މިނިވަން މީޑިއާ ކަފުންކުރުމާ ދެކޮޅަށް މަޖިލިސް ދޮށުގައި ކުރިއަށްދިޔަ މުޒާހަރާގެ ތެރެއިން އަދަދު ނޫހުގެ ނޫސްވެރިޔާ ލީވާން އަލީ ނާސިރު ވަރަށް އަނިޔާވެރިކޮށް ހައްޔަރުކޮށްފިއެވެ.

ލީވާން ހައްޔަރުކުރި މަންޒަރު ދައްކުވައިދޭ ވީޑިއޯއެއް ސޯޝަލް މީޑިޔާގައި މިހާރު ދައުރުވަމުން ދާއިރު، އެ ވީޑިއޯގައި ފެންނަނީ ތިން ފުލުހަކު ވެގެން ލީވާން އަނިޔާވެރިކޮށް ގެންދާ މަންޒަރެވެ.

މުޒާހަރާ ތެރެއިން ލީވާން ގެއްލިގެން ފުލުހުންނާ ސުވާލު ކުރުމުން އޭނާ ހައްޔަރު ކުރިކަން ހާމަ ކުރަން ފުލުހުން ވަނީ ދެކޮޅު ހަދާފައެވެ.

މުޒާހަރާގެ ތެރެއިން ލީވާން ގެއްލުނު ކަމަށް އިއުލާންކުރީ އަދަދުގެ ނޫސްވެރިޔާ މުހައްމަދު ޝަހުޒާނެވެ.

އަންގާރަ ދުވަހު ހެނދުނުން ފެށިގެން މީޑިއާ ނެތިކޮށްލާ ބިލާ ދެކޮޅަށް އާންމުންނާއި ނޫސްވެރިން ދިޔައީ މުޒާހަރާކުރަމުންނެވެ. މުޒާހަރާ ރޫޅާލުމަށް ފުލުހުން ވަނީ ހާލަތާ އެކަށީގެންނުވާ ބާރުގެ ބޭނުންކޮށްފައެވެ. ބައެއް ނޫސްވެރިންގެ ބޮލަށް ކަކުލުން އަރައި، އަތް އަނބުރައި، އަންނައުނަށް ގެއްލުންދީ، ހަށިގަނޑުން ލޭ އޮހޮރުވާލާފައިވެއެވެ.

މިނިވަން މީޑިއާ ނެތިކޮށްލާ ބިލު ފާސްކުރަން ސަރުކާރުން މަސައްކަތްކުރަމުންދާއިރު، ބިލާ ދެކޮޅަށް މަސައްކަތްކުރާ އަދަދު ނޫހުގެ އަހުމަދު އާއިދު، މުހައްމަދު ޝަހުޒާން އަދި ދައުރު ނޫހުގެ އަހުމަދު ނާއިފް ފަދަ ނޫސްވެރިންނަށް ވަނީ މަރުގެ އިންޒާރު ލިބިފައެވެ.

ކައުންސިލް ޖެނެރަލްގެ ލަފާ ހޯދުމަކާ ނުލައި ކޮމިޓީން ބިލު ފާސްކޮށްފައިވާއިރު، އަންގާރަ ދުވަހުގެ ހަވީރު މަޖިލީހުގެ ޖަލްސާއެއް ބޭއްވުމަށް ވަނީ ހަމަޖެހިފައެވެ. އެ ޖަލްސާގައި މީޑިއާ ނެތިކޮށްލާ ބިލު ފާސްކުރުމަށް ވޯޓަށް އަހާނެ ކަމަށް ބެލެވެއެވެ.