މަސްތުވާތަކެތި ބޭނުންކުރިކަމުގެ ތުހުމަތުގައި ހައްޔަރުކުރި މީހަކު ކޯޓުން ދޫކޮށްލީ ގަވާއިދާ ހިލާފަށް ހުއްޓުވުމުން!

މަސްތުވާތަކެތި ބޭނުންކުރިކަމުގެ ތުހުމަތުގައި ހައްޔަރުކުރި މީހަކު ކޯޓުން ދޫކޮށްލީ ގަވާއިދާ ހިލާފަށް ފުލުހުން އޭނާ ހުއްޓުވުމުން ކަމަށް ކްރިމިނަލް ކޯޓުން ބުނެފިއެވެ.

މަސްތުވާތަކެތި ބޭނުންކުރާކަމުގެ ތުހުމަތުގައި ހައްޔަރުކޮށްފައިވަނީ ޏ.ފުވައްމުލައް، ދިގުވާނޑު، މެހެލަގެ 38 އަހަރުގެ އިބްރާހިމް އަމީލްއެވެ.

މިމަހުގެ 22 ވަނަ ދުވަހު އޭނާ ހައްޔަރުކުރުމަށްފަހު ކޯޓަށް ހާޒިރު ކުރުމުން ޝަރުތެއްނެތި ވަނީ ދޫކޮށްލާފައެވެ.

ބަންދުން ދޫކޮށްލުމަށް އަމުރުކުރި ސަބަބުގެ ގޮތުގައި ބުނެފައިވަނީ، ފުލުހުން އަމީލް ހުއްޓުވާފައިވަނީ ޕެޓްރޯލް ކުރަމުންދަނިކޮށް އޭނާގެ މައުލޫމާތު ސާފުކުރުމަށެވެ. ކޯޓު އަމުރެއްނެތި މީހަކު ހުއްޓުވާނަމަ، އެކަން ކުރެވޭނީ ޖިނާއީ އިޖުރާއަތުގެ ގާނޫނުގެ 38 ވަނަ މާއްދާގެ (ރ)ގެ ދަށުން އެ މައްދާގައި ބަޔާންކޮށްފައިވާ ހާލަތެއް މެދުވެރިވުން ކަމަށެވެ. މި މާއްދާގައި ބަޔާންކޮށްފައިވާ ފަދަ ހާލަތެއް މި މައްސަލައިގައި ވުޖޫދުވެފައި ނުވާކަން ފުލުހުންގެ ބަޔާނުން އެނގޭ ކަމަށް އަމުރުގައިވެއެވެ.

އޭގެ އިތުރުން އޭނާ ހުއްޓުވާފައިވަނީ މައުލޫމާތު ސާފުކުރުމަށް ކަމަށް ބަޔާންކޮށްފައިވާއިރު، މައުލޫމާތު ސާފުކުރުމަށް ހުއްޓުވީ ކޮން ކަމަކަށް ތުހުމަތު ކުރެވިގެން ކަމެއް ބަޔާންކޮށްފައިނުވެއެވެ.

އެހެންކަމުން އަމީލް ހުއްޓުވާފައިވަނީ ޖިނާއީ އިޖުރާއަތުގެ ގާނޫނުގެ 38 ވަނަ މާއްދާއާ ހިލާފަށް ކަމަށް ކަނޑައަޅައި، ބަންދުން ދޫކުރުމަށް ނިންމީ ކަމަށް ކޯޓު އަމުރުގައި ބުނެފައިވެއެވެ.