ދާއިމީ ބައްޔެއް ތަހައްމަލް ކުރާ މީހުންނަށް ޕެންޝަން ފަންޑުން ފައިސާ ދޫކުރެވޭނެ ގޮތެއް ހޯދެން ޖެހޭ ކަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް (ކުޑޫ) ވިދާޅުވެއްޖެއެވެ.

އޭނާ ވަނީ ޤާނޫނު ނަންބަރު 8/2009 (ދިވެހިރާއްޖޭގެ ޕެންޝަނާބެހޭ ޤާނޫނު) އަށް އަށް އިސްލާހެއް ހުށަހަޅުއްވާފައެވެ. ހޯމަ ދުވަހު އޮތީ އެ އިސްލާހުގެ އިބްތިދާއީ ބަހުސްގެ މަރުހަލާއެވެ. އެ އިސްލާހު ހުށަހެޅުއްވަމުން ކުޑޫ ވީ ޓަރމިނަލް އިލްނެސް ނުވަތަ ދާއިމީ ބަލިތައް ތަހައްމަލް ކުރާ މީހުންނަށް ޕެންޝަންގެ ފައިސާ ބޭނުން ކުރެވޭނެ ހާލަތެއް އޮންނަން ޖެހޭ ކަމަށެވެ. އަދި ބަލި މީހާ އާއި އޭނާގެ އާއިލާ އަށް ނަފްސާނީ ފަރުވާތައްދޭ ބަލިތަކަށް ދައިމީ ބޭސްފަރުވާ ކުރުމަށް އުސޫލުތަކެއް އެކަށައަޅަން ޖެހޭ ކަމަށް އޭނާ ވަނީ ވިދާޅުވެފައެވެ.

"އެފަދަ ބަލިތަކަށް ފަރުވާ ހޯދާ ފަރާތްތަކަށް ދިމާވާ ދަތިކަން ހައްލުކޮށްދިނުމަށް, އެފަދަ ބަލިތަކަށް ފަރުވާ ހޯދުމަށް ބޭނުންވާ ފައިސާ ލިބޭ މަގު ތަނަވަސްކޮށްދިީ ކްލެއިމް ކުރުމުގެ އިޖުރާއަތުތައް ފަސޭހަ ކުރުމަށް ޕެންޝަން ސްކީމުން މި ފައިސާ ނެގޭނެ އިންތިޒާމް ހަމަޖައްސަން އިސްލާހު ހުށަހެޅީ." ކުޑޫ ވިދާޅުވިއެވެ.

ޕެންޝަންގެ އެންމެ ބޮޑު ބޭނުމަކީ އުމުރުން ދުވަސްވާ އިރު ސެކިއުރިޓީ ލިބޭނެ ގޮތެއް ހަމަޖެއްސުން ކަަމަށްވީ ނަމަވެސް އެ މަގްސަދު ހާސިލް ނުވާ ކަމަށް ކެންދޫ ދާއިރާގެ މެމްބަރު މައުރޫފް ޒާކިރު ވަނީ ވިދާޅުވެފައެވެ. ޕެންޝަން ފައިސާ ބޭނުން ކުރަން ޖެހޭ ފަދަ ހާލަތެއް އައުމުން ވެސް އެ ފައިސާ ހޭދަކުރެވޭނެ މަގެއް ނެތުމަކީ އާއްމުންގެ ވަރަށް ބޮޑު ކަންބޮޑުވުމެއް ކަމަށް މައުރޫފް ވިދާޅުވިއެވެ. ޚާއްސަކޮށް ދާއިމީ ބައްޔަކަށް ފަރުވާ ކުރާ މީހުންނަށް ޕެންޝަން ފަންޑުން ލިބޭ ފައިސާ ބޭނުން ކުރެވޭނެ މަގެއް ހޯދުން މުހިންމު ކަމަށް މައުރޫފް ވިދާޅުވިއެވެ.

މައުރޫފްގެ އިތުރުން ހަނިމާދޫ ދާއިރާގެ މެމްބަރު އަބްދުލް ޣަފޫރު މޫސާ އާއި މަޖިލީހުގެ އެހެން ބައެއް މެމްބަރުން ވަނީ މި އިސްލާހަށް ވާހަަކަ ދައްކަވާފައެވެ. އެ ބޭފުޅުން ވިދާޅުވީ ޕެންޝަން ފަންޑުން ފައިސާ ނެގޭ ގޮތަށް އިންތިޒާމް ހަމަޖެއްސުމުގެ ބަދަލުގައި އާސަންދަ އާއި ސިއްހީ ފަރުވާގެ ނިޒާމްގެ ތެރެއިން ދާއިމީ ބަލިތަކަށް ފަރުވާ ހޯދުމުގެ ނިޒާމް ހަރުދަނާކުރުމަށް ވަނީ ގޮވާލައްވާފައެވެ.