މީޑިއާ ކޮންޓްރޯލް ގާނޫނަކީ ޣައިރު ދުސްތޫރީ ގާނޫނެއް، އެ ގާނޫނަށް ތަބާނުވާނަން: އެމްޖޭއޭ
18 ސެޕްޓެމްބަރު 2025 | ބުރާސްފަތި 13:47މޯލްޑިވްސް މީޑިއާ އެންޑް ބްރޯޑްކާސްޓް ރެގިއުލޭޝަން ގާނޫނަކީ ޣައިރު ދުސްތޫރީ ގާނޫނެއް
އެމްޖޭއޭ އިން ބޭއްވި ނޫސްވެރިންގެ ބައްދަލުވުމެއްގެ ތެރެއިން: މީޑިއާ ބިލުގެ ގާނޫނަށް ތަބާނުވާނޭ ކަމަށް އެމްޖޭއޭ އިން ވަނީ ބުނެފަ
މިނިވަން މީޑިއާތަކުގެ އަޑު ކަނޑުވާލެވޭ ގޮތަށް ރައީސް މުހައްމަދު މުއިއްޒު ބުރާސްފަތި ދުވަހު ތަސްދީގުކުރި "މޯލްޑިވްސް މީޑިއާ އެންޑް ބްރޯޑްކާސްޓް ރެގިއުލޭޝަން" ގާނޫނަކީ ޣައިރު ދުސްތޫރީ ގާނޫނެއް ކަމަށާއި އެ ގާނުނަށް ތަބާނުވާނެ ކަމަށް މޯލްޑިވްސް ޖާނަލިސްޓްސް އެސޯސިއޭޝަނުން ބުނެފި އެވެ.
އެމްޖޭއޭ އިން މިފަދައިން ބުނެފައިވަނީ ރައީސް މުއިއްޒު މީޑިއާ ކޮންޓްރޯލް ކުރާ ބިލުގެ ގާނޫން ތަސްދީގު ކުރުމާއެކު ނެރުނު ނޫސްބަޔާނެއްގަ އެވެ.
އެމްޖޭއޭއިން ނެރުނު ބަޔާނުގައި ބުނީ ބިލު ތަސްދީގު ކުރުމަކީ ހިތާމަކުރާ ކަމެއް ކަމަށާއި މިއީ ރާއްޖޭގެ ނޫސްވެރިކަމުގެ މިނިވަންކަމާއި ހިޔާލު ފާޅުކުރުމުގެ މިނިވަންކަމަށް ދެވުނު ބޮޑު ހަމަލާއެއް ކަމަށެވެ. އަދި މިއީ ވެރިކަން ހިންގާ ބާރާއި ރައްޔިތުންގެ މަޖިލީހުން ރާއްޖޭގައި އޮތް މިނިވަން މީޑިއާ އެކުއެކީ ކޮންޓްރޯލް ކުރުމަށް ސަރުކާރުން ހިންގި ނުބައި އަމަލެއް ކަމަށާއި މި އަމަލު ކުށްވެރިކުރާ ކަމަށް ވެސް އެ ޖަމްޢިއްޔާއިން ވަނީ ބުނެފަ އެވެ.
ނޫސްވެރިން ތަމްސީލުކުރާ ޖަމިއްޔާ، އެމްޖޭއޭ އިން ބުނީ މިއީ ނޫސްވެރިންނަށް ބިރުދައްކައި ސެލްފް ސެންސަޝިޕަކަށް ދިޔުމަށް މަޖުބޫރު ކުރުމަށް ތަސްދީގު ކުރި ގާނޫނެއް ކަމަށާއި އެހެން ނަމަވެސް ބިރު ނުދެއްކޭނެ ކަމަށެވެ.
އެ ޖަމްއިއްޔާއިން ބުނީ މި ގާނޫނަކީ ޣައިރު ދުސްތޫރީ ގާނޫނެއް ކަމަށާއި ހުރިހާ ގޮތަކުން އެ ގާނޫނާ ޗެލެންޖު ކުރުމަށް ނޫސްވެރިންނާއި މަދަނީ ޖަމިއްޔާތަކާ މަޝްވަރާ ކުރަމުންދާ ކަމަށެވެ.
ރައީސް މުއިއްޒު ބުރާސްފަތި ދުވަހު މީޑިއާތައް ކޮންޓްރޯލް ކުރާ ބިލު ތަސްދީގު ކުރެއްވުމުގެ ކުރިން އިންޓަނޭޝަނަލް ފެޑެރޭޝަން އޮފް ޖާނަލިސްޓްސް (އައިއެފްޖޭ) އާއި ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ) އިން ވެސް ބިލު ތަސްދީގު ނުކުރަން ވަނީ ތަކުރާރުކޮށް ގޮވާލާފަ އެވެ. އެހެން ނަމަވެސް މީގެން އެއްވެސް ގޮވާލުމަށް ބެލުމެއް ނެތި ރައީސް ވަނީ ބިލު ތަސްދީގު ކުރައްވާފަ އެވެ.
މަޖިލީހުން މި ބިލު ފާސްކުރީ ވެރިކަންކުރާ ޕީއެންސީއަށް ނިސްބަތްވާ 60 މެންބަރުންގެ ވޯޓުންނެވެ. ބިލާއި ދެކޮޅަށް ވޯޓު ދެއްވީ ވެލިދޫ ދާއިރާގެ މެންބަރު މުހައްމަދު އައްބާސް އެކަންޏެވެ. ވޯޓަށް އެހީ އިދިކޮޅު އެމްޑީޕީގެ ބައެއް މެންބަރުންގެ ނަން އިއްވުމުން އެ ޕާޓީގެ ޕީޖީ ގްރޫޕް މަޖިލީސް ދޫކޮށް ނުކުތް ފަހުންނެވެ.
ބިލު ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރު ހުށަހެޅުއްވީ ސަރުކާރުގެ ފަރާތުން ކަމަށް މަޖިލީހުގެ ނައިބު ރައީސް އަހުމަދު ނާޒިމް ވަނީ ވިދާޅުވެފަ އެވެ. މީގެ ކުރިން ސަރުކާރުން ބުނަމުންދިޔައީ އެ ބިލަކީ ސަރުކާރުގެ އެއްވެސް ދައުރެއް އޮތް ބިލެއް ނޫން ކަމަށެވެ.
އެ ބިލު ތަސްދީގު ކުރުމުން މީޑިއާ ރެގިއުލޭޓް ކުރާނީ މުއިއްޒުގެ ފުރިހަމަ ކޮންޓްރޯލް އޮތް މަޖިލީހުން ތިން މެންބަރުން އައްޔަން ކުރާ، ހަތް މެންބަރުންގެ މައްޗަށް އެކުލެވޭ ކޮމިޝަނަކުންނެވެ.
