އިސްލާމީ ހަޟާރާތް ކުރިއަރައިގެންދިޔައީ އިންސާނުންގެ ސިކުނޑީގައި ތަޅުއަޅުވައިގެނެއް ނޫން: އަލީ ހުސެއިން
ރައީސް މުއިއްޒަށް ހިޔާލުފާޅު ކުރުމުގެ މިނިވަންކަމުގެ ހައްގުގެ މުހިންމުކަން އެނގިވަޑައިނުގަންނަވާ
ފަލަސުރުހީ ޕްރޮގްރާމްގައި މަޝްހޫރު ގާނޫނީ ވަކީލް އަލީ ހުސެއިން ވާހަކަދައްކަވަނީ - ފައިލް ފޮޓޯ
އިންސާނާގެ ސިކުނޑީގައި ތަޅުއަޅުވައިގެން ލިބޭނެ ކުރިއެރުމެއް ނޯންނާނެ ކަމަށާއި، އިސްލާމީ ހަޟާރާތް ކުރިއަރައިގެންދިޔައީ ވެސް އެގޮތަށް އަމަލުކޮށްގެން ނޫން ކަމަށް މަޝްހޫރު ގާނޫނީ ވަކީލް އަލީ ހުސެއިން ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އަލީ ހުސެއިން ވިދާޅުވީ ރައީސް ޑރ.މުހައްމަދު މުއިއްޒަށް ހިޔާލުފާޅު ކުރުމުގެ މިނިވަންކަމުގެ ހައްގުގެ މުހިންމުކަން އެނގިވަޑައިނުގަންނަވާ ކަމަށެވެ. އިސްލާމްދީނުގެ ނަޒަރަކުން ރައީސް މުއިއްޒު ވާހަކަ ދައްކަވާއިރު، އިސްލާމީ ހަޟާރާތް ވެސް ކުރިއަރައިގެންދިޔައީ އެ ހައްގު އެގައުމުތަކުގެ ރައްޔިތުންނަށް ދީގެން ކަމަށް އަލީ ހުސެއިން ވިދާޅުވި އެވެ.
އަލީ ހުސެއިން ވިދާޅުވީ އިންސާނާގެ ސިކުނޑީގައި ތަޅުއަޅުވައިގެން ލިބޭނެ ކުރިއެރުމެއް ނޯންނާނެ ކަމަށާއި، ސިކުނޑިތަކަށް ފުރިހަމަ މިނިވަންކަން ދޭންޖެހޭ ކަމަށެވެ.
ރައީސް މުއިއްޒު އެވިދާޅުވާ އިސްލާމިކް ރިނާސަސްއަށް ދިއުމަށްޓަކައި ކިހައި މުހިންމު ހައްގެއްކަމެއް އެނގިވަޑައިނުގަންނަވާ. އުމަވީ ދައުލަތުގެ އިސްލާމީ ހަޟާރަތް ކުރިއަރައިގެން ދިޔައީ އައްބާސިޔަގެ ބަގުދާދުގައި އޭގެ ސައިންސާއި، ޓެކްނޮލޮޖީއާ ބޭސްވެރިކަމާއި ހުރިހާ ފަންނުތަކެއް މުސްލިމުން ކުރިއަރައިގެންދިޔައީ. އަންދަލުސްގައި އޮތް ސްޕެއިންގައި އޮތް އިސްލާމީ ހަޟާރަތުގައި މިހާރު މިބޭނުންކުރާ އަލްޖިބްރާއާއި، އަލްގޮރިދަމްއާ މިހުރިހާ އެއްޗެއް ހެދީ ބަލަ. ސިކުނޑިތަޅުލައިގެން ތިބިބައެއް ނޫނޭ އެކަންކުރީއެއް. ވާހަކައެއް ދެއްކީމަ އެމީހުން ހިފާ ހައްޔަރުކުރީއެއް ނޫނޭ. ހޮޅިވިފައިހުރީ. އިންސާނާ ބޭނުންވާ ވަރަކަށް އޭނާގެ ސިކުނޑިއާ ބުއްދިއާ ފިކުރު ހުޅުވައިގެން އޭނާއަށް ފެންނަ އެއްޗެއް ލިޔުމުގެ މިނިވަންކަންދީގެން ހޯދި ކުރިއެރުމާ ތަމައްދުނާ ތަހުޒީބޭ މުސްލިމުން ހޯދާފައި ހުރީ.މަޝްހޫރު ގާނޫނީ ވަކީލް އަލީ ހުސެއިން
ރާއްޖޭގެ ގިނަ މީޑީއާތައް މިހާރު ކޮންޓްރޯލް ކުރަމުންދަނީ މިސަރުކާރުންކަން ފާހަގަކުރައްވައި އަލީ ހުސެއިން ވިދާޅުވީ މިއީ ބިރުވެރިކަމެއް ކަމަށާއި، އަސްލު މަންޒަރު ގެނައުމަށް އުދަނގޫވާނެ ކަމަށެވެ.
