ޖީ-20 ސަމިޓު އަމިއްލަ މިއާމީ ގޯލްފް ރިސޯޓުގައި ބާއްވަން ޓްރަމްޕް ނިންމަވައިފި

އަންނަ އަހަރުގެ ޖީ-20 ސަމިޓު، މިއާމީގައި ހުންނަ އޭނާގެ އަމިއްލަ ގޯލްފް ރިސޯޓުގައި ބާއްވަން ނިންމާފައިވާ ކަމަށް، އެެމެރިކާގެ ރައީސް ޑޮނަލްްޑް ޓްރަމްޕް ވިދާޅުވެއްޖެ އެވެ.

އެމެރިކާގެ ރިޔާސީ ގަނޑުވަރު، ވައިޓް ހައުސްގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވެފައި ވަނީ، 2026 ވަނަ އަހަރުގެ ޖީ-20 ސަމިޓު އޭނާގެ އަމިއްލަ ގޯލް ރިސޯޓު، ޓްރަމްޕް ނެޝަނަލް ޑޮރާލްގައި ބޭއްވުމަށް ނިންމަވާފައިވާ ކަމަށެވެ.

މިކަން ޓްރަމްޕް އިއުލާން ކުރެއްވިއިރު، އޭނާގެ ރިޔާސީ ފުރަތަމަ ދައުރުގެ ތެރޭގައި ވެސް ޓްރަމްޕް ވަނީ، އެ ތަނުގައި ޖީ-20 ސަމިޓު ބޭއްވުމަށް މަސައްކަތް ކުރައްވައިފަ އެވެ. ނަމަވެސް، އޭރު ކޮރަޕްޝަންގެ ތުހުމަތުތަކާ ގުޅިގެން އެންމެ ފަހުން ޓްރަމްޕް އަށް ޖެހިވަޑައިގެންނެވީ އެކަން ދޫކޮށްލެއްވުމަށެވެ.

ހޮނިހިރު ދުވަހު ޓްރަމްޕް ވިދާޅުވީ އެ ރިސޯޓުގައި ޖީ-20 ސަމިޓު ބޭއްވުމަށް ނިންމާފައި ވަނީ އެތަނަކީ ވަރަށް ހިތްގައިމު، ހިތްހަމަ ޖެހޭ ތަނަކަށް ވެފައި، ފްލޮރިޑާގެ މޫސުން ރަނގަޅުވުމާ އެކު ކަމަށެވެ. އަދި ޖީ-20 ސަމިޓު ބޭއްވުމަށް އެންމެ އެކަށީގެންވާ ތަނަކީ އެއީ ކަމުގައި ޓްރަމްޕް ވިދާޅުވެފައިވެ އެވެ.

އަމިއްލަ ވިޔަފާރީގައި އުޅުއްވައި މުއްސަނދިކަން ހޯއްދަވާފައިވާ ޓްރަމްޕް އިތުރަށް ވިދާޅުވީ، އެ ތަނަކީ އެއާޕޯޓާ ވެސް ކައިރި ތަނެއް ކަމަށެވެ. އަދި އެއީ އެންމެ ރަނގަޅު ސަރަހައްދު ކަމަށާއި، އެ ތަނަކީ ހުރިހާ ގޮތަކުން ވެސް ފުރިހަމަ ތަނެއް ކަމަށް ޓްރަމްޕް ވިދާޅުވި އެވެ. އޭނާ ވިދާޅުވީ އެ ތަނުގައި ޖީ-20 ސަމިޓު ބާއްވައިގެން، ޤައުމު ތަަކަށް އެންމެ އަގު ހުރި ޚިދުމަތް ދެވޭނެ ކަމަށެވެ.

