ފަލަސްޠީނުގެ މިނިވަން ދައުލަތް ބަލައި ގަތުމަށް، މި ހަފުތާ ބަންދުގެ ތެރޭގައި އިނގިރޭސިވިލާތުން ރަސްމީކޮށް ނިންމާނެ ކަމަށް އެ ޤައުމުގެ ބައެއް މީޑިއާ ތަކުގައި ބުނެފި އެވެ.

އިނގިރޭސިވިލާތުގެ ބޮޑު ވަޒީރު ކިއާ ސްޓާމާ ވަނީ، އިސްރާއީލް އިން ޣައްޒާގައި ހިންގަމުން އަންނަ ލާއިންސާނީ އަމަލުތައް ހުއްޓައި ނުލައިފި ނަމަ، މި މަހު އޮންނަ އދ ގެ ޖެނަރަލް އެސެމްބްލީގައި އިނގިރޭސިވިލާތުން ފަލަސްޠީނުގެ މިނިވަން ދައުލަތް ބަލައި ގަންނާނެ ކަމަށް ހާމަކޮށްފަ އެވެ.

ޓައިމްސް ނޫހުގައި ރިޕޯޓު ކޮށްފައިވާ ގޮތުގައި އެމެރިކާގެ ރައީސް ޑޮނަލްޑް ޓްރަމްޕް މިހާރު އިނގިރޭސިވިލާތަށް ކުރައްވަމުން ގެންދަވާ ރަސްމީ ދަތުރުފުޅު ނިންމަވާލެއްވުމަށް ފަހު އެނބުރި ވަޑައިގެންނެވުމުން، އިނގިރޭސިވިލާތުން ފަލަސްޠީނުގެ މިނިވަން ދައުލަތް ރަސްމީކޮށް ބަަލައި ގަންނާނެ އެވެ. ނަމަވެސް، އެއީ ޓްރަމްޕް ދެކޮޅު ހައްދަވާ ކަމެއް ކަމަށް އެ ނޫހުގައި ވަނީ ފާހަގަ ކޮށްފަ އެވެ.

ފަލަސްޠީނުގެ މިނިވަން ދައުލަތް ބަލައި ގަންނާނެ ކަމަށް ސްޓާމާ އިއުލާން ކޮށްފައި ވަނީ މިއަހަރުގެ ޖުލައި މަހު އެވެ. އެއީ އިސްރާއީލް އިން ޣައްޒާ ހަނގުރާމަ ހުއްޓާލައި، ޣައްޒާ އަށް ބޭނުންވާ އިންސާނީ އެހީތެރިކަން އެތެރެ ކުރުމަށް ފުރުސަތު ދީ، ޣައްޒާ ދޫކޮށް ނުގޮސްފި ނަމަ އަޅާނެ ފިޔަވަޅެއް ކަމަށް ސްޓާމާ ވިދާޅުވެފައިވެ އެވެ.

އިނގިރޭސިވިލާތުގެ އިތުރުން، ފްރާންސް، ކެނެޑާ އަދި އޮސްޓްރޭލިއާ އިން ވެސް ވަނީ ފަލަސްޠީނުގެ މިނިވަން ދައުލަތް ބަލައި ގަންނާނެ ކަމަށް ހާމަކޮށްފަ އެވެ. ނަމަވެސް، އެކަމާ ގުޅޭ ގޮތުން އިސްރާއީލް އިން ބުނަމުން ގެންދަނީ އެއީ ހަމާސް ޖަމާއަތަށް ލިބޭ ވަރަށް ބޮޑު އިނާމެއް ކަމަށެވެ.

ޓައިމްސް ނޫހުގައި ބައެއް މަސްދަރުތަކާ ހަވާލާދީ ބުނެފައި ވަނީ، އިނގިރޭސިވިލާތުން އެކަން އިއުލާން ކުރާނީ ބުރާސްފަތި ދުވަހުގެ ފަހުންނެވެ. އެކަމާ ގުޅޭ ގޮތުން އިނގިރޭސިވިލާތުގެ ފޮރިން މިނިސްޓްރީގެ ބަހެއް ހޯދުމަށް މަސައްކަތް ކުރި ނަމަވެސް، އެކަން ކާމިޔާބު ވެފައި ނުވާ ކަމަށް ވަނީ ބުނެފަ އެވެ.

ޓްރަމްޕް މިހާރު ގެންދަވަނީ އިނގިރޭސިވިލާތަށް ދަތުރުފުޅެއް ކުރައްވަމުންނެވެ. މިއީ ރިޔާސީ ދެ ވަނަ ދައުރަކަށް ވަޑައިގެންނެވި ފަހުން، ޓްރަމްޕް ކުރައްވާ ދެ ވަނަ ސްޓޭޓް ދަތުރުފުޅެވެ. މީގެ ކުރިން ޓްރަމްޕް ވިދާޅުވެފައި ވަނީ، އިނގިރޭސިވިލާތުން ފަލަސްޠީނުގެ މިނިވަން ދައުލަތް ބަލައި ގަންނަން ނިންމުމާ މެދު އޭނާގެ އެއްވެސް އިއުތިރާޒެއް ނެތް ކަމަށެވެ. ނަމަވެސް، ފަހުން އެމެރިކާ އިން ވަނީ ޔޫރަޕުގެ ބައިވެރިން އެފަދަ ފިޔަވަޅެއް އެޅުމަށް އެ ޤައުމުން ތާއީދު ނުކުރާ ކަމަށް ބުނެފަ އެވެ.

އިނގިރޭސިވިލާތުގައި ވެރިކަން ކުރަމުން އަންނަ ލޭބާ ޕާޓީ އަށް ނިސްބަތްވާ މެމްބަރުން ވެސް ގެންދަވަނީ، އިސްރާއީލްއާ ދެކޮޅަށް ފިޔަވަޅު އެޅުމަށް ބޮޑު ވަޒީރު ސްްޓާމާ އަށް ބާރު އަޅުއްވަމުންނެވެ. އިނގިރޭސިވިލާތުގެ ރައްޔިތުންގެ ފަރާތުން ވެސް ސްޓާމާ އަށް އެތައް ޕްރެޝަރެއް ކުރިމަތިވެފައި ވަނިކޮށް، ސްޓާމާ ވަނީ އިސްރާއީލްގެ އަމަލު ތަަކަށް ހުއްޓުމެއް އަތު ނުވެއްޖެ ނަމަ، ފަލަސްޠީނުގެ މިނިވަން ދައުލަތް ބަލައި ގަންނާނެ ކަމަށް އިއުލާން ކޮށްފަ އެވެ.

އިނގިރޭސިވިލާތުން އަބަދު ވެސް ތާއީދު ކުރަނީ ސަރަހައްދުގެ ހަނގުރާމަ ނިންމުމަށް، ދެ ދައުލަތުގެ ޙައްލެއް ޤާއިމު ކުރުމަށެވެ. އިނގިރޭސިވިލާތުން މީގެ ކުރިން ބުނަމުން އައިސްފައި ވަނީ، އެކަން ކުރެވޭނީ އެންމެ އެކަށީގެންވާ ވަގުތުގައި ކަމަށެވެ.