ވަޒީރުންގެ މެޑިކަލް އިންޝުއަރެންސް ދެގުނަ ބޮޑު ކުރި އިރު އާންމު ރައްޔިތުންގެ ސިއްހީ އިންޝުއަރެންސް ތަންފުކެއް ވެސް ބޮޑު ނުކުރޭ
ޕްރައިވެޓް އިންޝުއަރެންސްއަށް ހަމަޖެއްސި ފައިސާ އިތުރުކޮށް 99 މިލިއަން ރުފިޔާއަށް ގެނެސްފައިވާއިރު އާސަންދައަށް ހަމަޖެއްސި ފައިސާ އިތުރު ކޮށްފަ އެއް ނެތް
އާސަންދަ ޚިދުމަތާ ބެހޭ މައުލޫމާތު ދިނުމުގެ ސެޝަނެއްގެ ތެރެއިން
ރައީސް މުއިއްޒުގެ ސަރުކާރުގެ 2026 ވަނަ އަހަރަށް ރެކޯޑް އަދަދެއްގެ ބަޖެޓް ހުށަހެޅި އިރު، ވަޒީރުންގެ އިންޝުއަރެންސް ދެގުނަ ބޮޑު ކޮށްފައިވާއިރު އާންމު ރައްޔިތުންގެ އާސަންދަ ބަޖެޓް އެންމެ ތަންފުކެއް ވެސް ބޮޑު ނުކުރާކަން ހާމަ ވެއްޖެ އެވެ.
ގިނަ އަދަދެއްގެ އާންމު ރަައްޔިތުންނަށް ބޭސް ފަރުވާ ކުރުމުގައި ބޮޑެތި ދަތިތަކެއް ކުރިމަތިވެފައިވާ އިރު މުއިއްޒުގެ ސަރުކާރުން ގެންދަނީ އާސަންދަ ދިނުމުގައި އިތުރަށް ފިއްތުންތައް ކުރިމަތި ކުރުވުމުންނެވެ.
2026 ވަނަ އަހަރަށް ލަފާ ކުރާ 64.2 ބިލިއަން ރުފިޔާގެ ބޮޑު ބަޖެޓް ހުށަހަޅާފައިވާއިރު، ބަޖެޓުގައި އާސަންދަ އަށް ކަނޑައަޅާފައިވާ އަދަދު ވަނީ 2 ބިލިއަން ރުފިޔާ ގައި ދަމަހައްޓާފައެވެ.
މިކަން މިހެން އޮތް އިރު، އާސަންދައިން މިހާރުވެސް ދައްކަން ޖެހޭ ބިލުތަކަށް ފައިސާ ދެއްކުމުން ބޭސް ފަރުވާގެ އެހީތެރިކަމަށް އާންމުންނަށް އޮންނާނީ ވަރަށް ކުޑަ އެއްޗެއް ކަމަށް ބެލެވެއެވެ. ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންއެސްޕީއޭ) އާއި އާސަންދަ އިން ހޮސްޕިޓަލްތަކަށާއި، ކްލިނިކްތަކަށާއި، ފާމަސީތަކަށް 1.15 ބިލިއަން ރުފިޔާއަށް ވުރެ ގިނައިން ފައިސާ ދައްކަންޖެހެއެވެ.
ގައުމީ ސިއްހީ އިންޝުއަރެންސް ނިޒާމަށް މާލީ ބުރަތައް ކުރިމަތިވެފައިވާއިރު، ފައިސާ ދެއްކުން ލަސްވުމުގެ ސަބަބުން ބޭރުގެ ބައެއް ހޮސްޕިޓަލްތަކުން އާސަންދައިގެ ދަށުން ފަރުވާ ކުރުން ވަނީ ހުއްޓާލާފައެވެ.
މިކަންކަން މިހެން އޮތް ނަމަވެސް އާސަންދަ ރަނގަޅު ކުރުމުގެ ބަދަލުގައި ސަރުކާރުން އިސްކަން ދީފައިވަނީ މިނިސްޓަރުންނާއި، މަޖިލިސް މެމްބަރުން ފަދަ މަތީ މަގާމުތަކުގައި ތިބި ފަރާތްތަކުގެ މެޑިކަލް އިންޝުއަރެންސް އިތުރަށް ވަރުގަދަ ކުރުމަށް ކަން ފާހަގަ ކުރެވެއެވެ.
2026 ވަނަ އަހަރުގެ ބަޖެޓުން ޕްރައިވެޓް އިންޝުއަރެންސް އަށް ހަމަޖެއްސި ފައިސާ އިތުރުކޮށް 99 މިލިއަން ރުފިޔާއަށް ވަނީ ބޮޑު ކޮށްފައެވެ. 2025 ވަނަ އަހަރު މި ބަޔަށް ކަނޑައަޅާފައި އޮތީ 55 މިލިއަން ރުފިޔާއެވެ. އަދި 2024 ވަނަ އަހަރުގެ އަދަދަކީ 46 މިލިއަން ރުފިޔާއެވެ. މި ބަޖެޓް ލައިނުގެ ދަށުން ހޭދަކުރާ ފައިސާ އިން ފަނޑިޔާރުންނާއި، މިނިސްޓަރުންނާއި، މަޖިލިސް މެންބަރުންނާއި، އެހެނިހެން އިސް އޮފިޝަލުންނަށް މެޑިކަލް ކަވަރު ކުރާ އިރު މިނިސްޓަރުންނަށް އެކަނި ވެސް އިންޝުއަރެންސް ދެ ގުނަ އިތުރު ކޮށްފައި ވެއެވެ. މި އަހަރު ކަނޑައަޅާފައި އޮތް 2.5 މިލިއަން ރުފިޔާއިން 2026 ވަނަ އަހަރު 5.3 މިލިއަން ރުފިޔާއަށް މިނިސްޓަރުންގެ އިންޝުއަރެެންސް ވަނީ ބޮޑު ކޮށްފައެވެ.
