ. އެގޮތުން އެތައް ޤައުމެއްގެ އިސްވެރިންނާއެކު ވާހަކަ ދައްކަވައި، އެތައް މަޝްވަރާތަކެއް ވެސް އެކަމުގައި ކޮށްފައިވާ ކަމަށް ޓްރަމްޕް ވިދާޅުވި އެވެ.

އެހެން ނަމަވެސް، އެކަމުގައި އޭނާ އަށް އދ ގެ އެއްވެސް އެއްބާރުލުމެއް ނުލިބޭ ކަމަށް ޓްރަމްޕް ވިދާޅުވި އެވެ. އޭނާ ވިދާޅުވީ އދ ގެ ފަރާތުން ލިބުނީ ހަލާކުވެފައިވާ، ނުވަތަ ހުއްޓިފައިވާ ކަރަންޓު ސިޑި އަކާއި ޓެލެޕްރޮމްޓާއެއް ކަމަށެވެ.

ޓްރަމްޕް އެ އިޝާރާތް ކުރެއްވީ އދ ގައި ތަޤުރީރު ކުރެއްވުމަށް އޭނާ ވަޑައިގެންނެވި ފަހު ހިނގައި ދިޔަ ކަންތައް ތަކަށެވެ. އެގޮތުން ޓްރަމްޕް އާއި އޭނާގެ އަނބިކަނބަލުން މެލޭނިއާ ޓްރަމްޕް އދ ގެ މައި މަރުޒަކަށް ވަޑައިގެން، ކަރަންޓު ސިޑި އަށް އަރައިވަޑައިގެންނެވި ވަގުތު، ކުއްލި އަކަށް އެ ސިޑި ވަނީ ހުއްޓިފަ އެވެ. ޓްރަމްޕް އާއި އަނބިކަނބަލުން އަރައި ވަޑައިގެންނެވުމުގެ ކުރިން އެ ސިޑި ހުރީ ރަނގަޅަށެވެ.

ކަރަންޓު ސިޑި ހުއްޓުމާ އެކު، ޓްރަމްޕް އާއި މެލޭނިއާ ވަނީ ހިންގަވާފައި އެ ސިޑިން މައްޗަށް އަރައި ވަޑައިގެންފަ އެވެ އެކަމަށް އިޝާރާތް ކުރައްވަމުން ޓްރަމްޕް ވިދާޅުވީ އޭނާގެ އަނބިކަނބަލުން ރަނގަޅު ޞިއްޙަތެއްގައި ނެތް ނަމަ، ވެއްޓުނީސް ކަމަށެވެ. މެލޭނިއާ ހުންނެވީ ރަނގަޅު ޞިއްޙަތެއްގައި ކަމަށް ފާހަގަ ކުރައްވައި ޓްރަމްޕް ވިދާޅުވީ، އޭނާ ވެސް ހުންނެވީ ރަނގަޅު ޞިއްޙަތެއްގައި ކަމަށެވެ.

އޭގެ ފަހުން އދ ގެ ޖެނަރަލް އެސެމްބްލީގައި ޓްރަމްޕް ތަޤުރީރު ކުރައްވަން ފެއްޓެވުމާ އެކު، އޭނާގެ ކުރިފުޅުމަތީގައި ހުރި ޓެލެޕްރޮމްޓަރ ހުއްޓުނެވެ. ޓެލެޕްރޮމްޓާ މަސައްކަތް ކުރުމުގައި މައްސަލަތަކެއް ދިމާވުމުން ޓްރަމްޕް ވިދާޅުވީ، ޓެލެޕްރޮމްޓާ އޮޕަރޭޓް ކުރާ މީހާ ވަރަށް ބޮޑު އުނދަގުލެއްގައި ޖެހޭނެ ކަމަށެވެ.

ޓްރަމްޕް ވިދާޅުވީ އދ އިން އޭނާ އަށް ލިބިވަޑައިގެންނެވީ ދެ އެއްޗެއް ކަމަށެވެ. އެއީ ހަލާކުވެފައިވާ ކަރަންޓު ސިޑި އަކާއި ހަލާކުވެފައިވާ ޓެލެޕްރޮމްޓަރ އެއް ކަމަށެވެ. އަދި ވިދާޅުވީ އެކަމަށްޓަކައި އދ އަށް ވަރަށް ބޮޑަށް ޝުކުރު އަދާ ކުރައްވާ ކަމަށެވެ.

"ޔުނައިޓެޑް ނޭޝަންސްއިން އަޅުގަނޑަށް ލިބުނީ ދެ އެއްޗެއް - ހަލާކުވެފައިވާ އެސްކަލޭޓަރެއް އަދި ހަލާކުވެފައިވާ ޓެލެޕްރޮމްޕްޓަރެއް،" ޓްރަމްޕް 193 މެމްބަރުންގެ މައްޗަށް އެކުލެވޭ އެސެމްބްލީ ގައި ވިދާޅުވިއެވެ.