މީގެ އިތުރުން އަލީ ހުސެއިން ވިދާޅުވީ ގާނޫނު އަސާސީން ލިބިދޭ ހައްގުތަކުގެ ތެރެއިން އެންމެ މުހިންމު ދެ ހައްގަކީ ދިރިހުރުމުގެ ހައްގާއި، ހިޔާލުފާޅު ކުރުމުގެ ހައްގު ކަމަށެވެ. އަދި ގާނޫނު އަސާސީން ލިބިދީފައިވާ އެހެން ހުރިހާ ހައްގެއް ސަރުކާރުން ގެންދިޔަ ނަމަވެސް މައްސަލައެއް ނެތް ކަމަށް އޭނާ ވިދާޅުވިއެވެ.
ދެ ހައްގު ބާއްވާފައި ހުރިހާ ހައްގެއް ގެންދަވާ. އަޅުގަނޑު ރެޑީ. އަޅުގަނޑު ތައްޔާރު. ދިރިހުރުމުގެ ހައްގާއި، ހިޔާލުފާޅު ކުރުމުގެ ހައްގާއި މި ދެ ހައްގު ބާއްވާފައި ހުރިހާ ހައްގެއް ގެންދެވިޔަސްއަޅުގަނޑުމެންނަށް ހެޔޮ. އަޅުގަނޑަށް މައްސަލައެއް ނެތް. އެހައިވެސް މުހިންމު ދެ ހައްގު މިއީ. ހަގީގަތުގައި ދެން ހުރި ހުރިހާ ހައްގެއްގެ ފައުންޑޭޝަން މިއީ. އެއްވެ އުޅެނީ ކީއްކުރަން. ހިޔާލު ފާޅުކުރަން. ސިޔާސީ ޕާޓީ ހެދުމުގެ ހައްގު. ކީއްކުރަން. ސިޔާސީ ޕާޓީ އުފައްދަނީ. ވަކި ފިކުރެއް ކުރިއަރުވަން. އެވެސް ގޮސް ގުޅެނީ ހިޔާލު ފާޅުކުރުމުގެ ހައްގާއި، ނޫސް މީޑިއާ ހިންގުމުގެ ހައްގު. މިވެސް ހިޔާލު ފާޅުކުރުމުގެ ހައްގާ ގުޅެނީ އެނގޭތޯ. މިހެން ގޮސް ވަރަށް ގިނަ ހައްގުތަކަކީ ހަގީގަތުގައި ގޮސް ގުޅެނީ އޭގެ މަންމައަކީ ހަގީގަތުގައި ހިޔާލު ފާޅުކުރުމުގެ މިނިވަންކަން އެ ހައްގު.މަޝްހޫރު ގާނޫނީ ވަކީލް އަލީ ހުސެއިން
އަލީ ހުސެއިން ވިދާޅުވީ ހުރިހާ ހައްގެއްގެ މަންމައަކީ ހިޔާލު ފާޅު ކުރުމުގެ ހައްގު ކަމަށެވެ. އަދި ވަކިން ޚާއްސަކޮށް ޑިމޮކްރެޓިކް މުޖުތަމައުއެއްގައި މި ހައްގާ ނުލައި ރަނގަޅު މިސްރާބަކަށް ކުރިއަށް ނުދެވޭނެ ކަމަށް އޭނާ ވިދާޅުވިއެވެ.
