އިސްރާއީލުން ދެކުނު ލުބުނާނަށް ބޮން އަޅައިފިއެވެ.

ލުބުނާނުގެ ސިއްހަތާ ބެހޭ ވުޒާރާއިން ބުނެފައިވަނީ، އިސްރާއީލާއި ހިޒްބުﷲ އާ ދެމެދު ހަނގުރާމަ ހުއްޓާލުމުގެ އެއްބަސްވުމެއް އޮތް ނަމަވެސް، އެ ގައުމުގެ ދެކުނުގައި އިސްރާއީލުން ހުކުރު ދުވަހު ދިން ހަމަލާއެއްގައި އަންހެނަކު މަރުވެ، އިތުރު 11 މީހުން ޒަޚަމްވެފައިވާ ކަމަށެވެ.

ހުކުރު ދުވަހު، ލުބުނާންގެ ދެކުނުގެ ސިޓީއެއްގެ ކައިރީގައިވާ ފަރުބަދަ ސަރަހައްދަކަށް އިސްރާއީލްގެ އެއަރ ފޯސްއިން ވަރުގަދަ ވައިގެ ހަމަލާތަކެއް ދިން ކަމަށް އިސްރާއީލްގެ ސިފައިން ބުނެފައިވެއެވެ. އިތުރަށް ބުނެފައިވަނީ މި ހަމަލާ އަމާޒުކުރެވިފައިވަނީ ހަނގުރާމަވެރި ހިޒްބުﷲ ޖަމާޢަތުގެ ބިމު އަޑީގައިވާ ވަސީލަތްތަކަށެވެ.

ލުބުނާން ސަރުކާރުގެ ނޭޝަނަލް ނިއުސް އެޖެންސީން ރިޕޯޓުކުރި ގޮތުގައި، ނަބަތިއްޔާގެ މަތީގައިވާ ފަރުބަދަތަކަށް ދެ ފަހަރެއްގެ މަތިން ހަމަލާދީ، ބަންކަރ ބަސްޓަރ ބޮން ބޭނުން ކޮށްފައި ވެއެވެ.

އެމެރިކާ މެދުވެރިވެގެން ނޮވެމްބަރުގައި އިސްރާއީލާއި ހިޒްބުﷲ އާ ދެމެދު 14 މަސްދުވަހުގެ ހަނގުރާމަ ހުއްޓާލުމުގެ އެއްބަސްވުމެއް ވެވުނު ފަހުން، އިސްރާއީލުން ވަނީ ކޮންމެ ދުވަހަކު ކަހަލަ ގޮތަކަށް ލުބުނާނުގެ ދެކުނަށް ވައިގެ ހަމަލާތައް ދެމުންނެވެ. ހުކުރު ދުވަހުގެ ހަމަލާތައް އާދަޔާ ޚިލާފަށް ގަދަފަދަ ކަމަށް ރިޕޯޓުތައް ބުނެއެވެ.

އިސްރާއީލްގެ ސިފައިންގެ ބަޔާނެއްގައި ބުނެފައިވަނީ، އެ ސަރަހައްދުގައި ހުރި ހިޒްބުﷲ ގެ ދިފާޢީ ނިޒާމް ބެލެހެއްޓުމަށް ބޭނުން ކުރާ ތަނަކަށް އެމީހުންގެ ފައިޓަރ ޖެޓްތަކުން ހަމަލާދީފައިވާ ކަމަށެވެ. އަދި މިއީ މުހިންމު ބިމު އަޑީގެ މަޝްރޫޢެއްގެ ބައެއް ކަމަށާއި، މި ހަމަލާއާ ގުޅިގެން އެ ތަން މުޅިން ބޭނުން ނުކުރެވޭ ހާލަތަށް ގޮސްފައިވާ ކަމަށެވެ.

އިސްރާއީލްގެ ސިފައިންގެ ބަހުން، ހަމަލާ ދިން ތަނަކީ ކުރިންވެސް ހަމަލާދީފައިވަނިކޮށް އަލުން ހިޒްބުﷲ އިން އާރަސްތު ކުރަން ފަށާފައިވާ ތަނެކެވެ.

ހިޒްބުﷲ އިން އަދި މިކަމާ ގުޅޭ ގޮތުން އެއްވެސް ބަހެއް ބުނެފައެއް ނުވެއެވެ.

އެންމެ ފަހުން ހިޒްބުﷲ އާއި އިސްރާއީލާ ދެމެދު ހިނގި ހަނގުރާމައިގައި އެ ޖަމާއަތައް ބޮޑެތި ގެއްލުންތަކެއް ލިބުނެވެ. މި ހަނގުރާމައިގައި ލުބުނާނުން 4،000 އަށް ވުރެ ގިނަ މީހުން މަރުވިއެވެ. އިސްރާއީލުން މަރުވީ 127 މީހުންނެވެ. އޭގެ ތެރޭގައި 80 ސިފައިން ހިމެނެއެވެ.