ފަސިންޖަރުންނާއެކު ދަތުރުކުރަމުން ދިޔަ މަތިންދާބޯޓެއްގެ އިންޖީނު ދަތުރުގެ މެދުތެރެއިން ނިއްވާލަން މަސައްކަތްކުރި ކަމަށް އެ ބޯޓުގެ ކުރީގެ ޕައިލެޓެއް ކޯޓުގައި އިއުތިރާފު ވެއްޖެއެވެ.

ކޯޓު ލިޔުންތަކާ ހަވާލާ ދީ ރިޕޯޓުތައް ބުނާ ގޮތުގައި ޖޯސެފް ޑޭވިޑް އެމަރސަން ކިޔާ މި މީހާ އަކީ އެލާސްކާ އެއަރލައިންސްގެ ފްލައިޓެއްގައި ޑިއުޓީ އިން ބޭރުން ކޮކްޕިޓްގައި ދަތުރު ކުރަމުން ދިޔަ މީހެކެވެ. ކޯޓު ލިޔެކިޔުންތަކުން ދައްކާގޮތުގައި އޭނާ ވަނީ ޕައިލެޓުންނާ ދިމާލަށް "އަހަރެން ރަނގަޅެއް ނޫން" ކަމަށް ބުނުމަށްފަހު ބޯޓުގެ އިންޖީނު ނިއްވާލަން މަސައްކަތް ކޮށްފައެވެ.

އެމަރސަން ފުލުހުންގެ ތަހުގީގު ގައި ބުނެފައި ވަނީ އޭނާ ނުރައްކާތެރި ވިހަ އެއް އެކުލެވޭ ހަންޑިކުޑައިގެ ބާވަތެއް ބޭނުން ކޮށްފައިވާ ކަމަށާއި، ނަފްސާނީ ބައްޔެއްގައި އޭނާ އުޅެމުން އައިސްފައިވާ ކަމަށެވެ.

އޭނާގެ އިއުތިރާފުވުމުގެ އެއްބަސްވުމުގެ ދަށުން، ޕްރޮސިކިއުޓަރުންނަށް އެއް އަހަރުގެ ޖަލު ޙުކުމެއް ހުށަހެޅިދާނެއެވެ. އެހެން ނަމަވެސް ބަންދުގައި އޭނާ ހޭދަ ކޮށްފައިވާ މުއްދަތައް ރިއާޔަތްކޮށް އޭނާގެ ވަކީލުން އިތުރު ޖަލު މުއްދަތެއް ނުދިނުމަށް ވަކާލާތު ކުރާނެ ކަމަށް ބެލެވެއެވެ.

ސްޓޭޓް ކޯޓުން އޭނާ އަށް 50 ދުވަހުގެ ޖަލު ޙުކުމެއް ކޮށްފައިވެއެވެ. މި މުއްދަތު އޭނާ ވަނީ ހަމަކޮށްފައެވެ. މީގެ އިތުރުން 5 އަހަރުގެ ޕްރޮބޭޝަން އާއި އޭނާ ނުރައްކަލަށް ހުށަހެޅި ކޮންމެ މީހަކަށް 8 ގަޑިއިރުގެ ރޭޓުން 664 ގަޑިއިރުގެ ކޮމިއުނިޓީ ސަރވިސް އަދި 60,659 ޑޮލަރުގެ ބަދަލު ދެއްކުމަށް ޙުކުމް ކޮށްފައި ވެއެވެ.

ހުކުރު ދުވަހު ކޯޓުގައި، އެމަރސަން ބުނެފައި ވަނީ މަޝްރޫމް ބޭނުން ކުރުމަށްފަހު ޙަޤީޤަތް ވަޒަން ކުރުމުގެ ޤާބިލުކަން ގެއްލިފައިވާ ކަމަށެވެ. "އެހެން ވިޔަސް ކުރެވުނީ ރަނގަޅު ކަމެއް ނޫން،" ކަމަށް އޭނާ ބުނެފައިވެއެވެ.

22 އޮކްޓޯބަރ 2023 ގައި ހިނގި މި ހާދިސާގެ ފްލައިޓަކީ 80 ފަސިންޖަރުންނާއެކު ވޮޝިންގްޓަނުން ސެން ފްރާންސިސްކޯ އަށް ދަތުރު ކުރަމުން ދިޔަ ފްލައިޓެކެވެ. އެހެން ނަމަވެސް ބޯޓު ތެރޭގައި ހިނގި މި ހަމަނުޖެހުމާ އެކު މި ފްލައިޓް ވަނީ ޕޯޓްލަންޑް އަށް ޑައިވާޓް ކޮށްފައެވެ.

ޖިނާއީ ދައުވާ ގައި ބުނެފައިވާ ގޮތުގައި އެއް ޕައިލެޓް ބުނެފައި ވަނީ އެމަރސަން ގެ އުނދަގޫ ހުއްޓެންދެން އޭނާއާ ތަޅާފޮޅަން ޖެހުނު ކަމަށެވެ. އޭގެފަހުން އޭނާ ކޮކްޕިޓުން ނެރެވުނެވެ. މުޅި ހާދިސާ ގައި ހޭދަވެފައިވަނީ 90 ސިކުންތުގެ ވަގުތުކޮޅެކެވެ.