ސޮސިއެޑާޑް ބަލިކޮށް، ރެއާލް އަށް ހަތަރު ވަނަ މޮޅު

ސްޕެނިޝް ލީގުގައި ރެއާލް ސޮސިއެޑާޑާ ދެކޮޅަށް ކުޅުނު މެޗުން މޮޅުވެ، ރެއާލް މެޑްރިޑް އިން އެ ޓީމުގެ މޮޅުވުމުގެ ސިލްސިލާ ދަމަހައްޓައިފި އެވެ.

ސޮސިއެޑާޑްގެ އަމިއްލަ ދަނޑުގައި ކުޅުނު މެޗު ރެއާލް އިން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި ރެއާލް އިން ދެ ލަނޑު ޖެހިއިރު، ފަހު ހާފުގައި ސޮސިއެޑާޑް އިން ވަނީ އެ ޓީމުގެ ހަމައެކަނި ލަނޑު ޖަހައިފަ އެވެ.

މެޗު ފަށައިގެން 12 ވަނަ މިނެޓުގައި ރެއާލް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ، ފްރާންސްގެ ކެޕްޓަން ކީލިއަން އެމްބާޕޭ އެވެ. އޭގެ ފަހުން މެޗުގެ 32 ވަނަ މިނެޓުގައި ރެއާލްގެ ޑީން ހައުސަން އަށް ވަނީ ރަތް ކާޑު ދައްކައި ދަނޑުން ފޮނުވާލައިފަ އެވެ.

އެއް ކުޅުންތެރިޔަކު މަދުން ކުޅެމުން ދިޔަ ނަމަވެސް، ރެއާލް އިން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް، ރެއާލް އަށް އެ ލަނޑު ޖަހައިދިނީ އާޑާ ގުލާ އެވެ. އޭނާ އެ ލަނޑު ޖަަހަން ފުރުސަތު ތަނަވަސްކޮށްދިނީ އެމްބާޕޭ އެވެ.

މެޗުގެ ދެ ވަނަ ހާފު ފަށައިގެން ކުރީ ކޮޅު ސޮސިއެޑާޑް އިން އެ ޓީމުގެ ހަމައެކަނި ލަނޑު ޖެހީ، އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ. ރެއާލްގެ އޭރިޔާ ތެރެއިން އެ ޓީމުގެ ކުޅުންތެރިޔެއްގެ އަތުގައި ބޯޅަ ޖެހުމުން، ސޮސިއެޑާޑް އަށް ލިބުނު ޕެނަލްޓީ ކާމިޔާބުކުރީ މިކޭލް އޮޔާޒަބާލް އެވެ.

މެޗަށް ފަހު ވާހަކަ ދައްކަމުން ރެއާލްގެ ކޯޗު ޒަބީ އަލޮންސޯ ބުނެފައި ވަނީ، މެޗުގެ ބޮޑު ބައި ރެއާލް އިން ކުޅެން ޖެހުނީ އެއް ކުޅުންތެރިޔަކު މަދުކޮށް ކަމަށާއި، ނަމަވެސް ކުޅުންތެރިންގެ ފަރާތުންް ފެނުނީ އާދަޔާ ޚިލާފު ހިތްވަރެއް ކަމަށެވެ. އޭނާ ބުނީ މެޗުން މޮޅުވުމަށްޓަކައި ކުޅުންތެރިން އިތުރު ހިތްވަރެއްގައި މަސައްކަތް ކުރި ކަމަށެވެ.

އަލޮންސޯ ބުނީ، މެޗުގައި ރެއާލް އަށް އިތުރު ލަނޑު ޖަހަން ވެސް ފުރުސަތުތަކެއް ލިބުނު ކަމަށާއި، ނަަމަވެސް ބައެއް ވަގުތު ތަކުގައި އުނދަގޫތައް ދިމާވި ކަމަށެވެ. އޭނާ ބުނީ މެޗުގެ ނަތީޖާ ހިފަހައްޓަން ޖެހޭކަން ކުޅުންތެރިންނަށް ވިސްނުނު ކަމަށާއި، ކުޅުންތެރިން ކުޅެމުން ދިޔައީ އެކަމަށް ވަރަށް ބޮޑަށް ވިސްނައިގެން ކަމަށެވެ.

ލީގުގައި މިހާތަނަށް ކުޅެފައިވާ ހަތަރު މެޗުން ވެސް ރެއާލް މޮޅުވެފައިވާއިރު، އެއް ވަނައިގައި އެ ޓީމު އޮތީ 12 ޕޮއިންޓާ އެކު އެވެ.