އެމެރިކާގެ ރައީސް ކަމުގެ ފުރަތަމަ ދައުރުގައި ވެސް، މަގާމުގެ ބޭނުން ކޮށްގެން މުއްސަނދިކަން ހޯދަން މަސައްކަތް ކުރި ކަމުގެ ތުހުމަތު ޓްރަމްޕްގެ މައްޗަށް ކޮށްފައިވެ އެވެ. މިހާރު ދެ ވަނަ ދައުރަކަށް ވެރިކަން ކުރައްވަމުން ގެންދަވާ ޓްރަމްޕް ވިދާޅުވީ، އޭނާގެ އަމިއްލަ ރިސޯޓުގައި ޖީ-20 ސަމިޓު ބޭއްވި ނަމަވެސް، އެކަމުން އެއްވެސް ފައިދާއެއް ނުނަންގަވާނެ ކަމަށެވެ.

އެގޮތުން ޓްރަމްޕް ވިދާޅުވެފައި ވަނީ، އެކަމުން އެއްވެސް ފައިސާއެއް އޭނާ ބޭނުން ނުވާ ކަމަށާއި، އެއްވެސް މަންފާއެއް ހޯދަން ބޭނުންފުޅު ނުވާ ކަމަށެވެ. އެކަން ފާހަގަ ކުރައްވައި ޓްރަމްޕް ވިދާޅުވީ، އޭނާގެ ހަމައެކަނި އަމާޒަކީ، ޖީ-20 ސަމިޓު ރަނގަޅު ފެންވަރެއްގައި ކުރިއަށް ގެންދިޔުން ކަމަށެވެ.

ޑިސެމްބަރު މަހު މިއާމީގެ ގިނަ ހޮޓާތައް ފުރިފައި ހުންނަ ކަމަށާއި، އޭނާގެ ރިސޯޓުގައި ޖީ-20 ސަމިޓު ބޭއްވުމުން ކޮންމެ ޤައުމަކަށް ވަކި އިމާރާތެއް ލިބޭނެ ކަމަށް ޓްރަމްޕް ވިދާޅުވެފައިވެ އެވެ. އެކަމުން އެންމެ ރަނގަޅު ހައްލު ހޯދޭނެ ކަމުގެ ޔަގީންކަން އޮތް ކަމަށް ވެސް އޭނާ ވިދާޅުވި އެވެ.

އެމެރިކާގައި ބާއްވާ ޖީ-20 ސަމިޓުގައި ރަޝިޔާގެ ރައީސް ވޮލަޑިމިއަރ ޕުޓިން އަދި ޗައިނާގެ ރައީސް ޝީ ޖިންޕިން ވަޑައިގަންނަވާނެތޯ ސުވާލު ކުރުމުން ޓްރަމްޕް ވިދާޅުވީ، ސަމިޓުގެ އޮބްޒާވަރުންގެ ގޮތުގައި އެ ދެ ރައީސުންނަށް ވެސް މަރުޙަބާ ކިޔާނެ ކަމަށެވެ. ޓްރަމްޕް މިހެން ވިދާޅުވެފައިވާއިރު، ރަޝިޔާ އާއި ޗައިނާ އަކީ ޖީ-20 ގެ މެމްބަރު ޤައުމުތަކެވެ.

މިއަހަރުގެ ޖީ-20 ސަމިޓު ބޭއްވުމަށް ހަމަޖެހިފައި ވަނީ ސައުތު އެފްރިކާގަ އެވެ. ޓްރަމްޕް ވިދާޅުވީ މިއަހަރު އޮންނަ ޖީ-20 ސަމިޓަށް އޭނާ ވަޑައިނުގަންނަވާނެ ކަމަށެވެ. އަދި އޭނާގެ ބަދަލުގައި އެ ސަމިޓުގައި ބައިވެރިވެ ވަޑައިގަންނަވާނީ، އެމެރިކާގެ ނައިބު ރައީސް ޖޭޑީ ވޭންސް ކަމުގައި ޓްރަމްޕް ވަނީ އިއުލާން ކުރައްވައިފަ އެވެ.