ކުރިން އެވޯޑްކޮށްފައި ހުރި މަޝްރޫއުތައް ހުއްޓި ވާނުވާގައި އޮތުމުން މ. ވޭވަށު ރައްޔިތުން ޝަކުވާކޮށްފި
ނަރުދަމާގެ މަޝްރޫޢު ނުނިމި ލަސްވަމުންދާތީ ރައްޔިތުން ކަންބޮޑުވުން ފާޅުކުރި
މ. ވޭވަށު ރައްޔިތުންނާއެކު ބޭއްވި ބައްދަލުވުމުގެ ތެރެއިން
މ. ވޭވަށުގައި ކުރިން އެވޯޑު ކުރެވިފައި ހުރި ގިނަ މަޝްރޫއުތައް ހުއްޓި، ވާނުވާއެއްގެ ތެރޭގައި އޮތުމާ ގުޅިގެން، އެ މައްސަލަތައް ހައްލުކޮށްދެއްވުމަށް އެދި ރަށުގެ ރައްޔިތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އަރިހުގައި ޝަކުވާކޮށްފިއެވެ.
ވޭވަށު ސްކޫލުގައި ބޭއްވުނު މަޝްވަރާ ބައްދަލުވުމުގައި ރަށުގެ ކައުންސިލާއި ރައްޔިތުން ވަނީ ރަށުގެ އާންމު އިޖުތިމާއީ ތަރައްޤީއަށް ބޭނުންވާ ކަންކަން ރައީސުލްޖުމްހޫރިއްޔާއާ ހިއްސާކޮށްފައެވެ. މިގޮތުން ކުޅިވަރު ދަނޑުތައް ތަރައްޤީކުރުމާއި، ފަތުރުވެރިކަމަށް ފަހި މާހައުލެއް ޤާއިމުކުރުމުގެ އިތުރުން، ބޯހިޔާވަހިކަމުގެ މަޝްރޫޢު ހިންގުމަށާއި، ސްކޫލުގެ ޖާގައިގެ ދަތިކަން ހައްލުކޮށްދިނުމަށް ރައްޔިތުން ވަނީ އެދިފައެވެ.
ބައްދަލުވުމުގައި ވާހަކަދެއްކި ގިނަ ރައްޔިތުން ވަނީ ނަރުދަމާގެ މަޝްރޫޢު ނުނިމި ލަސްވަމުންދާތީ އެކަމުގެ ކަންބޮޑުވުން ފާޅުކޮށްފައެވެ. އެ މަޝްރޫޢު ނިމޭނެ ތާރީޚަކާއި، މަސައްކަތް ލަސްވަމުންދާ ސަބަބު ސަރުކާރުން ހާމަކޮށްދިނުމަށް ރައްޔިތުން ވަނީ އެދިފައެވެ. ތަރައްޤީގެ ގޮތުން ރަށް ފަހަތަށް ގޮސްފައިވާކަމަށް ބައެއް ރައްޔިތުން ފާހަގަކުރި އިރު، ކައުންސިލުގެ ރައީސް ވަނީ އެކަމަށް އެއްބަސްވެފައެވެ.
ރައްޔިތުންގެ ކަންބޮޑުވުންތަކަށް ޖަވާބުދެއްވަމުން ރައީސުލްޖުމްހޫރިއްޔާ ވިދާޅުވީ، ރަށުގެ ތަރައްޤީއަށް ކުރަންހުރި މަސައްކަތްތައް ހަލުވި ދުވެއްޔެއްގައި ކުރިއަށް ގެންދަވާނެ ކަމަށެވެ. އެގޮތުން 2026 ވަނަ އަހަރުގެ ބަޖެޓުގައި ބަނދަރު ތަރައްޤީކުރުމުގެ މަޝްރޫޢު ހިމަނުއްވައި، އެ އަހަރުގެ ދިރާސީ އަހަރު ފެށުމުގެ ކުރިން ސްކޫލުގެ ޖާގައިގެ ދަތިކަން ހައްލުކޮށްދެއްވާނެކަމަށް އެމަނިކުފާނު ވިދާޅުވިއެވެ.
މީގެ އިތުރުން ކުޅިވަރުގެ ވަސީލަތްތައް ތަރައްޤީކުރުމާއި، ހެލްތު ސެންޓަރުގެ ތަރައްޤީގެ މަސައްކަތް މި އަހަރުގެ ތެރޭގައި ފެށިގެންދާނެ ކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ. އަދި އެކި މަރުހަލާތަކުގައި ހުއްޓިފައިވާ މަޝްރޫޢުތައް މި އަހަރާއި އަންނަ އަހަރުގެ ކުރީކޮޅަށް ނިންމުމަކީ ސަރުކާރުގެ އަމާޒު ކަމުގައިވެސް އެމަނިކުފާނު ވަނީ ފާހަގަކުރައްވާފައެވެ.