އެސްކަލޭޓަރު ހުއްޓުނު މައްސަލަ ވައިޓް ހައުސްގެ ޕްރެސް ސެކްރެޓަރީ ކެރޮލައިން ލެވިޓް ވަނީ ވަރަށް ސީރިއަސް ކަމެއްގެ ގޮތުގައި ފާހަގަ ކޮށްފައެވެ.

"ޔޫއެންގެ މީހަކު ގަސްތުގައި ރައީސާއި ފަސްޓް ލޭޑީ އެސްކަލޭޓަރަށް އަރަމުންދަނިކޮށް ހުއްޓުވާލައިފިނަމަ، އެމީހަކު ވަޒީފާއިން ވަކިކޮށް ތަޙުޤީޤު ކުރަންޖެހޭނެ،" އޭނާ މި ހާދިސާއަށްފަހު އެކްސްގައި ކުރި ޕޯސްޓެއް ގައި ބުނެފައިވެއެވެ.

އދ. ގެ ތަރުޖަމާނު ސްޓެފާން ޑުޖަރިކް ވިދާޅުވީ އެސްކަލޭޓަރުގެ ސެންޓްރަލް ޕްރޮސެސިންގ ޔުނިޓްގެ ރެކޯޑު ތަކުން ދައްކާގޮތުގައި "އެސްކަލޭޓަރުގެ މަތީކޮޅުގައި ހަރުކުރެވިފައިވާ ކޮމް ސްޓެޕްގެ ސޭފްޓީ މެކޭނިޒަމް ޓްރިގަރވުމުން" އެސްކަލޭޓަރު ހުއްޓުނީއެވެ.

އޭނާ ވިދާޅުވީ އެހެން ދިމާވީ ޓްރަމްޕްގެ ވީޑިއޯގްރާފަރު ފަސްޓް ލޭޑީ މެލާނިއާ ޓްރަމްޕްއާއެކު ވަޑައިގަތުން ވީޑިއޯ ކުރުމަށް އެސްކަލޭޓަރު ދަތުރު ކުރި ކޮޅާ އިދިކޮޅަށް ހިނގާފައިވާ ކަމަށެވެ. އަދި އެގޮތައް ހަރަކާތްތެރި ވުމުގައި ނޭނގި އޭނާ އަށް އެސްކަލޭޓަރު ހުއްޓާލާ ލެވުނީ ކަމުގައެވެ.

"ވީޑިއޯގްރާފަރަށް އޮޅުމެއްގެ ތެރޭގައި ސޭފްޓީ ފަންކްޝަން ޓްރިގަރ ކޮށްފައިވެދާނެ،" ޑުޖަރިކް ބަޔާނެއްގައި ވިދާޅުވިއެވެ. "ސޭފްޓީ މެކޭނިޒަމް ފަރުމާކުރެވިފައިވަނީ މީހުން ނުވަތަ ތަކެތި އެކްސިޑެންޓަކުން ޖެހި ހިފެހެއްޓި ނުވަތަ ގިއަރިންގއަށް ދަމައިގަނެވުން ހުއްޓޭ ގޮތަށެވެ."

ޓްރަމްޕް ވާހަކަފުޅު ދައްކަވަމުން ގެންދަވަނިކޮށް ޓެލެޕްރޮމްޕްޓަރު ހުއްޓުމުން އޭނާ އަށް ޖެހިވަޑައިގަތީ ޕޯޑިއަމް ގައި އޮތް ކޮޕީ ބައްލަވައިގެން ވާހަކަފުޅު ދައްކަވާށެވެ.

ޓެލެޕްރޮމްޓަރ ހުއްޓުމާ ގުޅޭގޮތުން، ޓްރަމްޕް ޖެނެރަލް އެސެމްބްލީ އަށް ވިދާޅުވީ: "މި ޓެލެޕްރޮމްޕްޓަރު އޮޕަރޭޓް ކުރާ މީހާ އަށް ވަރަށް ބޮޑު މައްސަލައެއް ކުރިމަތިވާނެ،" ކަމުގައެވެ.

ނަމަވެސް، ޔޫއެންގެ އޮފިޝަލެއް ވިދާޅުވީ ޓެލެޕްރޮމްޕްޓަރު އޮޕަރޭޓް ކުރީ ވައިޓް ހައުސް އިން އަމިއްލައަށް ކަމުގައެވެ.

ޓްރަމްޕް ވާހަކަފުޅު ނިންމެވުމަށްފަހު، ޔޫއެން ޖެނެރަލް އެސެމްބްލީގެ ރައީސާ އަންނަލެނާ ބެއަރބޮކް ވިދާޅުވީ: "ޔޫއެންގެ ޓެލެޕްރޮމްޕްޓަރުތައް ދަނީ ރަނގަޅަށް މަސައްކަތް ކުރަމުންނެވެ."