ސަރުކާރުގެ ވައްކަމާއި ކޮރަޕްޝަންގެ ވާހަކަތަކާއި މަޖިލިސް މެންބަރުންނަށް އާމްދަނީ އާއި ނުބައްދަލު ފައިސާ ލިބެމުންދާތީ އެވާހަކަތައް އާންމުންނާއި ހަމައަށް ނުގެނެވޭ ގޮތަށް ހެދި މީޑިއާ ކޮންޓްރޯލް ކުރާ ގާނޫނުގެ ދަށުން ދޮގު ހަބަރާއި ތެދު ހަބަރު ކަނޑައަޅާ ކޮމިޝަން ރައީސް ޑރ. މުހައްމަދު މުއިއްޒު އުފައްދަވައިފިއެވެ.

މަޖިލީހުގެ ގަވާއިދާ ހިލާފަށް ޕީއެންސީގެ ސުޕަރމެޖޯރިޓީ ބޭނުންކޮށްގެން ސަރުކާރުން ހުށަހެޅި މީޑިއާ ކޮންޓްރޯލް ކުރާ ބިލު ފާސްކުރީ އަންގާރަ ދުވަހުއެވެ. މީޑިއާތައް ކޮންޓްރޯލް ކުރެއްވުމަކީ އެއްވެސް އިރެއްގައި ކުރައްވާނެ ކަމެއް ނޫން ކަމަށް ވިދާޅުވުމަށްފަހު، ސަރުކާރުގެ ވައްކަމުގެ ވާހަކަތައް ދައްކާ މީޑިއާތަކުގައި ތަޅު އަޅުވާ ބިލު ރައީސް މުއިއްޒު ތަސްދީގު ކުރެއްވީ ބުރާސްފަތި ދުވަހުއެވެ.

މި ގާނޫނު ތަސްދީގު ކުރުމާއެކު ޤާނޫނު ނަންބަރު 78/47 (ނޫސް މަޖައްލާ ފަދަ ތަކެތީގެ ޤާނޫނު) އާއި ޤާނޫނު ނަންބަރު 2008/15 (މޯލްޑިވްސް މީޑިއާ ކައުންސިލުގެ ޤާނޫނު) ވަނީ އުވިފައެވެ. އަދި ޤާނޫނު ނަންބަރު 2008/15 (މޯލްޑިވްސް މީޑިއާ ކައުންސިލުގެ ޤާނޫނު) ގެ ދަށުން އުފައްދައިފައިވާ "މޯލްޑިވްސް މީޑިއާ ކައުންސިލު" އާއި ޤާނޫނު ނަންބަރު 2010/16 (ބްރޯޑްކާސްޓްކުރުމުގެ ޤާނޫނު) ގެ ދަށުން އުފައްދާފައިވާ "މޯލްޑިވްސް ބްރޯޑްކާސްޓިންގ ކޮމިޝަން" ވެސް އުވިއްޖެއެވެ.

އަދި މީޑިއާ ކޮންޓްރޯލް ކުރާ ގާނޫނުގެ 4 ވަނަ މާއްދާއާއި އެއްގޮތަށް "މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން" ގެ ނަމުގައި ދައުލަތުގެ އޮފީހެއް ރައީސް މުއިއްޒު ވަނީ އުފައްދަވާފައެވެ.

މި ކޮމިޝަނުން ބޭނުންވެއްޖެ ހާލަތެއްގައި ސަރުކާރުން އަންގައިގެން ގާނޫނުގައި ބަޔާންކުރާ އުސޫލުތަކާ ޚިލާފަށް އަމަލުކުރާ ބްރޯޑްކާސްޓަރުންނާއި، މީޑިއާތަކާއި، މީޑިއާގައި މަސައްކަތްކުރާ ފަރާތްތަކާއި، ނޫސްވެރިންނާ ގުޅޭގޮތުން ޝަކުވާ ހުށަހެޅޭނެ ނިޒާމެއް ޤާއިމުކޮށް، އެ ކަންކަން ބަލައި، ސުލޫކީ މިންގަނޑުތަކާ ހިލާފުވާ ފަރާތްތަކުން ހިލާފުވި ހިލާފުވުން ބަލައި، މި ޤާނޫނުގައިވާ ގޮތުގެމަތިން ފިޔަވަޅު އެޅެއެވެ.

މި ގާނޫނުގައި ދޮގު މައުލޫމާތާއި ހަބަރު ނުފެތުރުން ހިމެނޭ އިރު، ދޮގު ހަބަރު ކަނޑައަޅަނީ މި ގާނޫނުގެ ދަށުން އުފައްދާ ކޮމިޝަނުންނެވެ. މި ކޮމިޝަން ވެގެންދަނީ މަޖިލީހުން ބޭނުންވެއްޖެ ހާލަތެއްގައި މެންބަރުން ވަކިކުރެވޭ ގޮތަށް ކޮމިޝަނުގެ މައްޗަށް ނުފޫޒު އޮންނަ ކޮމިޝަނެކެވެ.

