މީޑިއާ ކޮންޓްރޯލް ބިލުން ރައްޔިތުންގެ ހިޔާލު ފާޅުކުރުމުގެ މިނިވަންކަން ގެއްލިދާނެ: ސަވާދު
މީޑިއާ ކޮންޓްރޯލް ކުރުމުގެ ބިލު ފާސްވެއްޖެނަމަ ސަރުކާރާ ދެކޮޅަށް ހިޔާލު ފާޅުކުރާ ފަރާތްތައް ފެތޭނީ ގައުމީ ސަލާމަތުގެ ގޮޅިއަކަށް
ކުރީގެ ބަންޑާރަ ނައިބު ޑރ. އަހްމަދު އަލީ ސަވާދު "ހިޔާލާއި ފިކުރު ކަފުނަށް" ފޯރަމްގައި ވާހަކަ ދައްކަވަނީ
ރައްޔިތުންގެ މަޖިލީހަށް ހުށަހެޅިފައިވާ މިނިވަން މީޑިއާތައް ނައްތާލާ ބިލު ފާސްކޮށްފި ނަމަ، ސަރުކާރާ ދެކޮޅަށް ހިޔާލު ފާޅުކުރާ ފަރާތްތައް ފެތޭނީ "ގައުމީ ސަލާމަތުގެ ގޮޅިއަކަށް" ނުވަތަ "ނަފްރަތު ފެތުރުމުގެ ގޮޅިއަކަށް" ކަމަށް ކުރީގެ ބަންޑާރަ ނައިބު ޑރ. އަހްމަދު އަލީ ސަވާދު ވިދާޅުވެއްޖެއެވެ.
ނޫސްވެރިން އިސްނަގައިގެން "ޚިޔާލާއި ފިކުރު ކަފުނަށް" ގެ ނަމުގައި އާޓިފިޝަލް ބީޗުގައި ހޮނިހިރު ދުވަހުގެ ރޭ ބޭއްވި ފޯރަމްގައި ވާހަކަފުޅު ދައްކަވަމުން، މި ބިލުގެ ސަބަބުން ހިޔާލު ފާޅުކުރުމުގެ މިނިވަންކަމަށް ބޮޑެތި ހުރަސްތަކެއް ކުރިމަތިވާނެ ކަމަށް ސަވާދު ވިދާޅުވިއެވެ.
މި ބިލު ފާސްވުމުން އުފެދޭ ކޮމިޝަނަށް ހިޔާލު ފާޅުކުރުން މާނަކުރުމުގެ ފުރިހަމަ ބާރު ލިބިގެންދާނެ ކަމަށާއި، އެ މާނަކުރާ ގޮތެއްގެ މައްޗަށް ބިނާކޮށް އާންމު ފަރުދުން ވެސް ޖޫރިމަނާ ކުރުމުގެ އިހްތިޔާރު ކޮމިޝަނަށް ލިބިގެންދާނެ ކަމުގެ ކަންބޮޑުވުން ސަވާދު ފާޅުކުރެއްވިއެވެ.
އަޅުގަނޑުމެންގެ ތެރެއިން ކޮންމެ މީހަކު ވެސް ސިޔާސީ ވާން ޖެހޭ ކަމަށާއި ތަފާތު ނަޒަރިއްޔާތަކަށް އަޅުގަނޑުމެންގެ ވިސްނުން ހިންގަން ޖެހޭކަމަށް ސަވާދު ވިދާޅުވިއެވެ. އަދި ނޫސްވެރިންނަކީ ވެސް އެ ބައެއްގެ ފިކުރަށް ބިނާވެ ހުރެ ހިޔާލު ފާޅުކުރާ ބައެއް ކަމަށް ފާހަގަކުރެއްވިއެވެ. ނަމަވެސް އެގޮތަށް ފާޅުކުރާ ހިޔާލު ފާޅުކުރުމަކީ "ސިޔާސީ ނުފޫޒު" ގެ ގޮތުގައި މަނާކޮށް ގޮޅިއަކަށް ފެއްތުމަކީ ކޮށްގެން ވާނެ ކަމެއް ނޫން ކަމަށްވެސް ސަވާދު ވިދާޅުވި އެވެ
އަޅުގަނޑުމެން ކޮންމެ މީހަކީ ވެސް ކޮންމެވެސް ނުފޫޒެއްގައި ޖެހިފައި ތިބޭ ބައެއް. ނުފޫޒަކީ ކޮބައިތޯ؟ ނުފޫޒަކީ ފިކުރު. ކޮންމެ މީހެއްގެ ވެސް އޮންނާނެ ނުފޫޒެއް. އެ މީހާގެ ނުފޫޒުގެ މައްޗަށް ބުރަވެ ހުރެ އެ މީހާގެ ބަސް ބުނާނީ. އެއީ އެ މީހާގެ ފިކުރުގެ މައްޗަށް ބުރަވެ ހުރެ. ނޫސްވެރިންނަކީ ވެސް އެ ބައެއްގެ ފިކުރަށް ބިނާވެ ހުރެ އެ ބައެއްގެ ފިކުރު ފާޅުކުރާ ބައެއްކުރީގެ ބަންޑާރަ ނައިބު ޑރ. އަހްމަދު އަލީ ސަވާދު
ބިލުގެ 60، 61 އަދި 80 ވަނަ މާއްދާގައި އާންމުންގެ ހިޔާލުތައް ހިމެނޭކަން ފާހަގަކުރައްވަމުން، އިލެކްޓްރޯނިކް މީޑިއާ އަދި އިންޓަނެޓް މެދުވެރިކޮށް ކުރެވޭ މުއާމަލާތްތައް ވެސް މި ބިލުގެ ދަށުން ރެގިއުލޭޓް ކުރެވިގެންދާނެ ކަމަށް ސަވާދު ވިދާޅުވިއެވެ. އެހެން ކަމުން މި ވާގޮތާ ދޭތެރޭ ވިސްނާލާއިރު އެނގިގެންދަނީ ސަރުކާރުން ކަނޑައެޅިގެން މިނިވަން މީޑިއާ ތައް ކޮންޓްރޯލް ކުރަން ފޫގަޅައިގެން ހުރި މިންވަރު ކަމުގައެވެ. އަދި މިބިލުން ސަލާމަތް ވާނީ ރައީސް މުއިއްޒުއާ، މުއިއްްޒުގެ އަގުލަބިއްޔަތުގައި ދެމިއޮންނަ މަޖިލިސް ކަމަށް ސަވާދު ފާހަގަ ކުރެއްވިއެވެ.
ތަހުޒީބީ ޑިމޮކްރަސީތަކުގައި އަބުރަށް އަރައިގަތުމަކީ ޖިނާއީ ކުށެއްގެ ބަދަލުގައި މަދަނީ ކުށެއްގެ ގޮތުގައި ބެލެވޭ ކަމަށް ފާހަގަކުރައްވަމުން، މި ބިލަކީ ހިޔާލު ފާޅުކުރުމުގެ މިނިވަންކަން ހަނިކޮށް، ނޫސްވެރިކަމުގެ މިނިވަންކަން ގެއްލުވާލުމަށް އަމާޒުކޮށްފައިވާ ބިލެއް ކަމަށް ސަވާދު ވަނީ ވިދާޅުވެފައެވެ.
