ބުރާސްފަތި ދުވަހު އިސްރާއީލުން ދެކުނު ލުބުނާންގެ ފަސް އަވަށަކަށް ބޮން އަޅައިފިއެވެ.

އިސްރާއީލުން އެ ސަރަހައްދުތަކަށް ބޮން އެޅީ މީހުން ނުކުމެގެން ދިއުމަށް އިންޒާރު ދިންތާ ކުޑަ ވަގުތުކޮޅެއްގެ ތެރޭގައި ކަމަށް ލުބުނާނުގެ ސަރުކާރު މީޑިއާ އަދި އިސްރާއީލު މިލިޓަރީން ބުނެފައިވެއެވެ.

ލުބުނާންގެ ސަރުކާރުގެ ނޭޝަނަލް ނިއުސް އެޖެންސީން ރިޕޯޓުކުރި ގޮތުގައި މައިސް އަލް-ޖަބަލް އަށް ބޮން އަޅާފައިވާއިރު މިއީ މިދިޔަ އަހަރު އިސްރާއީލާއި ހިޒްބުﷲ އާ ދެމެދު ހިނގި ހަނގުރާމައިގައި ވީރާނާވެފައިވާ ބޯޑަރު ރަށެކެވެ. ސިއްހީ ވުޒާރާ އިން ބުނި ގޮތުގައި އެކަކަށް އަނިޔާވެފައިވެއެވެ.

ނޮވެމްބަރުގައި ސޮއިކުރެވުނު ހަނގުރާމަ ހުއްޓާލުމުގެ އެއްބަސްވުމަށް ފަހުގައި ވެސް އިސްރާއީލުން ދެކުނުލުބުނާނަށް ހަމަލާ ދިނުން ހުއްޓުމަކަށް އައިސްފައެއް ނުވެއެވެ.

އޭގެ އިތުރުން އިސްރާއީލުން ދެކުނު ލުބުނާނުގެ ފަސް ސަރަހައްދެއްގައި އަދި ވެސް ސިފައިން ބައިތިއްބާފައި އެބަތިއްބެވެ.

ލުބުނާނުގެ ރައީސް ޖޯސެފް އައުން މި ހަމަލާތައް ކުށްވެރިކޮށް، ހަނގުރާމަ ހުއްޓާލުމުގެ އެއްބަސްވުން ސްޕޮންސަރ ކުރި ގައުމުތަކުން ހިމޭނުން ތިބޭތީ އެކަމަށް ފާޑު ވިދާޅުވެފައިވެއެވެ. އޭނާ ވިދާޅުވި ގޮތުގައި މިއީ އިސްރާއީލުގެ "އިތުރު އަނިޔާވެރިކަމަށް ހިތްވަރުދޭ" ކަމެކެވެ.

އޭނާ އިތުރަށް ވިދާޅުވީ "ލުބުނާނުގެ މިނިވަންކަމަށް ފާޅުކަން ބޮޑު ގޮތެއްގައި އަރައިގަތުން ނިމުމަކަށް ގެންނަންޖެހޭ ވަގުތު ވަނީ އައިސްފައި،" ކަމަށެވެ.

އިސްރާއީލުގެ އަސްކަރިއްޔާ އިން ބުނި ގޮތުގައި ދެކުނު ލުބުނާނުގައި ހިޒްބުﷲ ގެ އެލީޓް ސިފައިންގެ ހަތިޔާރު ރައްކާކުރާ ތަންތަނަށް ވަނީ ހަމަލާ ދީފައެވެ.

އިސްރާއީލަށް ކުރިމަތިވާ ކޮންމެ ނުރައްކަލެއް ނައްތާލުމަށް މަސައްކަތް ކުރާނެ ކަމަށް އެ ފަރާތުން ބުނެފައިވެއެވެ.

ބުރާސްފަތި ދުވަހުގެ ހަމަލާތަކުގެ ކުރިން، ލުބުނާންގެ ބޮޑުވަޒީރު ނަވާފް ސަލާމް އިސްރާއީލުން އެ ގައުމަށް ދޭ ހަމަލާތައް ހުއްޓުވުމަށް އެޅެން އޮތް "އެންމެ ބޮޑު ބާރެއް" އެޅުމަށް ދުނިޔެ އަށް ގޮވާލައްވާފައިވެއެވެ.