މަސްތުވާތަކެތި ބޭނުންކޮށް ވިޔަފާރި ކުރާކަމުގެ ތުހުމަތުގައި ނޭޕާލްގެ 21 އަހަރުގެ އަންހެނެއް ހައްޔަރު ކޮށްފި
މަސްތުވާތަކެތި ގެންގުޅެ، އޭގެ ވިޔަފާރިކުރާ ކަމުގެ ތުހުމަތުގައި ހައްޔަރުކުރި ނޭޕާލްގެ އަންހެން މީހާގެ ބަންދަށް ކްރިމިނަލް ކޯޓުން ވަނީ 15 ދުވަސް ބަންދަށް ޖަހާފައި. ފުލުހުން ކޯޓުގައި ބުނެފައިވާ ގޮތުގައި، އޭނާ ދިރިއުޅޭ ކޮޓަރިން ފެނުނު މަސްތުވާތަކެތި ހުރީ ހާމައަށް ފެންނަން. އަދި އޭނާގެ ކުޑަކަމުދާތަކެތި ކެނެބިސްއަށް ވަނީ ޕޮޒިޓިވްވެފައި.
ކްރިމިނަލް ކޯޓު، ނިޝާ ރާއީ ގެ ކުޑަކަމުދާ ތަކެތި ތަހްލީލު ކުރުމުން ކެނެބިސްއަށް ޕޮޒިޓިވްވެފައިވާ ކަމަށް ފުލުހުން ކޯޓުގައި ބުނެފައިވޭ. | ރާއްޖެ އެމްވީ
ރާއްޖޭގައި މަސްތުވާތަކެތި ބޭނުންކޮށް ވިޔަފާރި ކުރާކަމުގެ ތުހުމަތުގައި ނޭޕާލްގެ 21 އަހަރުގެ އަންހެނެއް ހައްޔަރު ކޮށްފި އެވެ.
ކްރިމިނަލް ކޯޓުގެ އަމުރުން އެނގޭ ގޮތުގައި، މަސްތުވާތަކެތި ބޭނުން ކުރުމާއި، ގެންގުޅުން އަދި ވިޔަފާރި ކުރުމުގެ ތުހުމަތުގައި ހައްޔަރު ކޮށްފައިވަނީ ނޭޕާލްގެ 21 އަހަރުގެ ނިޝާ ރާއީ އެވެ.
އާދިއްތަ ދުވަހުގެ އޭނާ ގެ ބަންދަށް 15 ދުވަސް ޖަހައި ކަސްޓޯޑިއަލް ޖަލެއްގައި ބަންދު ކުރުމަށް އަމުރު ކޮށްފައިވެ އެވެ.
ކޯޓު އަމުރުގައި ބުނީ، އޭނާ ގެ މައްޗަށް ތުހުމަތު ކޮށްފައިވާ ކުށް އޭނާ ކުރި ކަމަށް ތުހުމަތު ކުރެވޭ މިންވަރެއްގެ ހެކި ލިބިފައިވާ ކަމަށާއި، ހާދިސާ ހިނގި ތަނަށް ދިޔަ ފުލުހުންގެ ބަޔާނާއި، ހެއްކެއްގެ ބަޔާނާއި ހާދިސާގެ ސީނުން ފެނިފައިވާ މަސްތުވާތަކެތީގެ ތަފްސީލާއި އެތަކެތީގެ ބަރުދަން އެނގޭނެ އެތަކެތީގެ ތަހުލީލު ރިޕޯޓު އަދި ސީން އޮފް ކްރައިމް އޮފިސަރސް ރިޕޯޓާއި ކުޑަ ކަމުދާތަކެތީގެ ތަހްލީލު ރިޕޯޓު ހުށަހަޅާފައިވާ ކަމަށެވެ.
ނިޝާ ރާއީ ގެ ކުޑަކަމުދާ ތަކެތި ތަހްލީލު ކުރުމުން ކެނެބިސްއަށް ޕޮޒިޓިވްވެފައިވާ ކަމަށް ފުލުހުން ކޯޓުގައި ބުނެފައިވެ އެވެ.
މީގެ އިތުރުން ނިޝާ ރާއީ އަކީ މަސްތުވާތަކެތި ވިއްކާ ވިޔަފާރި ކުރާ ފަރާތެއް ނޫން ކަމަށާއި، އޭނާ އަށް އެތަނަށް ދެވުނީ އޭނާއަކީ މި މައްސަލާގައި ތުހުމަތު ކުރެވޭ ފަރާތަކާއި ލޯބީގެ ގޮތުން ގުޅިގެން އުޅޭ ފަރާތަކަށްވުމާއެކު ކަމަށް ދިފާއުން ފާހަގަ ކޮށްފައިވެ އެވެ.
އޭނާއާ މައްސަލައިގައި ތުހުމަތު ކުރެވޭ ފަރާތަކާއި ދެމީހުން މަސްތުވާތަކެތި ފެނުނު ރޫމްގައި އުޅޭކަމާއި އަދި އެ ރޫމުން އޭނާ ގެ ތުވާއްޔަކާއި އޭނާ ގެ ޕާސްޕޯޓު ސައިޒްގެ ފޮޓޯ ފެނިފައިވާކަން ލިޔެކިއުންތަކުން އެނގޭ ކަމަށް ބުނެފައި ވެއެވެ. އަދި ފެނުނު ތަކެތި ހުރީ ހާމައަށް ފެންނަ ގޮތަށް ކަމަށް އައިއޯ ގެ ފަރާތުން ފާހަގަކޮށްފައިވާ ކަމަށް ކޯޓު އަމުރުގެ އިތުރު ބަޔާނުގައި ބުނެފައިވެ އެވެ.
މި މައްސަލަ ފުލުހުން އިތުރަށް ތަހުގީގު ކުރަމުންދާއިރު، ތަހުގީގު މުއްދަތު 3 މާރިޗް 2026 ގެ ނިޔަލަށް އިތުރު ކުރުމަށް ވެސް ޕީޖީ އޮފީހުން ވަނީ ނިންމާފަ އެވެ.
