ނޯބެލް ސުލްޙައިގެ އިނާމު ހޯދުމުގެ މަޤުސަދުގައި އެމެރިކާގެ ރައީސް ޑޮނަލްޑް ޓްރަމްޕް، އަމިއްލަ އަށް ޕްރޮމޯޓުވާން ދައްކާ އެއްވެސް ވާހަކަ އަކަށް ނުބަލާނެ ކަމަށް، ނޯބެލް އިނާމު ކޮމެޓީ އިން ބުނެފި އެވެ.

އޭއެފްޕީ އަށް ދެއްވި އިންޓަވިޔުއެއްގައި ނޯބެލް ކޮމެޓީގެ ސެކްރެޓަރީ ޖެނަރަލް ބާގް ހާޕްވިކެން ވިދާޅުވީ، ވަކި ކެންޑިޑޭޓަކަށް މީޑިއާގެ ސަމާލުކަން ލިބުނު ކަމުގައި ވީ ނަމަވެސް، އެކަމަކީ ކޮމެޓީގެ މަޝްވަރާތަކަށް އެއްވެސް އަސަރެއް ކުރާނެ ކަމެއް ނޫން ކަމަށެވެ.

އުމުރުފުޅުން 79 އަހަރުގެ ޓްރަމްޕް ވިދާޅުވަމުން ގެންދަވަނީ ނޯބެލް ސުލްޙައި އިނާމު ލިބެން ވާނީ އޭނާ އަށް ކަމަށެވެ. މިހާރު އެމެރިކާގެ ރައީސް ކަމުގެ ދެ ވަނަ ދައުރު ފުރިހަމަ ކުރަމުން ގެންދަވާ ޓްރަމްޕް ވިދާޅުވީ، މިހާތަނަށް އައިއިރު ހަ ހަނގުރާމަ ނިންމުމަށް ގެނައުމުގައި އޭނާގެ ދައުރު އޮންނާނެ ކަމަށެވެ.

ނަމަވެސް، އެމެރިކާާގެ ރިޔާސީ ކެމްޕެއިންގައި ޓްރަމްޕް އެންމެ ގަދަ އަށް ދެެއްކެވީ އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ އާއި، ރަޝިޔާ-ޔުކްރެއިން ހަނގުރާމަ ނިމުމަކަށް ގެންނާނެ ވާހަކަ އެވެ. ނަމަވެސް، ވެރި ކަމަށް އަށް މަސް ދުވަަސް ވެގެން ދިޔައިރު ވެސް، އެކަމުގައި ޓްރަމްޕް އަށް ކާމިޔާބު ހޯދިފައި ނުވެ އެވެ.

މިއަހަރުގެ ނޯބެލް ސުލްޙައިގެ އިނާމަށް ޓްރަމްޕްގެ ނަން ހުށަހަޅާފައިވާ ކަމަށް ބައެއް ޤައުމު ތަކުން ވަނީ ހާމަކޮށްފަ އެވެ. އޭގެ ތެރޭގައި އިސްރާއީލް ހިމެނޭއިރު، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ވަނީ ނޯބެލް އިނާމު ކޮމެޓީ އަށް ފޮނުވި ސިޓީ ވެސް ޓްރަމްޕް އަށް ރައްދު ކޮށްފަ އެވެ. އިސްރާއީލްގެ އިތުރުން އަޒަރުބައިޖާން ފަދަ ޤައުމު ތަކުން ވެސް ވަނީ ނޯބެލް އިނާމަށް ޓްރަމްޕްގެ ނަމަށް ތާއީދު ކުރާ ކަމަށް ހާމަކޮށްފަ އެވެ.

ނޯބެލް ކޮމެޓީގެ ސެކްރެޓަރީ ޖެނަރަލް ވިދާޅުވީ އިނާމަށް ނަން ހުށަހެޅުމަކީ މާ ބޮޑު ކާމިޔާބެއް ނޫން ކަމަށާއި، އަސްލު ކާމިޔާބަކީ އިނާމު ލިބުން ކަމަށެވެ. އިނާމަށް ނަން ހުށަހެޅުމުގެ ހައްގު ލިބިފައިވާ ފަރާތްތަކުގެ ތެރޭގައި ދުނިޔޭގެ ހުރިހާ ޤައުމެއްގެ ޤާނޫނު ހަދާ މަޖިލީހުގެ މެންބަރުންނާއި، ވަޒީރުންނާއި، ބައެއް ޔުނިވާސިޓީ ތަކުގެ ޕްރޮފެސަރުން ވެސް ހިމެނެ އެވެ.

މިއަހަރުގެ ނޯބެލް އިނާމު ލިބޭ ފަރާތް އިއުލާން ކުރުމަށް ހަމަޖެހިފައި ވަނީ އަންނަ އޮކްޓޫބަރު މަހުގެ 10 ވަނަ ދުވަހު އެވެ. މިއަހަރުގެ އިނާކަށް 338 ފަރާތަކަށް ވުރެ ގިނަ ފަރާތްތަކުން ނަން ހުށަހަޅާފައިވާ ކަމަށް ވަނީ ބުނެފަ އެވެ.