މީގެ އިތުރުން އެކި ފަރާތްތަކުގެ އަމިއްލަ މަޢުލޫމާތު މީޑިއާގައި މަސައްކަތްކުރާ މީހުން ހޯދަންވާނީ މުޖުތަމަޢުގެ މަޞްލަޙަތެއް އެކަމުގައި ހިމެނޭ ކަމަށްވާނަމަ ކަމަށް ބުނެފައިވެއެވެ. އަދި އެފަދަ މަޢުލޫމާތު ހޯދުމުގައި އަދި ބޭނުންކުރުމުގައި އެ ފަރާތުގެ އަމިއްލަ މިނިވަންކަމުގެ ދާއިރާއަށާއި، އެ ފަރާތުގެ އަމިއްލަ އަބުރަށާއި ގަދަރަށް އަބަދުމެ އިހުތިރާމް ކުރަންވާނެ ކަމަށް ގާނޫނުގައި ބުނެއެވެ.

މި ގާނޫނުގެ ދަށުން މަސްދަރު ހާމަކުރަން މަޖުބޫރުވެގެންދެއެވެ. އެގޮތުން 53 ވަނަ މާއްދާގައި ބުނަނީ މި ޤާނޫނުގައި ބަޔާންވެގެންވާ ކަމަކާ ބެހޭގޮތުން އެއްވެސް މަޢުލޫމާތެއް ހޯދުމަށް ނޫހެއްގެ ނުވަތަ މަޖައްލާއެއްގެ އިދާރާގައި ކޮމިޝަނުން އެދިއްޖެނަމަ، އެދުނު ތާރީޚުން ފެށިގެން 7 ދުވަހުގެ ތެރޭގައި، އެ ނޫހުގެ ނުވަތަ މަޖައްލާގެ މަސްއޫލުވެރިޔާ އެ މަޢުލޫމާތު ކޮމިޝަނަށް ދޭންވާނެ ކަމަށް ބުނެފައިވެއެވެ.

މީގެ އިތުރުން ކޮމިޝަނުން އަމިއްލަ އިސް ނެގުމުގެ މަތިން މައްސަލަތައް ބެލުމާއި، ހެކިބަސް ނެގުމާއި، ގުޅުންހުރި ފަރާތްތައް ކޮމިޝަނަށް ހާޒިރުކުރުމާއި، ޮމިޝަނުން ބަލަމުންދާ މައްސަލައަކާ ގުޅުންހުރި ކަމަށް ފެންނަ ލިޔެކިޔުންތައް ކޯޓު އަމުރެއްގެ ދަށުން ހޯދުމާއި، ބެލުމާއި، ބޭނުންވެއްޖެނަމަ، އެ ލިޔުންތައް ކޮމިޝަނަށް ގެނައުމުގެ ބާރުވެސް މި ކޮމިޝަނަށް ލިބިގެންވެއެވެ. އަދި ކޮމިޝަނުން ބަލަމުންދާ މައްސަލައަކާ ގުޅުންހުރި ކަމަށް ފެންނަ ލިޔެކިޔުންތައް ހޯދުމަށާއި، ބެލުމަށާއި، ބޭނުންވެއްޖެނަމަ، އެ ލިޔުންތައް ކޮމިޝަނަށް ގެނައުމަށް ފުލުހުންގެ އެހީތެރިކަމަށް ކޮމިޝަނުން އެދެވިދާނެ ކަމަށް މި ގާނޫނުގައި ބުނެފައިވެއެވެ.

މި ގާނޫނުގައި ބުނެފައިވަނީ ސުލޫކީ މިންގަނޑުތަކާއި ހިލާފުވެއްޖެނަމަ 50،000 ރުފިޔާއާއި 250،000 ރުފިޔާއި ދެމެދުގެ އަދަދަކުން ބްރޯޑްކާސްޓަރު ޖޫރިމަނާކުރެވިދާނެއެވެ. އަދި ޕްރޮގްރާމްގެ ޝެޑިއުލްގެ ބައެއް ވަގުތީގޮތުން މެދުކަނޑާލުމަށް އެންގުމާއި، ލައިސަންސް ބާޠިލުކުރުމަށް ކޯޓަށް ހުށަހެޅުމަށްފަހު، ކޯޓުން ނިންމާ ގޮތެއްގެމަތިން ލައިސަންސް ބާޠިލުކުރެވިދާނެ ކަމަށް ގާނޫނުގައި ބުނެއެވެ. އަދި މިކަމަށް 30 ދުވަހުގެ މުއްދަތެއްދީ އެ މުއްދަތުގައި ކޯޓުން ގޮތެއް ނިންމަންވާނެ ކަމަށް ވެސް ބުނެފައިވެއެވެ.

ނޫސް ނުވަތަ މަޖައްލާއަކުން މި ޤާނޫނާއި މި ޤާނޫނުގެ ދަށުން ކޮމިޝަނުން ކަނޑައަޅާ ސުލޫކީ މިންގަނޑާ ޚިލާފުވެއްޖެނަމަ، އެ ނޫހެއް ނުވަތަ މަޖައްލާއެއް 5000 ރުފިޔާއައި 100،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވެއެވެ.

މި ގާނޫނުގެ ދަށުން ލިޔާ ލިޔުމެއްގެ ސަބަބުން ނޫސްވެރިޔާއަށް ފިޔަވަޅުއެޅެއެވެ. އަދި މި ގާނޫނުގެ ދަށުން ހަބަރުގެ ތެދު ދޮގު ކަނޑައެޅުމުގެ ބާރު ސީދާ ކޮމިޝަނަށް ލިބިގެންވާއިރު، ކޮމިޝަނުން ބޭއްނުންވެއްޖެނަމަ ތެދު ދޮގަކަށް ހަދައި އަދި ދޮގު ތެދަކަށް ހެދުމުގެ ބާރު ކޮމިޝަނަށް ލިބިގެންވެއެވެ.