ގޯލްޑަން ގްލޯބް އެވޯޑްސް 2018: އާ ކަންތަކެއް ފެނިގެން ދިޔަ ހަފްލާއެއް

ގޯލްޑަން ގްލޯބް އެވޯޑްސް 2018 ވެގެން ދިޔައީ ގިނަ އާ ކަންތަކެއް ފެނިގެން ދިޔަ ހަފްލާއަކަށެވެ.

އެގޮތުން ގިނަ ތަރިންތަކެއް ހަފްލާއަށް ހާޒިރުވެފައި ވަނީ ކަޅު ހެދުން ލައިގެންނެވެ. އެއީ ނިމިގެން ދިޔަ އަހަރު ހޮލީވުޑްގައި ޖިންސީ ފުރައްސާރައިގެ ގިނަ މައްސަލަތަކެއް ފެންމަތިވެފައިވުމާ ގުޅިގެން، އެކަމާ ދެކޮޅަށް އަޑު އުފުލުމުގެ ގޮތުން ބޭއްވި ސުލްހަވެރި މުޒާހަރާގައި ބައިވެރިވުމުގެ ގޮތުންނެވެ.

މެރީލް ސްޓްރީޕް، ލައުރާ ޑަރން، ވައޯލާ ޑޭވިސް، މަރާޔާ ކެރީ، ޖެސިކާ ބީލް އަދި އެންޖަލީނާ ޖޯލީ ފަދަ ހޮލީވުޑްގައި ފާހަގަކުރެވޭ ތަރިން ވަނީ މި ސުލްހަވެރި މުޒާހަރާގައި ބައުވެރިވެފައެވެ. އަދި ފިރިހެން ތަރިން ކަޅު ސޫޓްތަކުގައި ފެނިގެން ދިޔަ އިރު، ގިނަ ފިރިހެން ތަރިން ވަނީ ޖެކެޓްގައި "ޓައިމްސް އަޕް" ޕިން ހަރުކޮށްފައެވެ. "ޓައިމްސް އަޕް"އަކީ ވަޒީފާގެ މާހައުލުގައި ހިނގާ މިފަދަ ޖިންސީ ފުރައްސާރަ ކުރުމުގެ އަމަލުތައް ކުށްވެރިކޮށް، އެކަމަށް ހޭލުންތެރި ކުރުމަށް ބައެއް ތަރިން އިސްނަގައިގެން ފަށާފައިވާ ކެމްޕޭނެކެވެ.

މީގެ އިތުރުން، ހަފްލާ ހުށަހަޅައި ދިން، މަޝްހޫރު ލޭޓް ނައިޓް ހޯސްޓް ކަމަށްވާ ސެތު މެޔަރސް ވެސް ވަނީ އޭނާގެ އޯޕަނިންގ މޮނޮލޮގްގައި މިކަމަށް އަލި އަޅުވާލައި، ގިނަ އަންހެން ފަންނާނުންތަކަކަށް ޖިންސީ ފުރައްސާރަ ކުރި ކަމަށް ތުހުމަތު ކުރެވިފައިވާ ހާވީ ވައިންސްޓައިން ފަދަ ފަރާތްތަކަށް ފާޑުކިޔާފައެވެ.

އެވޯޑްތައް ލިބުނު ފަރާތްތަކަށް ބަލާލިއަސް އާ ގިނަ ކަންތަކެއް ފެނިގެން ދިޔައެވެ.

އެގޮތުން، "ދިސް އިޒް އަސް"ގެ ތަރި، ސްޓަރލިންގ ކޭ ބްރައުން އަށް ޑްރާމާ ކެޓަގަރީން ބެސްޓް އެކްޓަރ ލިބިފައިވާއިރު، މިއީ ކަޅު އެފްރިކަން-އެމެރިކަން ނަސްލުގެ މީހަކަށް މި އިނާމް ލިބިގެން ދިޔަ ފުރަތަމަ ފަހަރެވެ. އަދި ބެސްޓް އެކްޓަރ އިން އަ ޓީވީ ކޮމެޑީ އަށް ހޮވުނު "މާސްޓަރސް އޮފް ނަން" ގެ ތަރި އަޒީޒް އަންސާރީއަކީ ގޯލްޑަން ގްލޯބެއް ހާސިލް ކުރި ފުރަތަމަ އޭޝިއާގެ އެކްޓަރެވެ.

މީގެ އިތުރަށް މި އަހަރުގެ ސިސީލް ބީ ޑެމިލް އެވޯޑް ވެސް ކާމިޔާގު ކުރީ ކަޅު ނަސްލުގެ އަންހެނެކެވެ. މަޝްހޫރު ޓީވީ ހޯސްޓް އޮޕްރާ ވިންފްރީއަކީ މި އިނާމް ހާސިލް ކުރި ފުރަތަމަ ކަޅު ނަސްލުގެ އަންހެން ތަރިއަށްވާއިރު، އޭނާ އިނާމް ހޯދުމަށް ސްޓޭޖަށް އެރުމުން ތަރިންތައް ވަނީ އޭނާއަށް ސްޓޭންޑިންގ އޮވޭޝަނެއް ދީފައެވެ.

"މީޑިއާ މިއޮތީ ހިފެހެއްޓިފައި، އަހަރެން ކުރިއަށް ވުރެ ބޮޑަށް މިހާރު މީޑިއާ ވެލިއު ކުރަން. ތެދަކީ އަހަރަމެންގެ އަތުގައި އޮތް އެންމެ ވަރުގަދަ ހަތިޔާރު،" އޯޕްރާގެ ސްޕީޗްގައި ފާހަގަކުރިއެވެ. އަންހެން ފަންނާނުންނަށް ދިމާވި ހާދިސާތައް ދުނިޔެއަށް ހާމަކޮށްދީފައިވާތީ ޝުކުރު އަދާކޮށް، އަންހެނުންނަށް ޖިންސީ ފުރައްސާރަކުރާ "ބާރު ގަދަ" ފިރިހެނުންގެ ވަގުތު ހަމަވެއްޖެ ކަމަށް އޭނާ ބުންޏެވެ.