ސައޫދީގެ މުފްތީ ޢަބްދުލް ޢަޒީޒް އަވަހާރަ ވެއްޖެ

ސައުދީ އަރަބިއްޔާގެ މުފްތީ، ޝައިޚް ޢަބްދުލް ޢަޒީޒް ބިން ޢަބްދުﷲ އާލް އައްޝައިޚް އަވަހާރަ ވެއްޖެ ކަމަށް ސައުދީގެ ރޯޔަލް ކޯޓުން އިއުލާން ކޮށްފި އެވެ.

ސައުދީގެ ޕްރެސް އެޖެންސީ (އެސްޕީއޭ) އިން ރަސްމީކޮށް ހާމަކޮށްފައިވާ ގޮތުގައި، ރޯޔަލް ކޯޓުން ބުދަ އަންގާރަ ދުވަހު ވަނީ މުފްތީ ޢަބްދުލް ޢަޒީޒް އަވަހާރަވެފައިވާކަން ހާމަކޮށްފަ އެވެ.

ރޯޔަލް ކޯޓުގެ ބަޔާނުގައި ބުނެފައި ވަނީ، ޢަބްދުލް ޢަޒީޒް އަވަހާރަވެފައި ވަނީ އަންގާރަ ދުވަހުގެ ހެނދުނުގެ ވަގުތެއްގައި ކަމަށެވެ. ބަޔާނުގައި ބުނެފައި ވަނީ ޢަބްދުލް ޢަޒީޒް އަވަހާރަވުމާ އެކު، ސައުދީ އަރަބިއްޔާ އާއި މުޅި އިސްލާމީ އުންމަތަށް ވަނީ ހިތާމަވެރިކަން ކުރިމަތިވެފައި ކަމަށެވެ. އަދި ޢަބްދުލް ޢަޒީޒް އަކީ އިސްލާމްދީނާއި، މުސްލިމުންނަށް ޚިދުމަތް ކުރެއްވުމުގައި ފާހަގަކޮށްލެވޭ ޝަޚުސިއްޔަތެއް ކަަމަށް ވަނީ ފާހަގަ ކޮށްފަ އެވެ.

ސައުދީ އަރަބިއްޔާގެ ރަސްގެފާނު ސަލްމާން ބިން ޢަބްދުލް ޢަޒީޒް އަދި ވަލީ އަޙުދު މުޙައްމަދު ބިން ސަލްމާން ވަނީ ޢަބްދުލް ޢަޒީޒްގެ އާއިލާއަށާާއި، ސައުދީ އަރަބިއްޔާގެ ރައްޔިތުން އަދި މުޅި އިސްލާމީ އުންމަތަށް ވެސް ތައުޒިޔާ ވިދާޅުވެފައި އެވެ.

ދީނީ ޢިލްމުވެރިންގެ އެންމެ މަތީ މަޖިލީހުގެ ރައީސްކަން ވެސް ކުރައްވާފައިވާ ޢަބްދުލް ޢަޒީޒްގެ ޖަނާޒާ އޮންނާނީ، ރިޔާދުގައި ހުންނަ އިމާމް ތުރުކީ ބިން ޢަބްދުﷲ މިސްކިތުގަ އެވެ. އަދި މެންދުރު ނަމާދަށް ފަހު ޢަބްދުލް ޢަޒީޒްގެ ޖަނާޒާ އޮންނާނެ ކަމަށް ވަނީ ބުނެފަ އެވެ.

ޢަބްދުލް ޢަޒީޒް އަވަހާރަވުމާ ގުޅިގެން، ސައުދީގެ ރަސްގެފާނުގެ އަމުރުފުޅަށް، މައްކާ އާއި މަދީނާގެ މިސްކިތްތަކުގައި އަދި ސައުދީ އަރަބިއްޔާގެ އެހެނިހެން މިސްކިތްތަކުގައި ވެސް މެންދުރު ނަމާދަށް ފަހު ޢަބްދުލް ޢަޒީޒްގެ މައްޗަށް ޣައިބަށް ކަށު ނަމާދު ކުރެވޭނެ އެވެ.