އެކުވެރި ޤައުމު ތަކުން ފަލަސްޠީނުގެ ދައުލަތް ބަލައި ގަންނަނީ "ދައްކާލަން" ކުރާ ކަމެއްގެ ގޮތުގައި ކަމަށް އެމެރިކާ އިން ބުނެފި

އެމެރިކާއާ އެކުވެރި ބައެއް ޤައުމު ތަކުން ފަަލަސްޠީނުގެ މިނިވަން ދައުލަތް ބަލައި ގަންނަން ނިންމަނީ، "ދައްކާލަން" ކުރާ ކަމެއްގެ ގޮތުގައި ކަމަަށް އެ ޤައުމުން ބުނެފި އެވެ.

އިނގިރޭސިވިލާތާއި، އޮސްޓްރޭލިއާ، ކެނެޑާ އަދި ޕޯޗުގަލް އިން ވަނީ ފަލަސްޠީނުގެ މިނިވަން ދައުލަތް ޤަބޫލު ކުރުމަށް ނިންމައިފަ އެވެ. އިނގިރޭސިވިލާތުގެ ބޮޑު ވަޒީރު ކިއާ ސްޓާމާގެ އިތުރުން، އޮސްޓްރޭލިއާގެ ބޮޑު ވަޒީރު އެންތަނީ އަލްބަނީސް އަދި ކެނެޑާގެ ބޮޑު ވަޒީރު މާކް ކާނީ ވަނީ އެކަން ރަސްމީކޮށް އިއުލާން ކުރައްވައިފަ އެވެ. މި ތިން ޤައުމަކީ ވެސް އެމެރިކާއާ ގާތް ގުޅުމެއް ބާއްވަމުން އަންނަ ތިން ޤައުމެވެ.

ޤައުމު ތަކުން އެކަން އިއުލާން ކުރުމާ ގުޅިގެން އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާނު ވިދާޅުވެފައި ވަނީ، އެމެރިކާގެ އަމާޒަކީ މިވަގުތު ސީރިއަސް ޑިޕްލޮމަސީއެއް ގެންގުޅުން ކަމަށާއި، ދައްކާލުމުގެ ނިޔަތުގައި ކުރާ ކަންކަމަށް އެ ޤައުމުގެ ޝައުޤުވެރިކަމެއް ނެތް ކަމަށެވެ.

އެގޮތުން ހަމާސް އިން ރަހީނު ކޮށްފައިވާ އިސްރާއީލްގެ ރައްޔިތުން މިނިވަން ކުރުމާއި، އިސްރާއީލްގެ ސަލާމަތާއި، ހަމާސްގެ ނުފޫޒުން އެއްކިބާވެފައިވާ ސަރަހައްދެއް ހޯދައި، ސުލްހަ އާއި ފާގަތިކަން ޤާއިމު ކުރުމަކީ އެމެރިކާ އިން އިސްކަން ދެމުން އަންނަ ކަންތައްތައް ކަމަށް ތަރުޖަމާނު ވިދާޅުވެފައިވެ އެވެ.

އިނގިރޭސިވިލާތާއި، އޮސްޓްރޭލިއާ އަދި ކެނެޑާ އިން ފަލަސްޠީނުގެ މިނިވަން ދައުލަތް ޤަބޫލު ކުރުމަކީ، އަނެއްކާ ވެސް މަޝްރަހަށް އަންނާނެ ވަރަށް ބޮޑު ބަދަލެއް ކަމަށް ތަޖުރިބާ ކާރުން ވަނީ އަންދާޒާ ކޮށްފަ އެވެ. އެ ނިންމުމާ ގުޅިގެން އެމެރިކާ އާއި އިސްރާއީލް އިން ވެސް ވަނީ އެ ޤައުމު ތަކަށް ނުރުހުން އަމާޒު ކޮށްފަ އެވެ.

ފަލަސްޠީނުގެ މިނިވަން ދައުލަތް ޤަބޫލު ކުރަން ނިންމާފައިވާކަން ޤައުމު ތަކުން އިއުލާން ކުރުމާ އެކު، ފަލަސްޠީނުގެ ރައީސް މަޙުމޫދު އައްބާސް ވަނީ އެ ނިންމުމަށް މަރުޙަބާ ވިދާޅުވެފަ އެވެ. އަދި ޣައްޒާގެ ގިނަ ރައްޔިތުން ވެސް ވަނީ އެ ނިންމުން ބަލައި ގަންނަން ނިންމައިފަ އެވެ. އެކަމާ ގުޅިގެން އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ކޯފާވެފައިވާއިރު، އޭނާ ވިދާޅުވެފައި ވަނީ ފަލަސްޠީނުގެ ދައުލަތެއް ދުވަހަކު ވެސް ވުޖޫދަށް ނާންނާނެ ކަމަށެވެ.

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ އާއި، ލާއިންސާނީ އަމަލު ތަކުގެ ސަބަބުން އެތައް ޕްރެޝަރެއް އެ ޤައުމަށް ވަނީ ކުރިމަތިވެފަ އެވެ. މި ޤައުމު ތަކުން ފަލަސްޠީނުގެ މިނިވަން ދައުލަތް ބަލައި ގަންނަން ނިންމީ ވެސް، އިސްރާއީލްގެ އަނިޔާވެރިކަން ހައްދުފަހަނަ އަޅާ ދިޔުމުންނެވެ. އެއާއެކު، ބައިނަލްއަޤުވާމީ ފެންވަރުގައި ވެސް އިސްރާއީލް އަށް އަންނަނީ ގިނަ ފާޑު ކިޔުންތައް އަމާޒު ވަމުންނެވެ.

ނަތަންޔާހޫ ވިދާޅުވެފައި ވަނީ، ފަަލަސްޠީނުގެ މިނިވަން ދައުލަތް ޤަބޫލު ކުރުމަކީ މޮޔަ ކަމެއް ކަމަށެވެ. އަދި އެކަމުން އިސްރާއީލްގެ ސިޔާދަތަށް ވެސް ނުރައްކާ ވާނެ ކަމަށް އޭނާ ވަނީ ވިދާޅުވެފަ އެވެ. ނަތަންޔާހޫ ވިދާޅުވެފައި ވަނީ "ޖޯޑަންގެ ކޮޅުފައި މަގުގެ ހުޅަނގުގައި ފަލަސްޠީނުގެ ދައުލަތެއް ޤާއިމު ނުކުރެވޭނެ" ކަމަށެވެ.