އީރާނާ ލުބުނާން އާ ދެމެދު ކުރެވޭ ވައިގެ ދަތުރުތައް ވަކި މުއްދަތެއް ނެތި އިތުރުކޮށްފައިވާ ކަމަށް ލުބުނާނުގެ އިސްވެރިން ހޯމަ ދުވަހު ހާމަ ކޮށްފިއެވެ.

މީގެ ކުރިން ލުބުނާނުން ބުނީ އީރާނުގެ މަތިންދާބޯޓުތައް ބައިރޫތުގައި ޖެއްސުން ފެބްރުއަރީ 18 އާ ހަމައަށް މަނާކޮށްފައިވާ ކަމަށެވެ.

ލުބުނާނުގެ ރައީސް އޮފީހުގޮފީހުގެ ތަރުޖަމާނު ނަޖާތު ޝަރަފުއްދީން ނޫސްވެރިންނަށް ބުނެފައިވަނީ، "ދަތުރުފަތުރާ ބެހޭ ވަޒީރަށް އީރާނާ ދެމެދު ކުރެވޭ ދަތުރުތައް ހުއްޓުވާލުމުގެ މުއްދަތު އިތުރުކުރުމަށް ދަންނަވާފައިވާ" ކަމަށެވެ. ނަމަވެސް ދަތުރުތައް އަލުން ފެށޭނެ ތާރީޚެއް ބަޔާންކޮށްފައެއް ނުވެއެވެ.

ލުބުނާނުން ވަނީ ފާއިތުވި ހަފްތާގައި ބެއިރޫތަށް ދަތުރުކުރި އީރާނުގެ ފްލައިޓެއް ހުއްޓުވާފައެވެ. މިއީ މަދަނީ ބޯޓު ފަހަރުގައި އީރާނުން ހިޒްބުﷲ އަށް ފައިސާ ފޮނުވާ ކަމަށް ތުހުމަތު ކޮށް އިސްރާއީލުގެ އަސްކަރިއްޔާ އިން ލުބުނާނު ސަރުކާރަށް ދިން އިންޒާރަކާ ގުޅިގެން ކަމަށް ރިޕޯޓުތައް ބުނެއެވެ.

އީރާނުން ބުނެފައިވަނީ އެ ޤައުމުގެ މަތިންދާބޯޓުތަކަށް ބައިރޫތުގައި ޖެއްސުމުގެ ހުއްދަ ނުލިބޭހާ ހިނދަކު ލުބުނާނުގެ މަތިންދާބޯޓު ތަކަށް އީރާނުގައި ޖެއްސުމުގެ ހުއްދަ ނުދޭނެ ކަމަށެވެ.

ލުބުނާނުން އެޅި މި ފިޔަވަޅާ ގުޅިގެން ލުބުނާނުގެ އެތައް ބަޔަކު ވަނީ ބެއިރޫތުގެ ވައިގެ ބަނދަރަށް ދާ މައި މަގު ބަންދުކުރަން މަސައްކަތްކޮށް، ވައިގެ ބަނދަރު ސަރަހައްދުގައި މުޒާހަރާ ކޮށްފައެވެ. ސަލާމަތީ ބާރުތަކާ މުޒާހަރާ ކުރި ފަރާތްތަކާ ކުރިމަތިލުންތައް ހިނގި ކަމަށްވެސް ރިޕޯޓުތައް ބުނެއެވެ.

މުޒާހަރާ ކުރި ފަރާތްތަކުން ވަނީ ލުބުނާނުގެ ރައީސް ޖޯސެފް އައުންގެ ފޮޓޯތަކަށް ގެއްލުންދީފައެވެ. ހިޒްބުﷲ އަށް ތާއީދުކުރާ ފަރާތްތަކުން ވަނީ ރައީސް އާއި ބޮޑުވަޒީރު ނަވާފް ސަލާމް އަކީ "ޒައިޔަނިސްޓުން" އަދި "އިޒްރޭލުގެ އޭޖެންޓުން" ގެ ގޮތުގައި ސިފަކޮށްފައެވެ.