އިސްރާއީލް އިން ލުބުނާންގެ ވެރި ރަށް ބެއިރޫތުގައި ދިން ހަމަލާއެއްގައި ހިޒްބުﷲ ޖަމާއަތުގެ އިސް މިލިޓަރީ ކޮމާންޑަރަކު މަރާލާފައިވާއިރު، އެކަމުގެ ރައްދު ދިނުމުގެ ޙައްގު ލިބިގެންވާ ކަމަށް އެ ޖަމާއަތުން ބުނެފި އެވެ.

ހިޒްބުﷲ ޖަމާއަތުގެ ލީޑަރު ނައީމް ޤާސިމް ހުކުރު ދުވަހު ވިދާޅުވެފައި ވަނީ، ފާއިތުވި ހަފުތާގައި ބެއިރޫތުގެ ދެކުނު ސަރަހައްދަށް އިސްރާއީލް އިން ދިން ހަމަލާގައި، އެ ޖަމާއަތަށް ނިސްބަތްވާ އިސް މިލިޓަރީ ކޮމާންޑަރަކު މަރުވެފައިވާ ކަމަށެވެ.

އޭނާ ވިދާޅުވީ މިލިޓަރީ އިސް ކޮމާންޑަރެއް ކަމަށްވާ ހައިތަމް އަލީ ތަބްތަބާއީ މަރުވުމަކީ، ސާފުކޮށް ދިން ހަމަލާއެއްގެ ސަބަބުން ހިނގި ކަމެއް ކަަމށާއި، އެއީ ބޭއިންސާފު އަދި ވަރަށް ނުބައި ކުށެއް ކަމަށެވެ. އެކަމާ ގުޅިގެން ރައްދު ދިނުމުގެ ފުރިހަމަ ޙައްގު ހިޒްބުﷲ އަށް އޮތް ކަމަށާއި، އެކަމަށް ވަގުތު ކަނޑައަޅާނީ ވެސް އެ ޖަމާއަތުން ކަމަށް އޭނާ ވިދާޅުވި އެވެ.

އީރާންގެ މަދަދުވެރިކަމާ އެކު ހިންގަމުން އަންނަ ހިޒްބުﷲ އިން 2024 ވަނަ އަހަރުގެ ނޮވެމްބަރު މަހުގެ ތެރޭގައި ވަނީ އިސްރާއީލް އާއެކު ސުލްޙަ ޤާއިމު ކުރުމުގެ އެއްބަސްވުމެއް އެކުލަވާލައިފަ އެވެ. ޤާސިމް ވިދާޅުވީ އެ ޖަމާއަތުން އަންނަނީ އެ އެއްބަސްވުމަށް ފުރިހަމަ އަށް އިޙުތިރާމް ކުރަމުން ކަމަށާއި، ނަމަވެސް އިސްރާއީލް އިން ވަނީ ދެމެހެއްޓެނިވި ގޮތެއްގައި ލުބުނާން އަށް ހަމަލާ ދެމުން ކަމަށެވެ. އަދި އެފަދަ ހަމަލާތައް ވަގުތުން ވަގުތަށް ހުއްޓާލުމަަށް އިސްރާއީލް އަށް ގޮވާލައްވާ ކަމަށް ވެސް އޭނާ ވިދާޅުވެފައިވެ އެވެ.

މީގެ އިތުރުން ޤާސިމް ވިދާޅުވީ ތަބްތަބާއީ އާއި އޭނާގެ ހަތަރު އެހީތެރިން ގެންދިޔައީ ކުރިއަށް އޮތް ތަނުގައި އަމަލު ކުރާނެ ގޮތަކާ މެދު ތައްޔާރު ވަމުން ކަމަށެވެ. އެކަމާ ގުޅުން ހުރި މަސައްކަތްތައް ކުރުމަށް ބައްދަލުވުމެއް ކުރިއަށް ދަނިކޮށް އިސްރާއީލް އިން ދިން ހަމަލާގައި އޭނާ މަރުވެފައިވާ ކަމަށް ޤާސިމް ހާމަ ކުރެއްވި އެވެ.

ހިޒްބުﷲ އާއި އިސްރާއީލްއާ ދެމެދު ސުލްޙައިގެ އެއްބަސްވުން ޤާއިމު ކުރި ފަހުން، އިސްރާއީލް އިން މަރާލި ހިޒްބުﷲގެ އެންމެ އިސް އޮފިޝަލަކީ ވެސް ތަބްތަބާއީ ކަމަށް ހާމަ ކޮށްފައިވެ އެވެ. ސުލްޙައިގެ އެއްބަސްވުމާ ޚިލާފަށް އިސްރާއީލް އިން ހަމަލާ ދެމުން އަންނަ ކަމަށް ހިޒްބުﷲ އިން ބުނަމުން އަންނައިރު، އިސްރާއީލް އިން ބުނެފައި ވަނީ ލުބުނާން އަށް ދޭ ހަމަލާތައް އިތުރު ކޮށްފައި ވަނީ ހިޒްބުﷲ އިން ހަތިޔާރު ހޯދުމުގެ ފުރުސަތު ނުދިނުމަށް ކަމަށެވެ.

އިސްރާއީލް އިން ދިން ހަމަލާގައި ތަބްތަބާއީ މަރުވުމާ ގުޅިގެން، އީރާންގެ ރިވޮލިއުޝަނަރީ ގާޑްސް ކޯޕްސް އިން ވަނީ ބަދަލު ހިފުމަށް ގޮވާލައިފަ އެވެ. އިސްރާއީލް އިން ދިން މި ހަމަލާ އަކީ، ސަރަހައްދީ ޙާލަތު އިތުރަށް ގޯސް ވެދާނެ ހަމަލާއެއްގެ ގޮތުގައި މާހިރުން އަންނަނީ ފާހަގަ ކުރަމުންނެވެ.