ޝާހު މާހިރު ސަރުކާރުގެ ބޭސް ކުންފުނީގެ އެމްޑީއަކަށް އައްޔަން ކޮށްފި
14 ސެޕްޓެމްބަރު 2025 | އާދީއްތަ 17:40މި މަޤާމަށް އައްޔަންކުރެވުނު ޝާހު މާހިރަކީ މީގެ ކުރިން ދަރުމަވަންތަ ހޮސްޕިޓަލްގެ ޑެޕިއުޓީ ސީއީއޯގެ މަޤާމު ފުރުއްވަމުން ގެންދެވި ބޭފުޅެއް
ސަރުކާރުގެ ބޭސް ކުންފުނީގެ އެމްޑީ: ޑރ. ޝާހް މާހިރު
ރާއްޖެއަށް ބޭސް އެތެރެކޮށް، ބޭހުގެ ވިޔަފާރި ކުރުމަށް ސަރުކާރުން އުފެއްދި ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަނުގެ މެނޭޖިން ޑިރެކްޓަރަކަށް ޑރ. ޝާހު މާހިރު އައްޔަން ކުރައްވައިފިއެވެ.
ޕްރައިވެޓައިޒޭޝަން ބޯޑުން ހާމަކުރި ގޮތުގައި، ޝާހު މާހިރާއެކު އިތުރު ދެ ބޯޑު މެންބަރުން ވެސް އައްޔަންކޮށްފައިވެއެވެ. އެގޮތުން މ. ކުރެއްދޫގެ، އާއިޝަތު މުހައްމަދާއި ފްލެޓް ނަމްބަރު 1-3-10، ޝިބާނާ އަބްދުﷲ ދީދީ ވަނީ ބޯޑަށް އައްޔަންކޮށްފައެވެ.
މި މަޤާމަށް އައްޔަންކުރެވުނު ޝާހު މާހިރަކީ މީގެ ކުރިން ދަރުމަވަންތަ ހޮސްޕިޓަލްގެ ޑެޕިއުޓީ ސީއީއޯގެ މަޤާމު ފުރުއްވަމުން ގެންދެވި ބޭފުޅެކެވެ.
މިދިޔަ އަންގާރަ ދުވަހު އުފެއްދި މި ކުންފުންޏަކީ ސަރުކާރުގެ 100 ޕަސެންޓް ހިއްސާ އޮންނަ ކުންފުންޏެކެވެ. ރައީސް އޮފީހުން ބުނެފައިވާ ގޮތުގައި، މި ކުންފުނީގެ މައިގަނޑު މަޤްޞަދަކީ ބޭހާއި މެޑިކަލް ކޮންޒިއުމަބަލްސް އަދި މެޑިކަލް އިކުއިޕްމަންޓް ގަނޑުކޮށް ގަނެ، ރާއްޖެއަށް އެތެރެކޮށް، ރާއްޖޭގެ އެކި ހިސާބުތަކަށް ފޯރުކޮށްދިނުމެވެ.
މި ކުންފުނި އުފައްދާފައި މިވަނީ ރާއްޖޭގައި ބޭސް ލިބުމުގެ ދަތިކަން އިންތިހާއަށް ބޮޑުވެފައިވާ ދަނޑިވަޅެއްގައެވެ. ޔޫރަޕުގެ ބޭސް ދިވެހީންނަށް ލިބޭނެ ކަމަށް ވައުދުވެ ވެރިކަމަށް އައި ރައީސް މުއިއްޒުގެ ސަރުކާރަށް ދެ އަހަރު ވެފައިވާއިރު، ބޭސް ލިބުމުގެ ދަތިކަން އިތުރުވަމުންދާ ކަމަށް ގިނަ ރައްޔިތުން ފާހަގަކުރެއެވެ.
މި ކުންފުނި މެދުވެރިކޮށް ރާއްޖޭގެ ބޭހުގެ ދަތިކަމަށް ހައްލެއް ގެނެވި، ރައްޔިތުންނަށް އަގުހެޔޮކޮށް ބޭސް ލިބޭނެ މަގު ތަނަވަސްވެގެންދާނެ ކަމަށް ރައީސް އޮފީހުން ބުނެއެވެ.
