ސައުދީގެ ވަލީ އަހުދު، އީރާންގެ ސަލާމަތީ ކައުންސިލްގެ ސެކްރެޓަރީ ލަރިޖާނީއާ ބައްދަލު ކުރައްވައިފި

ސައުދީ އަރަބިއްޔާގެ ވަލީ އަހުދު މުޙައްމަދު ބިން ސަލްމާން، އީރާންގެ ސުޕްރީމް ނެޝަނަލް ސެކިއުރިޓީ ކައުންސިލްގެ ސެކްރެޓަރީ އަލީ ލަރިޖާނީއާ ބައްދަލު ކުރައްވައިފި އެވެ.

ސައުދީގެ ޕްރެސް އެޖެންސީ (އެސްޕީއޭ) އިން ހާމަކޮށްފައިވާ ގޮތުގައި، ވަލީ އަހުދު މުޙައްމަދު ބިން ސަލްމާން، ލަރިޖާނީއާ ބައްދަލު ކުރައްވާފައި ވަނީ އަންގާރަ ދުވަހު އެވެ. އެ ބައްދަލުވުމުގައި ދެ ޤައުމުގެ ދެ މެދުގައި ގުޅުމާއި، އަދި ސަރަހައްދީ އެންމެ ފަހުގެ ކަންތައްތަކާ ގުޅޭ ގޮތުން ވަނީ މަޝްވަރާ ކުރައްވައިފަ އެވެ.

އީރާން ސަރުކާރުގެ ނޫސް އެޖެންސީ (އައިއާރްއެންއޭ) އިން ބުނެފައިވާ ގޮތުގައި، ދެ ބޭފުޅުންގެ މަޝްވަރާ ތަކުގައި ސަރަހައްދުގެ މުސްތަޤުބަލާއި، އިޤްތިޞާދީ އެއްބާރުލުން އިތުރު ކުރުމުގެ ފުރުސަތުތަކާ ގުޅޭ ގޮތުން ވަނީ ވަރަށް ފުޅާ ދާއިރާއެއްގައި މަޝްވަރާ ކުރައްވައިފަ އެވެ.

ވަލީ އަހުދު މުޙައްމަދު ބިން ސަލްމާންގެ އިތުރުން، ލަރިޖާނީ ވަނީ ސައުދީގެ ދިފާއީ ވަޒީރު ޕްރިންސް ޚާލިދު ބިން ސަލްމާންއާ ވެސް ބައްދަލު ކުރައްވައިފަ އެވެ. އެ ބައްދަލުވުމުގައި ވަނީ ސައުދީ އާއި އީރާނާ ދެމެދު ދިފާއީ ގުޅުން ބަދަހިކޮށް، އެއްބާރުލުން ދިނުމާ ގުޅޭ ގޮތުން މަޝްވަރާ ކުރައްވައިފަ އެވެ.

މި ބައްދަލުވުންތައް ކުރިއަށް ގެންގޮސްފައިވާއިރު، މިއަހަރުގެ އޭޕްރީލް މަހުގެ ތެރޭގައި އީރާންގެ ރޫޙާނީ ލީޑަރު އާޔަތުﷲ އަލީ ޚާމަނާއީ ވަނީ އީރާންގެ ވެރި ރަށް ތެހެރޭގައި، ޕްރިންސް ޚާލިދުއާ ބައްދަލު ކުރައްވައިފަ އެވެ. އެއީ 2006 ވަނަ އަހަރުގެ ފަހުން، ޚާމަނާއީ ސައުދީގެ އިސް އޮފިޝަލަކާ ބައްދަލު ކުރެއްވި ފުރަތަމަ ފަހަރެވެ.

ލަރިޖާނީގެ މި ދަތުރުފުޅު ކޮށްފައި މި ވަނީ، އިސްރާއީލް އިން ޤަތަރަށް ދިން ހަމަލާއާ ގުޅިގެން ބޭއްވުނު އަރަބި އިސްލާމިކް ސަމިޓުގެ ކުއްލި ބައްދަލުވުމުގައި ސައުދީގެ ވަލީ އަހުދު މުޙައްމަދު ބިން ސަލްމާން، އީރާންގެ ރައީސް މަސްއޫދު ޕެޒެޝްކިއާންއާ ވެސް ބައްދަލު ކުރައްވާފައި ވަނިކޮށެވެ.

ސައުދީ އަރަބިއްޔާ އާއި އީރާން އިން ވަނީ، 2023 ވަނަ އަހަރު ޗައިނާގެ މެދުވެެރިކަމާ އެކު ޑިޕްލޮމެޓިކް ގުޅުންތައް އަލުން ޤާއިމު ކޮށްފަ އެވެ.