މުދިމު ފަތިސް ނަމާދަށް ދިޔަ ދަނޑިވަޅު ބަލާފައި މުދިމުގެ އަނބިމީހާގެ ގާތައް ވަތް މީހެއްގެ މައްސަލަ ޑުބާއީގެ ކޯޓަކުން ބަލަން ފަށައިފިއެވެ.
މިސްކިތާ އިންވެގެން ހުންނަ މުދިމު ދިރިއުޅޭ ކޮޓަރީގައި ނިދާފައި އޮތް އޭނާގެ އަނބިމީހާ ގާތައް ވަނީ އުމުރުން 36 އަހަރުގެ ޕާކިސްތާނުގެ ފިރިހިނެއް ކަމަށް ޚަލީޖް ޓައިމްސްގައި ބުނެފައިވެއެވެ.
މައްސަލައިގެ ތަހުގީގު ރިޕޯޓުގައިވާ ގޮތުން ފަތިސް ނަމާދަށް ބަންގި ގޮވުމަށް މުދިމު ކޮޓަރިން ނުކުތް ވަގުތު ބަލާފައި މި ފިރިހެން މީހާ ނިދާފައި އޮތް އޭނާގެ އަނބިމީހާ ގާތައް ވަދެ މޫނުގައި ފިރުމާ މޫނުގައި ދޮންދީ ހަދާފައިވެއެވެ.
މުދިމުގެ އަނބިމީހާ ތަހުގީގައް ދީފައިވާ ބަޔާނުގައި ބުނެފައިވަނީ އޭނާގެ ފިރިމީހާ މިސްކިތާ އިންވެގެން ހުންނަ ކޮޓަރިން ނުކުތީ ފަތިސް ނަމާދަށް ބަންގި ގޮވުމަށާއި އިމާމުވެ ނަމާދު ކުރުމަށް ކަމުގައެވެ.
"އަހަރެން ނިދާފައި އޮއްވާ އަހަންނަށް އިހުސާސް ކުރެވުނު މީހަކު މަގޭ ނިތްކުރީގައި ދޮންދީ މޫނުގައި ފިރުމާ ހަދާކަން. އަހަރެން ހީކުރީ ފިރިމީހާ ކަމަށް. އެކަމަކު ހަމަ އެވަގުތު މިސްކިތުން އަހަރެންގެ ފިރިމީހާގެ އަޑުން ބަންގި ގޮވާ އަޑު އިވިއްޖެ. ދެން އަހަރެން ލޯ ހުޅުވާ ބަލާލި އިރު އެމީހާ އަހަރެންގެ މޫނާ ދިމާލަށް އޭނާގެ މޫނު ގެންނަނީ. ދެން އަހަރެން ހަޅޭއްލަވައި ގަތުމުން އޭނާ ދުއްވައިގަތީ" އަންހެން މީހާ މި ހާދިސާ ހިނގި ގޮތް ކިޔައިދެމުން ބުނެފައިވެއެވެ.
އަންހެން މީހާ ހަޅޭއްލަވައިގަތުމުން މި މީހާ ދުވެފައި ގޮސް ވަދެ އިނީ މިސްކިތުގައި ކަމަށް ވެއެވެ. މުދިމު ބުނި ގޮތުގައި މިކަން ކުރި މީހާ އޭނާ އަށް މިސްކިތުގައި އިންކަން ވަނީ ފާހަގަވެސް ވެފައެވެ.
"ނަމާދު ކޮށް ނިމިގެން މިސްކިތުގައި ހުރި އަހަރެންގެ ކޮޓަރި އަށް އެނބުރި ދިޔަ އިރު އޭނާ މިސްކިތުގައި އިން، ކޮޓަރި އަށް ވަތް އިރު އަންހެނުން ހުރީ ވަރަށް ބިރުގަނެފައި، އޭނާ ތުރުތުރު އަޅާ، އަންހެނުން ބުނި މީހަކު އޭނާގެ ކައިރިއަށް ވަތް ވާހަކަ އަދި އޭނާ ދެނެގަންނަން އެނގޭނެ ވާހަކަވެސް" މުދިމު ބުނެފައިވެއެވެ.
"އަހަރެން ވަގުތުން އެނބުރި ވަނީ މިސްކިތް ތެރެއަށް އަދި ޝައްކު ކުރެވޭ މީހާ ކައިރީ އެވާހަކަ އެހުމުން އޭނާ ވަގުތުން އެކަމަށް އެއްބަސްވި އަދި އެކަމަށް މާފަށް އެދި ފުލުހުންނަށް ނޭންގުމަށްވެސް އެދުނު" މިހާދިސާ އާ ބެހޭ ގޮތުން އިތުރަށް މުދިމު ބުނެފައި ވެއެވެ.
މި ހާދިސާ ހިނގީ މި ދިޔަ ޑިސެމްބަރު މަހުގެ ތެރޭގައެވެ. މައްސަލައިގެ ހުކުމް ކުރުން އޮންނާނީ އަންނަ ފެބްރުއަރީ މަހުގެ 18 ގައި ކަމަށް ޚަލީޖްޓައިމްސްގައި ބުނެފައިވެއެވެ.
