ޓޮމްގެ މަސައްކަތަށް އިންފަންޓީނޯގެ ތައުރީފު

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް އަޙުމަދު ޠާރިޤު (ޓޮމް)، ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރައީސް ޖިއާނީ އިންފަންޓީނޯއާ ބައްދަލު ކުރައްވައިފި އެވެ.

މިއީ މިއަހަރުގެ ޖުލައި މަހުގެ ތެރޭގައި އެފްއޭއެމްގެ ރައީސް ކަމަށް ވަޑައިގެންނެވި ފަހުން، ޓޮމް އިންފަންޓީނޯއާ ބައްދަލު ކުރެއްވި ފުރަތަމަ ފަހަރެވެ.

އެ ބައްދަލުވުމުގެ ފޮޓޯ ހިއްސާ ކުރައްވައި، އިންފަންޓީނޯ އޭނާގެ އިންސްޓަގްރާމް އެކައުންޓުގައި ވިދާޅުވެފައި ވަނީ، ޓޮމްއާ އެކު ބޭއްވި ބައްދަލުވުމުގައި ގިނަ ކަންކަމާ މެދު މަޝްވަރާ ކޮށްފައިވާ ކަމަށެވެ. އަދި ފީފާ އާއި އެފްއޭއެމް ގުޅިގެން ރާއްޖޭގެ ފުޓުބޯޅަ ކުރިއެރުވުމަށް ކުރެވެން ހުރި މަސައްކަތްތަކާ ގުޅޭ ގޮތުން ވެސް މަޝްވަރާ ކޮށްފައިވާ ކަމަށް ވަނީ ވިދާޅުވެފަ އެވެ.

އިންފަންޓީނޯ ވިދާޅުވެފައި ވަނީ، މީގެ ކުރިން ފުޓުބޯޅަ ކުޅުންތެރިޔެއްގެ ގޮތުގައި ވެސް ކުޅެފައިވާ ޓޮމްގެ ލީޑަރޝިޕްގެ ދަށުން ރަނގަޅު މަސައްކަތްތަކެއް ކުރަމުން އަންނަ ކަމަށެވެ. އެގޮތުން ހަތް އަހަރުގެ ތެރޭގައި ފުރަތަމަ ފަހަރަށް ބައިނަލްއަޤުވާމީ ތައްޓެއް ރާއްޖެ އިން ކާމިޔާބު ކޮށްފައިވާ ކަމަށް ވަނީ ފާހަގަ ކުރައްވައިފަ އެވެ. ރާއްޖެ އިން ވަނީ ދާދި ފަހުން ސްރީ ލަންކާގައި ކުރިއަށް ދިޔަ ސައުތު އޭޝިއަން ސުޕަ ކަޕް ކާމިޔާބު ކޮށްފަ އެވެ.

ޓޮމް އިންފަންޓީނޯއާ ބައްދަލު ކުރައްވާފައިވާއިރު، ޖުލައި މަހު އޮތް އެފްއޭއެމްގެ އިންތިޚާބު ޓޮމް ކާމިޔާބު ކުރެއްވީ ވެސް އެފްއޭއެމްގެ މެމްބަރު ކުލަބު ތަކުގެ ފުރިހަމަ ތާއީދާ އެކު އެވެ. ދެ ވަނަ ފަހަރަށް އެފްއޭއެމްގެ ރައީސް ކަމަށް ޓޮމް އިންތިޚާބު ވެފައި ވަނީ، ދިވެހި ފުޓުބޯޅަ އިން ގެއްލިފައިވާ ފޯރި އާއި، ރޫޙު އަލުން ގެނެސް ދޭނެ ކަމުގެ ވައުދާ އެކު އެވެ.